ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރާ ދެކޮޅަށް ރައްޔިތުން މަގުމައްޗަށް ނުކުންނަ ދުވަސް ވަރަށް ކައިރިވެފައިވާ ކަމަށް ދިވެހިރައްޔިތުން ޑިމޮކްރެޓިކް ޕާޓީ (އެމްޑީޕީ) ގެ ޕާލިމެންޓަރީ ގްރޫޕްގެ ލީޑަރު އަދި ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވިދާޅުވެއްޖެއެވެ.
އާދިއްތަ ދުވަހުގެ ރޭ ކުރިއަށް ގެންދިޔަ އެމްޑީޕީ ގައުމީ މަޖިލީހުގެ ކުއްލި ޖަލްސާގައި މެންބަރު ނާޒިލް ވިދާޅުވީ މި ސަރުކާރުން ކުރަމުންދާ ކަންކަމުގެ ސަބަބުން ރައްޔިތުން ހިތްހަމަނުޖެހި މާޔޫސްވެފައިވާ ކަމަށެވެ. ސަރުކާރާ ދެކޮޅަށް އެމްޑީޕީން މަގުމައްޗަށް ނުނިކުންނަ ސަބަބާ ގުޅޭގޮތުން ވަރަށް ގިނައިން ސުވާލު އަންނަކަން ފާހަގަކުރައްވައި މެންބަރު ނާޒިލް ވިދާޅުވީ މަގު މައްޗަށް ނުކުންނަ ދުވަސް ވަރަށް ކައިރިވެފައިވާ ކަމަށާއި، އެމަންޒަރުތައް ފެންނަމުންދާ ކަމަށެވެ.
މީގެ އިތުރުން މެންބަރު ނާޒިލް ވިދާޅުވީ ޒުވާނުންނަށާއި، ކުދި ވިޔަފާރިތައް ހިންގާ ވިޔަފާރިވެރިންނަށް މިސަރުކާރުން ދަތި ކުރަމުންދާ ކަމަށެވެ. އަދި ބޮޑެތި އަދަދުތަކުން ކަސްޓަމްސްއިން ޑިއުޓީ ނަގަމުންދާ ކަމަށް މެންބަރު ނާޒިލް ވިދާޅުވިއެވެ.
ރައްޔިތުން ބޭނުންވާ ގޮތް މަޑުމަޑުން އަޅުގަނޑުމެންނަށް ވެސް އެބަ ސާފުވޭ ވަރަށް ބޮޑަށް. އެދުވަސް ވެސް ފެންނާނެ. ހަގީގަތުގައި އެދުވަސް ފެންނާނެ. އެއީ މާދަމާކަމެއް އަނެއް ދުވަސް ކަމެއް އަޅުގަނޑަށް އަދި އެހާ ސާފެއް ނުވޭ. އެހެންނަމަވެސް އެދުވަސް ފެންނަން އެހާ ދުރުނޫން ކަމަށް އަޅުގަނޑު ހަމަ ދަންނަވާލަން ބޭނުން. އަޅުގަނޑާ ދިމާވެއްޖެ މިދިޔަ ހަފްތާގައި ތަފާތު އެކި ވިޔަފާރިތަކުގައި އުޅޭ ޒުވާނުންނާ ހާއްސަކޮށް. ރާއްޖެއަށް ކާރު އެތެރެކޮށް ނޫނިއްޔާ ޕިކަޕް އެތެރެކޮށް ހަތަރުފުރޮޅުލީ އެއްޗެހި އެތެރެކޮށް ވިއްކާ ވަރަށް ގިނަ ބޭފުޅުންނާ ބައްދަލު ކުރެވިއްޖެ. އެބޭފުޅުން ގެންނަ ކުދިކުދި ސްޕެއަރތަކަށް ބޮޑު އަގު ޑިއުޓީގެ ގޮތުގައި ކަސްޓަމްސްއަށް ނަގާ ވާހަކަ އެއީ އެބޭފުޅުންގެ ވަރަށް ބޮޑު ކަންބޮޑުވުމެއް. ނިމިދިޔަ 12 ނުވަތަ 15 އަހަރުވެގެން ދިޔައިރު މިއަދާ ހަމައަށް އައިރު ކުރިކަމެއް ނޫން ކަމަށް އެބޭފުޅުން އެ ވިދާޅުވަނީ. މިއީ ވިޔަފާރިތަކަށް ލިބޭ ދެރަ ލިބޭ ނިކަމެތި ކަމެއް. އެ ގެންނަ ކުދިކުދި އެތިކޮޅުން 50 ޑޮލަރުގެ އެއްޗެއް ގެންނައިރު އެބަ ނަގާ އެގާރަސަތޭކަ ރުފިޔާގެ ޑިއުޓީ.އެމްޑީޕީގެ ޕާލިމެންޓަރީ ގްރޫޕްގެ ލީޑަރު އަދި ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް
އިކޮޮނޮމިކް މިނިސްޓަރު މުހައްމަދު ސައީދަށް އިޝާރާތް ކުރައްވައި މެންބަރު ނާޒިލް ވިދާޅުވީ ރާއްޖޭގެ އިގްތިސާދު ކުރިއަށް ގެންދަން ނޭނގޭ ކަމަށާއި، އެބޭފުޅާއަށް މަގު ދެއްކުމަށް ރައީސް މުއިއްޒަށް ވެސް އެހައި ރަނގަޅަށް ނޭނގޭ ކަމަށެވެ.
މެންބަރު ނާޒިލް ވިދާޅުވީ މިސަރުކާރާއެކު ގައުމުގެ ހާލަތު ވަރަށް ބޮޑަށް ދަށްކޮށްލާފައިވާ ކަމަށާއި، ރައްޔިތުންގެ އަތްމަތި ދަތިކޮށްފައިވާ ކަމަށެވެ. އެއްޗެހީގެ އަގު އިންތިހާއަށް ބޮޑުކޮށްފައިވާއިރު، އާމްދަނީ އިތުރުނުވާ ކަމަށާއި، ވިޔަފާރިތައް ބަގުރޫޓު ވަމުންދާ ކަމަށް މެންބަރު ނާޒިލް ވިދާޅުވިއެވެ. މެންބަރު ނާޒިލް ވިދާޅުވީ ރާއްޖޭގެ އެކިއެކި ސިނާއަތްތަކަށް ވެސް ނޭދެވޭ އަސަރުކޮށްފައިވާއިރު، އިމާރާތް ކުރުމުގެ ސިނާއަތް ބޮޑު ތަނުން ބަގުރޫޓުކޮށްފައިވާ ކަމަށެވެ. އަދި ވިދާޅުވީ މިހާލަތުގެ ގޮތުން މުވައްޒަފުންނަށް މާދަމާގެ މުސާރަނުދެވޭ ހާލަތަށް ދިއުމަކީ ދުރުކަމެއް ނޫން ކަމަށެވެ.
