ރިސޯރޓް ވޮލީ ލީގު ޗެމްޕިއަންޝިޕްގެ ޗެމްޕިއަންކަން ވައްކަރު މޯލްޑިވްސް އަށް

މޯލްޑިވްސް ރިސޯރޓް ވޮލީ ލީގު ޗެމްޕިއަންޝިޕްގެ ޗެމްޕިއަންކަން ވައްކަރު މޯލްޑިވްސް ހޯދައިފިއެވެ.

ބ.އަތޮޅުގެ ޗެމްޕިއަން ވައްކަރު މޯލްޑިވްސް ޗެމްޕިއަންކަން ހޯދީ ފައިނަލްގައި މާލެ އަތޮޅު ފޯސީޒަންސް އެޓް ކުޑަހުރައާ ވާދަކޮށް ސީދާ ތިން ސެޓުން މެޗު ކާމިޔާބުކޮށްގެންނެވެ. ކުޑަހުރައާއި ޖެހިގެން އޮތް މާލެ އަތޮޅު ހުރާގައި ކުޅުނު ފައިނަލް މެޗުގެ ސެޓްތައް ވައްކަރު މޯލްޑިވްސްއިން ގެންދިޔައީ 25-17, 25-22 އަދި 25-19 ނެވެ. މެޗުގެ މޮޅު ކުޅުންތެރިއަކީ ވައްކަރު ޓީމްގެ ސްރީލަންކާ ކުޅުންތެރިޔާ ވިދުރާ އެވެ. މުބާރާތުގައި ކުޅުނު އެންމެ މޮޅު ބިދޭސީ ކުޅުންތެރިއަކީ ވެސް އޭނާއެވެ. މުބާރާތުގެ ޑްރީމް ޓީމްގައި ހިމެނުނީ ފޯސީޒަން އެޓް ކުޑަހުރާގެ އަބްދުالله ހަސަން, ހުސައިން ޔޫސުފް, ވައްކަރު މޯލްޑިވްސްގެ މުހައްމަދު ތަހުސީން, މުހައްމަދު ނޫރައްދީން, ޒަކީ, އަދި މުހައްމަދު އަހުސަން އެވެ. މުބާރާތުގެ އެންމެ މޮޅު ކުޅުންތެރިއަކީ ކުރިން ގައުމީ ޓީމްގައި މޮޅަށް ކުޅުނު އަހުސަން އެވެ. އެންމެ މޮޅު ލިބަރޯއަކީ ވައްކަރުގެ ރައްޒާން އެވެ. މުބާރާތުގެ އެންމެ އުއްމީދީ ކުޅުންތެރިއަކީ ފޯސީޒަން އެޓް ކުޑަހުރާގެ ރިއުމާން އެވެ.

މިއީ މޯލްޑިވްސް ވޮލީބޯލް އެކަޑަމީން އިންތިޒާމް ކޮށްގެން ރިސޯރޓްތަކުގެ މެދުގައި ބޭއްވި ފުރަތަމަ ވޮލީބޯޅަ މުބާރާތެވެ. މިމުބާރާތުގައި ކުޅެވެނީ ހަމައެކަނި ރިސޯރޓް މުވައްޒަފުންނަށެވެ.