ގދ. ތިނަދޫ އަށް ފެނަކައިން ކޮންޓްރެކްޓަރަކު މެދުވެރިކޮށް ގެންދިޔަ ފެންޕްލާންޓު ގަތުމުގެ ފަހަތުގައި ކަރަޕްޝަންގެ އަމަލުތަކެއް އުޅޭކަން އިތުބާރު ހުރި ގޮތެއްގައި ރާއްޖެއެމްވީ އަށް އެނގިއްޖެއެވެ.

ގދ ތިނަދުއަށް ގެންގޮސްފައިވާ އާރްއޯ ޕްލާންޓަކީ 24 ގަޑިއިރުގައި 300 ޓަނު (ގަޑިއިރަކު 12.5 ކޮޑިމީޓަރު) އުފައްދާ ގޮތަށް ފަރުމާކުރެވިފައިވާ ޕްލާންޓެކެވެ. ނަމަވެސް، ޕްލާންޓް ގަންނަން ފެނަކައިން ދިން ސްޕެސިފިކޭޝަންގައި ބަޔާންކޮށްފައިވަނީ 20 ގަޑިއިރުން 300 ޓަނު (ގަޑިއިރަކު 15 ކޮޑިމީޓަރު) ޕްލާންޓުން އުފައްދަންޖެހޭ ކަމަށެވެ.

މީގެ އިތުރުން، 300 ޓަނުގެ ފެން އުފައްދަން ހޯދި ޕްލާންޓުގައި ހުންނާނެ ކަމަށް ކޮންޓްރެކްޓަރުގެ ޕްރޮޕޯސަލްގައި ހިމެނިފައިވީ ކިތަންމެ ކަމެއް ޕްލާންޓް ތިނަދޫ އަށް ގެންދިޔަ އިރު ނެތްކަންވެސް ވަނީ އެނގިފައެވެ. އޭގެ ތެރޭގައި 2 ޓްރާންސްފަރ ޕަމްޕާއި، ކާޓްރިޖް ފިލްޓަރާއި، ރޮޑަކްޓް ޑިސްއިންފެކްޓަންޓް ޔޫވީ-ސީ ސިސްޓަމެއް ނެތެވެ.

ހަމައެއާއެކު، ފެނަކައިން ޕްލާންޓުގައި ހުންނަން ޖެހޭނެ ކަމަށް ބުނެފައިވާ ބައިތަކުގެ ތެރެއިން ރިޖެކްޓް ޓޭންކާއި ރިޖެކްޓް ޕަމްޕުތައް ހިމެނިފައެއް ނުވެއެވެ.

ތިނަދޫ އަށް ގެންދިޔަ އާރްއޯ ޕްލާންޓަކީ ވަރަށް ބޮޑަށް އޮޅުވާލައިގެން ދިން ސްޕެސިފިކޭޝަށް ވުރެ މާ ދަށް ޕްލާންޓެއްކަން ފެނައިކައިގެ ވެރިންނަށްވެސް އެނގޭނެ ކަމަށް މައުލޫމާތު ދިން ފަރާތުން ބުނެފައިވެއެވެ.

ނަން ނުޖެހުމަށް ޝަރުތުކޮށް މި ނޫހަށް މައުލޫމާތު ދިން ފަރާތުން ބުނީ މިހާރު ގެންގޮސްފައިވާ ޕްލާންޓަކީ ދުވާލަކު 300 ޓަނު އުފައްދާ ޕްލާންޓަށް ދިން މިންގަނޑުތަކަށް ފެތޭ ޕްލާންޓެއް ނޫނެވެ. އެހެން ކަމުން ކުރިން 20 ގަޑީއިރު ހިންގައިގެން އުފައްދަން ބޭނުންވި އަދަދަށް ފެން އުފައްދަން މިހާރު ގެންދިޔަ ޕްލާންޓް 24 ގަޑިއިރު ހިންގަން ޖެހޭނެ ކަމަށް އޭނާ ބުންޏެވެ.

ތިނަދޫ އަށް ޕްލާންޓެއް ފޮނުވަން ޖެހުނީ އެތަނުގައި ހުރި ޕްލާންޓަށް ކޮން މައްސަލައެއް ޖެހިގެންތޯ ސުވާލު ކުރުމުން އޭނާ ބުނީ ޕްލާންޓަށް ދިމާވި މައްސަލައަކީ ޖުލައި މަހުގެ މެދުތެރޭގައި ޕްލާންޓުގެ އެނަރޖީ ރިކަވަރީ ޑިވައިސްގެ އޯ ރިންގް ސީލް ކިޓް ހަލާކު ވުމެވެ.

"މިފަދަ ސީލްކިޓެއްގެ އަގަކީ 15،000 ރުފިޔާ. އެއީ އާންމު ގޮތެއްގައި 15 ވަރަކަށް ދުވަހުން ގެނެވޭ އެއްޗެއް،" އޭނާ ބުންޏެވެ.

އެހެން ނަމަވެސް "ހެޔޮ އެދޭ ފަރާތަކުން" ސީލް ކިޓް ހަދިޔާ ކުރުމާއެކު ޕްލާންޓް ހިންގޭ ގޮތް ދިމާވި ކަމަށާއި، އެއާއެކު އެއްވެސް މައްސަލައެއް ނެތި ބަރާބަރަށް ޕްލާންޓް ހިނގަމުން ދިޔަ ކަމަށް އޭނާ ބުންޏެވެ.

އޭނާ ބުނި ގޮތުގައި މިކަން މިހެން ކުރިއަށް ދަނިކޮށް އަވަސް އަރުވަލައިގެން ތިނަދޫ އަށް އާރްއޯ ޕްލާންޓެއް ހޯދުމުގެ މަސައްކަތް ފެނަކައިން ފެށީއެވެ.

މައުލޫމާތު ދިން ފަރާތުން ބުނެފައިވާ ގޮތުގައި އަވަސް އަރުވާލާއިގެން ތިނަދޫ އަށް ޕްލާންޓެއް ހޯދަން ޖެހޭ ހާލަތެއް މިވަގުތު ނުވެސް ނެތެވެ. ތިނަދޫ ޕްލާންޓް ދަނީ ރަނގަޅަށް ހިނގަމުންނެވެ. އެހެން ނަމަވެސް "އިމަޖެންސީ" ކަމެއްގެ ގޮތުގައި ޕްލާންޓް ހޯދި އިރު އެންމެ އާރް އޯ ޕްލާންޓެއް ހިނގަމުންދާ ހަތް ރަށެއް މިހާރުވެސް ރާއްޖޭގައި އޮތްކަން އޭނާ ވަނީ ފާހަގަ ކޮށްފައެވެ.

"އިމަޖެންސީ ވަންޏާ އަނެއް 7 ރަށުގައިވެސް އިމަޖެންސީ ވާނެތާ!،" މައުލޫމާތު ދިން ފަރާތުން ބުންޏެވެ.

އޭނާ ބުނިގޮތުގައި ތިނަދޫއަށް ޕްލާންޓެން ގެންދަން ބޭނުންވީ "ޖީބު ބޮޑު ކުރާށެވެ." އޭނާ ބުނީ 189،390 ޑޮލަރު (ގާތްގަނޑަކަށް 3 މިލިއަން ރުފިޔާ) އަށް ގަންނަން ލިބެންހުރި ޕްލާންޓެއް 10،350،000 ދިވެހި ރުފިޔާ އެއް ފަހަރާ ފައިސާ ދައްކާފައި ނެގީ އޭގެން ނާޖާއިޒް މަންފާއެއް ހޯދުމަށް ކަމަށެވެ.

އޭނާ ބުނިގޮތުގައި އަވަސް އަރުވާލައިގެން ޕްލާންޓް ގަތް އިރު ޕްރޮސީޖަރަށް ބެލުމެއް ނެތި އެންމެ ފަހުން ޕްލާންޓް ގެންދިޔައިރު ގަޑިއަކު 15 ޓަނު އުފައްދަން ޖެހޭނެ ކަމަށް ބުނެފައިވީނަމަވެސް އެ ޕްލާންޓުން އުފެއްދެނީ 12.5 ޓަނުކަމުގައެވެ.

މައްސަލަ މިހެން ދިމާވުމުން ފެނަކައިގެ ޓީމެއް ތިނަދޫ އަށް ގޮސް ޕްލާންޓް ބެލުމަށްފަހު ރިޕޯޓެއް ހަދާ ހުށަހެޅި ކަމަށާއި އެހެން ނަމަވެސް އެއީ "ނެތް ރިޕޯޓަކަށް ހަދާ" އެހެން ބަޔަކު ލައްވާ އެހެން ރިޕޯޓެއް ހެދީ ކަމަށެވެ.

އޭނާ ބުނިގޮތުގައި ސަރުކާރުގެ އެހެން ކުންފުންޏަކުން 400 ޓަނުގެ ޕްލާންޓެއް 7 މިލިއަން ރުފިޔާ އަށް 12 މަހުން ފައިސާ ދައްކާ ގޮތައް ދޭން ބުނުމުންވެސް ފެނަކައިން ބޭނުންވީ ޕްލާންޓް ގަންނަން ކަމަށާއި އެހެން ކަމުން އެ ރިކުއެސްޓް އެގޮތައް ނުފޮނުވާ ކަމުގައެވެ.