ފެނަކައިގެ މުވައްޒަފުންގެ އަތަށް ދޭ ޕެޓީކޭޝް އިން ނަހަމަ ގޮތުގައި ބޭނުންކޮށްފައިވޭ - އޭސީސީ
ބައެއް ޕްރޮޖެކްޓްތައް ބާތިލްކުރަން ނިންމާފައިވާކަމަށް އެކުންފުނިން ވަނީ ބުނެފަ
މަޖިލީހުގެ އެސްއޯއީ ކޮމިޓީގައި އޭސީސީގެ މެމްބަރުން ބައިވެރިވެވަޑައިގަންނަވަނީ
ފެނަކައިގެ މުވައްޒަފުންގެ އަތަށް ދޭ ޕެޓީކޭޝް އިން ނަހަމަގޮތުގައި ބޭނުންކޮށްފައިވާ ކަމަށް އޭސީސީ އިން ބުނެފިއެވެ.
ރައްޔިތުންގެ މަޖިލީހުގެ އިގުތިސާދީ ކޮމިޓީއަށް ވަޑައިގެން އޭސީސީގެ ނައިބު ރައީސް އަބްދުއްސަލާމް ވަނީ ފެނަކަ މުވައްޒަފުން އުސޫލާއި ޚިލާފަށް ކޮށްފައި ހުރިކަމަށް ފާހަގަކުރެވޭ މައްސަލަތަކުގެ ތަފްސީލް ހިއްސާކުރައްވާފައެވެ. ގިނަ ޕްރޮޖެކްޓްތަކުގައި އެފަދަ މައްސަލަތައް ފާހަގަކުރެވޭ ކަމަށާއި ޕެޓީކޭޝް ޑަބަލްކޮށް ބޭނުން ކުރުމާއި އެހެނިހެން ބޭނުންތަކަށް ޕެޓީކޭޝް ބޭނުންކުރަމުންދާ ކަަމަށް އޭނާ ވިދާޅުވިއެވެ. އެފަދަ މައްސަލަތަކުގައި މީހެއްގެ މައްޗަށް ދައުވާކުރުމަށް ފަހު ނިންމާލުމަކީ އޭސީސީގެ ވިސްނުމެއް ނޫން ކަަމަށް އޭނާ ވިދާޅުވިއެވެ. އޭގެ ބަދަލުގައި ދައުލަތަށް ގެއްލެނީ ކިހާ އަދަދެއްގެ ފައިސާއެއްކަން ހޯދުމަށް މަސައްކަތް ކުރަމުންދާކަމަށް ވެސް އޭނާ ވިދާޅުވިއެވެ.
ދައުލަތުގެ ކުންފުނިތަކުން އެއްބާރުލުން ނުލިބުމަކީ ދިމާވާ ބޮޑު ގޮންޖެހުމެއް ކަމަށް އޭނާ ފާހަގަކުރެއްވިއެވެ. އެކަމުގެ ސަބަބުން މައްސަލަތައް ބެލުމުގައި ލަސްވާކަމަށް އޭނާ ވިދާޅުވިއެވެ. ފެނަކަ އާއި ގުޅޭ ގޮތުން 25 މައްސަަލަ ހުށަހަޅާފައި ވާއިރު އޭގެ ތެރޭގައި ކުންފުންޏަށް މުވައްޒަފުން ވެއްދުމާއި ޕްރޮކިއުމެންޓާއި ގުޅޭ މައްސަލަތައް ހިމެނޭކަމަށް އޭސީސީ އިން ވަނީ ބުނެފައެވެ.
ފެނަކަ އާއި ގުޅޭ ކޮރަޕްޝަންގެ މިފަދަ މައްސަލަތަކެއް ބަލަމުންދާއިރު މެންޑޭޓުގައި ނުހިމެނޭ އަދި ގެއްލުންވާގޮތަށް ފެނަކަ ކޯޕަރޭޝަނާ ހަވާލުކޮށްފައިވާ ބައެއް ޕްރޮޖެކްޓްތައް ބާތިލްކުރަން ނިންމާފައިވާކަމަށް އެކުންފުނިން ވަނީ ބުނެފައެވެ.
