އިލެކްޓްރޯނިކް ސާމާނުތަކެއް ވަގަށްނެގި މައްސަލަ: ހައްޔަރު ކުރި ދެމީހުން ވަނީ ވަގަށް ގެއަކަށް ވަދެ، މަރުގެ އިންޒާރު ދީފައި
މި ދެމީހުން ވަނީ މާފަންނު ގެއެއްގެ ފާހަނާ ފެން ލައިޓުން ކޮޓަރިއަށް ވަދެ، ނިދާފައި ތިބި ދެމީހެއްގެ ކަރުގައި ވަޅި ޖައްސާފައި
ފުލުހުންގެ މައި އިދާރާ
އިލެކްޓްރޯނިކް ސާމާނުތަކެއް ވަގަށްނެގި ކަމުގެ ތުހުމަތުގައި ހައްޔަރުކުރި ދެ ފިރިހެނުންނަކީ ގެއަކަށް ވަދެ، ވަޅިން ބިރު ދައްކާ މަރާލާނެ ކަމަށް އިންޒާރު ދިން ދެމީހުން ކަމަށް ފުލުހުން ބުނެފިއެވެ.
މިމައްސަލާގެ ތުހުމަތުގައި ހައްޔަރުކޮށްފައިވަނީ ކ.މާލެ، 30 އަހަރު އިސްމާއިލް ވިޝާލްގެ އިތުރުން ބ.ދަރަވަންދޫ، 32 އަހަރުގެ ހުސައިން ޝާއިފްއެވެ.
ބުރާސްފަތި ދުވަހު ފުލުހުން ބުނީ މާފަންނު ގެއެއްގެ ފާހަނާ ފެން ލައިޓުން ވަދެ ކޮޓަރީގައި ނިދާފައި ތިބި ދެމީހެއްގެ ކަރުގައި ވަޅި ޖައްސައި އެއްވެސް ހަރަކާތެއް ކޮށްފިނަމަ މަރާލާނެ ކަމަށް ބުނެ، ބިރު ދައްކައި އެ ދެމީހުންގެ މޯބައިލް ފޯނާ ލެޕްޓޮޕަކާ އަދި އެހެނިހެން ތަކެތި ފޭރުނު މައްސަލަ ސެޕްޓެންބަރު މަހުގެ 4 ވަނަ ދުވަހުގެ ދަންވަރު ވަގުތެއްގައި ރިޕޯޓުކޮށްފައިވާ ކަމަށެވެ.
ފުލުހުން ބުނީ ފޭރުމަށްފަހު ދެމީހުން ފިލައިގެން ގޮސްފައިވަނީ ފާހަނާއަށް ވަދެ އެތެރޭން ދޮރު ތަޅުލައި ފެން ލައިޓުން ނުކުމެގެން ކަމަށެވެ.
މީގެ އިތުރުން ފުލުހުން ބުނީ މި ދެމީހުން ބުދަ ދުވަހުގެ ރޭގެ ވަގުތެއްގައި ހައްޔަރުކޮށް އަދި އެމީހުން ފޭރުނު ލެޕްޓޮޕާއި މޯބައިލް ފޯނު ހޯދާފައިވާ ކަމަށެވެ. އަދި އެމީހުން ވަގަށް ނަގާފައިވާ ކަމަށް ތުހުމަތު ކުރެވޭ އެހެނިހެން ތަކެތި ވެސް އެމީހުން އަތުން ފެނިފައިވާ ކަމަށް ފުލުހުން ބުނެއެވެ.
މިމައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.
