އިމިގްރޭޝަން ވޮޗްއަށް ލިބުނު މައުލޫމާތަކާ ގުޅިގެން މިހާތަނަށް 13 މީހަކު އިމިގްރޭޝަންގެ ބެލުމުގެ ދަށަށް ގެނެސްފި

ގަވައިދާ ޚިލާފަށް އުޅޭ ބިދޭސީން ރިޕޯޓް ކުރުމަށް ލޯންޗުކުރި ޕޯޓަލް "އިމިގްރޭޝަން ވޮޗް" އަށް ލިބުނު މައުލޫމާތަކާ ގުޅިގެން މިހާތަނަށް 13 މީހަކު އިމިގްރޭޝަންގެ ބެލުމުގެ ދަށަށް ގެނެސްފިއެވެ.

އިމިގްރޭޝަނުން ބުނީ ބިދޭސީ ބަޔަކު ހުޅުމާލޭ ގަރާޖެއްގެ މަތީގައި ހިންގަމުންދާ ކާބޯތަކެތި ޑެލިވަރީ ކުރާ ތަނަކާއި ގުޅިގެން ''އިމިގްރޭޝަން ވޮޗް'' އަށް ލިބިފައިވާ މައުލޫމާތާއެކު މިމަހުގެ 18 ވަނަ ދުވަހު އެތަން ބަލައި ފާސްކޮށްފައިވާ ކަމަށެވެ. އެގޮތުން އިމިގްރޭޝަނުން ހާޒިރުވިއިރު ބިދޭސީން ދިޔައީ އެތަން ރޫޅާލާ ހުސްކުރުމުގެ މަސައްކަތް ކުރަމުން ކަމަށެވެ.

އިމިގްރޭޝަނުން ބުނީ ގަވައިދާ ހިލާފަށް ކާބޯތަކެތި ޑެލިވަރީ ކުރާ ތަނުގައި ތިބި ބިދޭސީ 8 މީހަކާއި ގަރާޖުން 3 މީހަކު ބެލުމުގެ ދަށަށް ގެނެވިފައިވާ ކަމަށެވެ.

މީގެ އިތުރުން އިމިގްރޭޝަނުން ބުނީ ގަވާއިދާ ހިލާފަށް ވިޔަފާރި ކުރަމުންދާ ބިދޭސީން ހޯދުމަށް ކުރާ މަސައްކަތުގެ ތެރެއިން، ހުކުރު ދުވަހުގެ ރޭ ހުޅުމާލޭގެ 04 ތަނެއް ބަލައި ފާސްކޮށް، 02 ބިދޭސީ އަންހެނުން ބެލުމުގެ ދަށަށް ގެނެވިފައިވާ ކަމަށެވެ.

އިމިގްރޭޝަނުން ބުނީ ގަވާއިދާ ހިލާފަށް ރާއްޖޭގައި ވިޔަފާރިން ހިންގަމުންދާ ބިދޭސީން ޑީޕޯޓުކުރާނެ ކަމަށެވެ.

އާއްމުންނަށް ރިޕޯޓު ކުރެވޭގޮތަށް ހުޅުވާލި އިމިގްރޭޝަން ވޮޗް ޕްލެޓްފޯމާއެކު މި އޮޕަރޭޝަން ކުރިޔަށް އޮތްތަނުގައި އިތުރަށް ފުޅާވެގެންދާނެ ކަމަށް އިމިގްރޭޝަނުން ބުނެއެވެ.

މި ޕޯޓަލް ލޯންޗުކޮށްފައިވަނީ މިމަހުގެ 17 ވަނަ ދުވަހެވެ.

މި އޮންލައިން ފްލެޓްފޯމާ ގުޅޭގޮތުން ކޮންޓްރޯލަރ ޖެނެރަލް އޮފް އިމިގްރޭޝަން މުހައްމަދު ޝަމްއާން ވިދާޅުވީ ކޮންމެ މީހަކަށް ވެސް ގަވައިދާ ހިލާފަށް އުޅޭ ބިދޭސީންގެ މައްސަލަ ރިޕޯޓު ކުރެވޭނެ ކަމަށާއި، ފޮޓޯއާއި އެހެނިހެން މައުލޫމާތު ވެސް ހިއްސާކުރެވޭނެ ކަމަށެވެ. އަދި މައްސަލަ ހުށަހަޅާ މީހާގެ އައިޑެންޓީ ވެސް ސިއްރުކުރެވޭނެ ކަމަށް އޭނާ ވިދާޅުވިއެވެ.

ގަވައިދާ ހިލާފަށް އުޅޭ ބިދޭސީންގެ މައްސަލަ ހައްލު ކުރުމަށް ހޯމް މިނިސްޓްރީ، ފުލުހުން އަދި އިމިގްރޭޝަން ގުޅިގެން ދަނީ ޚާއްސަ އޮޕަރޭޝަންތަކެއް ކުރިއަށް ގެންދަމުންނެވެ.