ބަޔާން ތަށި ހޯދައިފިނަމަ ކުޅުން ހުއްޓާނުލާނަން: ނޯޔާ

މި ސީޒަނުގެ ޖަރުމަނު ލީގު ބަޔާން މިއުނިކް ކާމިޔާބުކޮށް ޓީމަށް ރަނގަޅު ސީޒަނެއް ނިންމާލެވިއްޖެނަމަ ކުޅުން ހުއްޓާނުލާނެ ކަމަށް ކެޕްޓަން އަދި ގޯލްކީޕަރު މެނުއަލް ނޯޔާ ބުނެފި އެވެ.

އޭނާ މިހެން ބުނީ ހުސްވި ހަފުތާގައި ޖަރުމަނުގެ ގައުމީ ޓީމަށް ކުޅުން ހުއްޓާލުމުން އޭނާ ކުލަބު ކެރިއަރު ކުރިއަށް ގެންދާނެތޯ ނޫސްވެރިން ސުވާލުކުރާތީ އެވެ.

އުމުރުން 38 އަހަރުގެ ކީޕަރު ގައުމީ ޓީމަށް ކުޅުން ހުއްޓާލީ އޭނާ އެންމެ ފަހުން ކުޅުނު ދެ ވޯލްޑްކަޕް ކަމަށްވާ 2018 އާއި 2022ގެ ވޯލްޑްކަޕުގެ ގްރޫޕް ސްޓޭޖުން ފެއިލްވެ މި އަހަރުގެ އަމިއްލަ ގައުމުގައި ބޭއްވި ޔޫރޯގެ ކުއާޓާ ފައިނަލުން ކެޓުުމުންނެވެ. ނަމަވެސް ނޯޔާ ބުނީ އޭނާގެ ކެރިއަރުގެ އެންމެ ހާއްސަ ހަނދާނަކީ 2014 ވަނަ އަހަރުގެ ވޯލްޑްކަޕް ކާމިޔާބު ކުރެވުން ކަމަށާއި މެދުނުކެނޑި ގައުމީ ޓީމުގައި 12 އަހަރު ކުޅެވެމުން އުފާ ކުރާ ކަމަށެވެ.

ގާތްގާތުގައި އަނިޔާވެ ކުރީގެ ފޯމުގައި ގިނަ ދުވަހު ނުހިފެހެއްޓޭ ވާހަކަ އެހުމުން އޭނާ ބުނީ އެކަކު އަބަދު އެއްގޮތަކަށް ނުހުންނާނެ ކަމަށާއި ނަމަވެސް އޭނާގެ ކުޅުން ދަށްނޫން ކަމަށެވެ. އަދި އުއްމީދަކީ ބަޔާނަށް ކާމިޔާބު ހޯދައިދިނުން ކަމަށެވެ.

ޖަރުމަނުގެ ގައުމީ ޓީމަށް 124 މެޗު ކުޅެދިން ކީޕަރު ވަނީ ކެރިއަރުގައި މިހާތަނަށް ބަޔާނަށް 752 މެޗު ކުޅެދީފަ އެވެ.