ދިވެހި ރައްޔިތުންނަށް މިއަދު ލިބިފައިވަނީ ދޮގު ހެދުމުގެ ލާމަސީލު ނަމޫނާ ވެރިއެއް: ހުސެއިން ވަހީދު
19 އޯގަސްޓު 2024 | ހޯމަ 09:05ރައީސް މުއިއްޒު ދޮގު ހައްދަވާއިރު، ''ބްލިންކް" ވެސް ކޮށްނުލާ
ޕީއެންއެފް ޖަލްސާގައި ކުރީގެ ޕޮލިސް ކޮމިޝަނަރު ހުސައިން ވަހީދު ވާހަކަދައްކަވަނީ
ދިވެހި ރައްޔިތުންނަށް މިއަދު ލިބިފައިވަނީ ދޮގު ހެދުމުގެ ލާމަސީލު ނަމޫނާ ވެރިއެއް ކަމަށް ކުރީގެ ޕޮލިސް ކޮމިޝަނަރު ހުސައިން ވަހީދު ވިދާޅުވެއްޖެއެވެ.
އާދިއްތަ ދުވަހުގެ ކުރިއަށް ގެންދިޔަ ޕީއެންއެފް ޖަލްސާގައި ހުސެއިން ވަހީދު ވިދާޅުވީ ރައީސް ޑރ.މުހައްމަދު މުއިއްޒުގެ ވީީޑިއޯ ކްލިޕްތަކެއް އެކިއެކި ގައުމުތަކުގައި ދިރިއުޅޭ ރައްޓެހިންނަށް ފޮނުވި ކަމަށެވެ. އަދި ރައީސް މުއިއްޒު އެހައި ފާޅުކަން ބޮޑު ގޮތެއްގައި ދޮގުހައްދަވަން މޮޅުކަން އެމީހުން ވެސް ފާހަގަކޮށްފައިވާ ކަމަށް ހުސެއިން ވަހީދު ވިދާޅުވިއެވެ. އަދި ވިދާޅުވީ ރައީސް މުއިއްޒު ދޮގު ހައްދަވާއިރު، ''ބްލިންކް" ވެސް ކޮށްނުލާކަން ފާހަގަކޮށްފައިވާ ކަމަށެވެ.
ހުސެއިން ވަހީދު ވިދާޅުވީ ރައްޔިތުންނަށް މިއަދު ލިބިފައިވަނީ ދޮގު ހެދުމުގައި ލާމަސީލު ނަމޫނާ ވެރިއެއް ކަމަށާއި، އެކަން ސާބިތުވަމުންދާ ކަމަށެވެ.
ރާއްޖޭގެ ވެރިކަމުގެ ނިޒާމަށް އިޝާރާތް ކުރައްވައި ހުސެއިން ވަހީދު ވިދާޅުވީ ގައުމު ހިންގަންޖެހޭނީ ގާނޫނު އަސާސީއާ އެއްގޮތަށް ކަމަށެވެ. ވެރިކަމަކީ ރިޔާސީ ނިޒާމުން އައިސްވާ ވެރިކަމަށްވާއިރު، އެ ނިޒާމުގެ ތެރެއިން ކަންކަން ކުރިއަށް ގެންދަންޖެހޭ ކަމަށެވެ.
ނަމަވެސް މިހާރު ފެނިގެންދަނީ ޑިކްޓޭޓަރ ޝިޕަކާ ދިމާލަށް ދާ ވެރިކަމެއް ކަމަށާއި، ހުރިހާ ބާރެއް އެއްކޮށް، ހުރިހާ ކަމެއް ކޮންޓްރޯލް ކުރަން އުޅޭ މަންޒަރު ކަަމަށެވެ.
ހުސެއިން ވަހީދު ވިދާޅުވީ މީޑިއާތައް ކޮންޓްރޯލްކޮށް، ރައްޔިތުން މަޖިލީހުގެ މެންބަރުންނަށް މުލިޔާގެއިން ކޮންމެ މަހަކު 50،000 ރުފިޔާ ދޭ ކަމަށް އެ މެންބަރުން ވިދާޅުވަމުން ގެންދަވާ ކަމަށެވެ. އަދި މަސައްކަތް ކުރަނީ މަކަރާ ހީލަތުން ހުރިހާ ކަމެއް ކުރުމަށް ކަމަށް އޭނާ ވިދާޅުވިއެވެ.
