އައްޑޫ ސިޓީ ކަރަންޓަށް ދިމާވެފައިވާ މައްސަލަ ހައްލުކުރުމަށް މިސަރުކާރުން އެއްވެސް މަސައްކަތެއް ނުކުރާ ކަމަށާއި، މިސަރުކާރުގެ ބޭފުޅުން އުޅެނީ އެ ވާހަކަ ދައްކާ މީހުންގެ މޫނުން އަސަރު ނުފެންނާތީ ކަންބޮޑުވެގެން ކަމަށް އެމްޑީޕީގެ ޕާލިމެންޓްރީ ގުރޫޕްގެ ޑެޕިއުޓީ ލީޑަރު އަދި ރައްޔިތުން މަޖިލީހުގެ ވައިކަރަދޫ ދާއިރާގެ މެންބަރު ހުސެއިން ޒިޔާދު ވިދާޅުވެއްޖެއެވެ.

ބުރާސްފަތި ދުވަހުގެ ރޭ ބޭއްވި އެމްޑީޕީ ހަރުގެ ޖަލްސާގައި މެންބަރު ޒިޔާދު ވިދާޅުވީ އައްޑޫ ސިޓީއަށް ދިމާވެފައިވާ ކަރަންޓުގެ މައްސަލަ ރަައްޔިތުންގެ މަޖިލީހަށް ހުށަހަޅައި، ދެ ފަހަރެއްގެ މަތިން އެ މައްސަލަ ބަލައިގަނެފައިވާ ކަމަށެވެ.

އެ މައްސަލާގެ ކަންބޮޑުވުން ހިއްސާކޮށް ބަހުސްކުރި ނަމަވެސް ސަރުކާރުގެ ޕީޖީ ލީޑަރު އުޅުއްވަނީ އެ ކަމުގެ ކަންބޮޑުވުން ހިއްސާކުރާ ބޭފުޅުންގެ މޫނުމަތިން އަސަރު ނުފެނިގެން ކަމަށް މެންބަރު ޒިޔާދު ވިދާޅުވިއެވެ. އަދި ވިދާޅުވީ އައްޑޫ ރައްޔިތުންގެ ކަންްބޮޑުވުމަށް ނުބަލާ ކަމަށެވެ.

މީގެ އިތުރުން މެންބަރު ޒިޔާދު ވިދާޅުވީ އައްޑޫއަށް ކަރަންޓުގެ މައްސަލަ މިދިޔަ ރޯދަމަހު އިންޓަކޫލަރު ކިޔާ އެއްޗެއް ހަލާކުވެގެން ކަމަށާއި، އެއީ އެއްލައްކަ ރުފިޔާއަށް ސްރީލަންކާއިން ވެސް ލިބޭ އެއްޗެއް ކަމަށެވެ. ނަމަވެސް ކަރަންޓުގެ މައްސަލަ ހައްލުކުރުމަށް 10 މިލިއަން ރުފިޔާ ބޭނުންވާ ކަމަށް މިހާރުގެ ފެނަކަ އެމްޑީ ވާހަކަދައްކަވާ ކަމަށާއި، މުޅިން ވެސް ދައްކަމުންދަނީ އުދަނގޫ ގޮތްތައް ކަމަށް މެންބަރު ޒިޔާދު ވިދާޅުވިއެވެ.

މެންބަރު ޒިޔާދު ވިދާޅުވީ އައްޑޫ އަކީ ވަރަށް ބޮޑު އާބާދީއެއް ކަމަށާއި، އައްޑޫގައި ވަރަށް ގިނަ ރައްޔިތުން ދިރިއުޅޭ ކަމަށެވެ. ކޮންމެ ކަމެއްގައި ކަރަންޓަށް ބަރޯސާވެފައިވާއިރު، މިމައްސަލައަށް ދާއިމީ އަވަސް ހައްލެއް ހޯދަންޖެހޭ ކަމަށެވެ.