މި ސަރުކާރުން އިންޑިއާ ސިފައިން ބޭރުކުރިކަމަށް ބުނެ ދައްކަމުންދާ ވާހަކައަކީ "ނޮންސެންސް" ކަމަށާއި، އެއީ ބޮޑު ޖޯކެއްކަމަށް ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެއެވެ.
މިއަދުގެ ސަރުކާރުން އިންޑިއާ ސިފައިން ބޭރު ކުރިކަމަށް ބުނަމުންދާއިރު، އެކަމާ ގުޅިގެން ރާއްޖެޓީވީގެ ފަށާއިރު ޕްރޮގްރާމްގައި ވާހަކަ ދައްކަވަމުން އުމަރު ވިދާޅުވީ، އެއީ ސީދާ ކަނޑައެޅިގެން ދޮގެއް ކަމަށާއި، މިހާރުވެސް އިންޑިއާ ސިފައިން އެބަތިބި ކަމަށެވެ. ބަދަލުވީ ހަމައެކަނި އެމީހުންގެ ޔުނިފޯމްކަމަށް އުމަރު ވިދާޅުވިއެވެ.
އުމަރު ވިދާޅުވީ އިންޑިއާ ސިފައިން ބޭރު ކުރިކަމަށް ދެކެވޭ ވާހަކަތަކަކީ "ބޮޑު ޖޯކެއް" ކަމަށެވެ.
ޖޯކެއް ދެއްތޯ އެއީ، އެއީ ކަނޑައެޅިގެން ދޮގެއް، ނޮންސެންސް އެއީ.ކުރީގެ ހޯމް މިނިސްޓަރު އުމަރު ނަސީރު
ހަގީގީ މާނައިގައި އިންޑިއާ ސިފައިން ބޭރު ކުރަން ބޭނުންވާނަމަ އެކަމަށް ޤާބިލު ވަރުގަދަ ލީޑަރެއް ބޭނުންވާނެކަމަށް އުމަރު ވިދާޅުވިއެވެ.
އުމަރު ވިދާޅުވީ، އިންޑިއާއަކީ ރާއްޖޭގެ މުހިއްމު ބައިވެރިއެއް ކަމަށާއި، ނަމަވެސް އިންޑިއާގެ އަސްކަރިއްޔާއިން ރާއްޖެއިން ފޭބުމަކީ އޭނާވެސް އެދޭ ގޮތް ކަމަށެވެ.
މިސަރުކާރު ވެރިކަމަށް އައީ ރާއްޖޭގައި ގިނަ އަދަދަކަށް އިންޑިއާ ސިފައިން ތިބިކަމަށް ބުނެ ރާއްޖޭގެ މިނިވަންކަމަށް އެކަމުން ބުރޫއަރާކަމަށް ބުނެއެވެ. އަދި ރާއްޖޭގައި ތިބި އިންޑިއާ ސިފައިން ބާލާނެކަމަށް ބުނެ އެ ވައުދާއެކުއެވެ. އެވައުދު ފުއްދުމުގެ ގޮތުން އިންޑިއާ ސިފައިންގެ ބަދަލުގައި މަދަނީ މީހުން ބައިތިއްބާނެ ކަމަކަށް އޭރު ރައީސް ޑރ މުއިއްޒު ވިދާޅުވެފައެއްނުވެއެވެ.
ނަމަވެސް ވެރިކަމަށް ވަޑައިގެންނެވިފަހުން އިންޑިއާ ސިފައިންގެ ބަދަލުގައި ތިބޭނީ މަދަނީން ކަމަށް ސަރުކާރުން ބުނުމުން ގިނަ ބަޔެއްގެ ފާޑުކިޔުން އެކަމަށް ވަނީ އަމާޒުވެފައެވެ.
