ބީއެމްއެލް އިން ބަޣާވާތްކުރި ކަމަށް ބުނަނީ ސަރުކާރަށް ގޯސް ހެދުމުން ދެބޯގެރި ދުއްވަން - ނާޒިލް
ބީއެމްއެލްގެ ރުފިޔާ ކާޑުން ކުރެވޭ ޑޮލަރު މުއާމާލާތްތައް ސަސްޕެންޑު ކުރުމަށް ބޭންކުން ކުއްލި ގޮތަކަށް އިއުލާނު ކުރުމަށް ފަހު، ނިންމުން ހަމަ އެ ދުވަހު ވަނީ އުވާލާފަ
އެމްޑިޕީގެ ނޫސްވެރިންގެ ބައްދަލުވުމުގެ ތެރެއިން
ބޭންކް އޮފް މޯލްޑިވްސް (ބީއެމްއެލް) އިން ބަޣާވާތްކުރި ކަމަށް ބުނަނީ ސަރުކާރަށް ގޯސް ހެދުމުން ދެބޯގެރި ދުއްވަންކަމަށް އެމްޑީޕީގެ ޕީޖީ ލީޑަރ އަދި ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވިދާޅުވެއްޖެއެވެ.
އޭނާ އެފަދައިން ވިދާޅުވި އަންގާރަ ދުވަހު އެމްޑީޕީ އިން ބޭއްވި ނޫސްވެރިންގެ ބައްދަލުވުމުގައެވެ.
މި މަހުގެ 25 ވަނަ ދުވަހު، ބީއެމްއެލްގެ ރުފިޔާ ކާޑުން ކުރެވޭ ޑޮލަރު މުއާމާލާތްތައް ސަސްޕެންޑު ކުރުމަށް ބޭންކުން ކުއްލި ގޮތަކަށް އިއުލާނު ކުރުމަށް ފަހު، އެ ނިންމުން ހަމަ އެ ދުވަހު ވަނީ އުވާލާފައެވެ. ނާޒިލް ވަނީ މި ސަރުކާރުގެ ފުލް މެޖޯރިޓީ ބޭނުންކޮށްގެން މަޖިލީހުން ގަވަރުނަރު އަލީ ހާޝިމް މަޤާމުން ވަކިކުރީ ވެސް ސަރުކާރުން ހަދާ މާލީ ގޯސްތަކާއި ގުޅިގެން ކަމަށް ވިދާޅުވެފައެެވެ.
މާލީ ކަންކަން މެނޭޖްކުރުމުގައި ސަރުކާރަށް އެކަށީގެންވާ ފިޔަވަޅުތަކެއް ނޭނގި ވަރަށް ގިނަ ގޯސްތައް ހަދާފައިވާ ކަަމަށް ނާޒިލް ވިދާޅުވިއެވެ. ނާޒިލް ވަނީ މިއީ ނާގާބިލް ސަރުކާރެއް ކަމަށް ވިދާޅުވެފައެވެ. ސަރުކާރަށް އެއްވެސް ޕްރޮޖެކްޓެއް ނުހިންގޭ ކަމަށާއި ފެއިލްވަމުންދާތަން ފެންނަ ކަމަށް ނާޒިލް ވިދާޅުވިއެވެ. ނާޒިލް ވަނީ ބީއެމްއެލް އާއި މެދު އެފަދަ ތުހުމަތުތަކެއް ކުރުމަކީ ވަރަށް ބޮޑު ކަންބޮޑުވުމެއް ކަމަށް ފާހަގަކުރައްވާފައެވެ.
ބީއެމްއެލް އިން ދޫކޮށްފައިވާ ކާޑުތަކުން ރާއްޖޭން ބޭރުގެ މުއާމަލާތްކުރެވޭ ލިމިޓްތަކަށް ބަދަލުގެނެސް، އެ ބަދަލުތައް އިއުލާނުކުރީ އާދިއްތަ ދުވަހުގެ ހެނދުނުއެވެ. ބޭންކުން މައުލޫމާތު ދިން ގޮތުގައި މި ބަދަލު ގެނެސްފައިވަނީ ކާޑުން ކުރެވޭ ބޭރުގެ މުއާމަލާތްތަކުގެ އަދަދު ދުވަހުން ދުވަހަށް އިތުރުވަމުންދިޔަ ނަމަވެސް ބޭންކަށް ގަންނަން ލިބޭ ބޭރު ފައިސާގެ އަދަދު އެއް މިންވަރެއްގައި ހިފެހެއްޓިފައިވާތީއެވެ.
ރުފިޔާ ކާޑުން ޑޮލަރު ނުލިބޭ ގޮތް ބީއެމްއެލް އިން ހެދުމާ ގުޅިގެން ސީދާ ބަޣާވާތެއް ހިންގަން އުޅުނު ކަމަށް ރައީސް ޑރ. މުހައްމަދު މުއިއްޒު ވަނީ ވިދާޅުވެފައެވެ. ބަޣާވާތެއް ހިންގަން އުޅުނު ކަމުގެ ހެކި ހުރުމުން ފުލުހުން ތަހުގީގު ފަށާފައި ވާކަމަށާއި ފުލުހުން ކުރާނީ ޕްރޮފެޝަނަލް މަސައްކަތެއް ކަމަށާއި، މި ސަރުކާރުން ފުލުހުންގެ އިދާރާއަކަށް އަދި ސިފައިންގެ އިދާރާއަކަށް ސިޔާސީ ނުފޫޒެއް ނުފޯރުވާނެ ކަމަށް ރައީސް މުއިއްޒު ވިދާޅުވިއެވެ.
