ފްރާންސްގެ ޕެރިހުގައި ކުރިއަށްދާ އޮލިމްޕިކްސްގެ އަންހެން ފުޓުބޯޅަ ފައިނަލްގެ ޖާގަ ބްރެޒިލް އިން ހޯދައިފި އެވެ.

ފައިނަލްގެ ޖާގަ ބްރެޒިލް އިން ހޯދީ ސެމީ ފައިނަލްގައި ސްޕެއިންގެ މައްޗަށް ކުރި ހޯދައިގެންނެވެ. އެ މެޗު ބްރެޒިލް އިން ކާމިޔާބު ކުރީ 4-2 އިންނެވެ. މެޗުގައި ފުރަތަމަ ލަނޑު ޖަހައި ކުރި ހޯދީ ވެސް ބްރެޒިލް އިންނެވެ. މެޗުގައި ބްރެޒިލްގެ ލަނޑުތައް ޖެހީ ގަބީ ޕޯޓިޅޯ، އެޑްރިއާނާ އަދި ކެރޮލިން އެވެ. މެޗުގައި ބްރެޒިލްގެ ފުރަތަމަ ލަނޑަކީ ސްޕެއިންގެ ޕަރޭޑެސް އަތުން ބައި ކޮޅަށް ވަތް ލަނޑެކެވެ.

މެޗުގައި ސްޕެއިންގެ ދެ ލަނޑު ވެސް ޖެހީ ސަލްމާ ޕަރަލުއޭލޯ އެވެ. އެއީ މެޗުގެ 85 ވަނަ މިނެޓާއ،ި ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި އޭނާ ޖެހި ލަނޑުތަކެވެ. މެޗުގައި ސްޕެއިން އަށް ވަނީ އިތުރު ލަނޑު ޖަހާނެ ފުރުސަތުތަކެއް ވެސް ލިބި، ބޭކާރުވެފަ އެވެ.

ގްރޫޕް ސްޓޭޖުގައި ކުޅުނު ތިން މެޗުގެ ތެރެއިން ބްރެޒިލް މޮޅުވީ އެންމެ މެޗަކުންނެވެ. ދެ މެޗުން ބަލިވެފައިވާއިރު، ގްރޫޕް ސްޓޭޖުގައި ވަނީ ސްޕެއިން އަތުން ބަލިވެފަ އެވެ. ކުއާޓާ ފައިނަލްގައި ބްރެޒިލުން ވަނީ ފްރާންސްގެ މައްޗަށް ކުރި ހޯދައިފަ އެވެ. ގްރޫޕް ސްޓޭޖުގައި ކުޅުނު ތިން މެޗު ވެސް ސްޕެއިނުން ވަނީ ކާމިޔާބު ކޮށްފަ އެވެ. ކުއާޓާ ފައިނަލްގައި ސްޕެއިން ވަނީ ކޮލަމްބިއާގެ މައްޗަށް ވެސް ކުރި ހޯދައިފަ އެވެ.