ބޯފެން ފެންބަލައި ގޮސް ތިބި އާއިލާ އަކަށް އިޒްރޭލް ސިފައިން ހަމަލާދީ މަރާލައިފި

ގާޒާގައި ބޯފެން ބަހާ މަރުކަޒަކަށް އަމާޒުކޮށް އިޒްރޭލް ސިފައިން ހަމަލާދީ ފެން ބަލައި ގޮސް ތިބި ފަލަސްތީނުގެ އެއް އާއިލާއެއްގެ 5 މެމްބަރުން މަރާލަފިއެވެ. މީގެ ތެރޭގައި ކުޑަކުއްޖަކުވެސް ހިމެނެއެވެ.

އަނެއްކޮޅުން ޝުޖާޔާ ސަރަހައްދަށް އިޒްރޭލް ސިފައިން ވައިގެ މަގުންނާއި އެއްގަމު މަގުން ދެމުންދާ ހަމަލާތަކުގެ ސަބަބުން އެ ސަރަހައްދުން 60،000 ފަލަސްތީން މީހުން މަގު މަތިވެ ވިއްސިވިހާލި ވެފައިވާ ކަމަށާއި، ގާޒާގެ ދެކުނުގައި އޮންނަ އަލް-މަވާސީ ސަރަހައްދަށް އިޒްރޭލް ސިފައިން ދިން ހަމަލާ ތަކުގެ ސަބަބުން އެތައް ބަޔަކު ޒަޚަމްވެ، 5000ށް ވުރެ ގިނަ ފަލަސްތީން މީހުންގެ ގެދޮރު ގެއްލިފައިވާ ކަމަށް އދ. ގެ ތަރުޖަމާނު ސްޓީފަން ޑުޖޯރިކް ވަނީ ހާމަކޮށްފައެވެ.

ހުކުރު ދުވަހުގެ ރޭ ގާޒާގެ ގެދޮރަށް އަމާޒު ކޮށް އިޒްރޭލް ސިފައިން ދިން އެކި ހަމަލާތަކުގައި މަދުވެގެން 6 މީހުން ވަނީ މަރުވެފައެވެ. އޭގެ ތެރޭގައި 4 ކުޑަކުދިން ހިމެނެއެވެ. މި ހަމަލާ ތަކުގައި ޒަޚަމްވި މީހުންގެ އަދަދު މަދުވެގެން 15ށް އަރާ ކަމަށް އަލްޖަޒީރާ އިން ބުނެފައިވެއެވެ.

ފަލަސްތީންގެ ނިއުސް އޭޖެންސީ ވަފާ އިން ބުނެފައިވާ ގޮތުގައި ގާޒާގެ މެދުތެރޭގައި އޮންނަ މަޣާޒީ ރެފިއުޖީ ކޭމްޕަށް ވެސް އިޒްރޭލް ސިފައިން ވަނީ ހަމަލާ ދީފައެވެ. މި ހަމަލާތަކުގައި ވެސް އެތައް ބަޔަކު ވަނީ ޒަޚަމްވެފައެވެ.

އޮކްޓޯބަރު 7 ވަނަ ދުވަހުން ފެށިގެން އިޒްރޭލުގެ އަނިޔާވެރި ހަމަލާތަކުގައި ފަލސްތީނުން މަރުވި މީހުންގެ އަދަދު 37،834ށް ވަނީ މިހާރު އަރާފައެވެ. 86،858 މީހުން މި ހަމަލާތަކުގައި ފަލަސްތީނުން ޒަޚަމްވެފައިވެއެވެ. ފަލަސްތީނުގެ ހަމާސް ޖަމާއަތުން އިޒްރޭލަށް ދިން ހަމަލާގައި މި މުއްދަތުގައި އިޒްރޅުން މަރުވެފައިވަނީ 1،139 މީހުންނެވެ.