ރާއްޖެ އިން ބޭރުގައި ކިޔަވަން ތިބޭ ދިވެހި ދަރިވަރުންނަށް މީގެ ކުރިން 1،000 ޑޮލަރާ ހަމައަށް ޑޮލަރު ގަނެވޭ ގޮތައް ބޭންކް އޮފް މޯލްޑިވްސް (ބީއެމްއެލް) އިން ހަމަޖައްސާފައިވާ އުސޫލަށް ބަދަލު ގެނެސް އެ ދަރިވަރަކު ހުންނަ ގައުމަކަށް ހަޔަރ އެޑިއުކޭޝަން މިނިސްޓްރީން ދޭން ކަނޑައަޅާފައިވާ ސްޓައިޕެންޑަށް ވާ މިންވަރަށް ޑޮލަރު ދޫކުރާ ގޮތައް ހަމަޖައްސާ ބޭރުގައި ކިޔަވަން ތިބޭ ދިވެހި ދަރިވަރުންނަށް އެކަން ބީއެމްއެލް އިން އަންގައިފިއެވެ.

މި ބަދަލާ އެކު ދިވެހި ދަރިވަރުން އެންމެ އާންމުކޮށް ކިޔަވަން ތިބޭ ގައުމުތައް ކަމަށްވާ އިންޑިއާ، ބަންގްލަދޭޝް، މެލޭޝިއާ، ފިލިޕީންސް، ނޭޕާލް، އަދި ތައިލެންޑް ފަދަ ގައުމުތަކުގައި ސްޓައިޕެންޑްގެ ގޮތުގައި ބީއެމްއެލް އިން މަހެއްގެ މައްޗަށް ވިއްކާ ޑޮލަރުގެ އަދަދު 1000ށް ވުރެ މަދުވާނެ ކަން ފާހަގަ ކުރެވެއެވެ.

މިގޮތުން، އިންޑިއާގައި ކިޔަވާ ދަރިވަރަކަށް ދެން މަހެއްގެ މައްޗަށް ގިނަވެގެން ބީއެމްއެލް އިން ގަނެވޭނީ 440 ޑޮލަރެވެ. މެލޭޝިއާ ނަމަ 415 ޑޮލަރެވެ. ބަންގްލަދޭޝްގައި ތިބި ދަރިވަރުންނަށް ވިއްކާނީ 400 ޑޮލަރެވެ. އަދި ތައިލެންޑުގައި ތިބި ދަރިވަރުންނަށް ގަނެވޭނީ 598 ޑޮލަރެވެ. ފިލިޕީންސްގައި ތިބި ދަރިވަރުންނަށް ކަނޑައަޅާފައިވަނީ 450 ޑޮލަރެވެ. ނޭޕާލްގައި ކިޔަވާނަމަ 415 ޑޮލަރު ކަނޑައަޅާފައިވާއިރު، ރަޝިއާގައި ތިބި ދަރިވަރުންނަށް 615 ޑޮލަރު ގަނެވޭނެއެވެ.

ސްޓައިޕެންޑުގެ ގޮތުގައި އެކި ގައުމުތަކަށް ހަޔަރ އެޑިއުކޭޝަން މިނިސްޓްރީން އެކި އަދަދު ކަނޑައަޅާފައިވާއިރު، ބީއެމްއެލް އިން ދަރިވަރުންނަށް ޑޮލަރު ދެން ވިއްކާނީ މިނިސްޓްރީގެ ވެބްސައިޓްގައި އާންމު ކޮށްފައިވާ އަދަދުތަކާ އެއް ގޮތައް ކަމަށް މައުލޫމާތު ލިބިފައިވެއެވެ.

ޑޮލަރު ލިބުމުގެ ތާށިކަން ބީއެމްއެލް އަށް ކުރިމަތިވެފައި މިންވަރު ބޭންކުން އަންނަނީ ފާހަގަ ކުރަމުންނެވެ. އެގޮތުން މޯލްޑިވްސް މަނިޓަރީ އޮތޯރިޓީން ބީއެމްއެލް އަށް ޑޮލަރު ގަންނަން ލިބޭ މިންވަރަށް ވުރެ މާ ބޮޑުތަން އިތުރަށް މިހާރުވެސް ބޭންކުން ކަސްޓަމަރުންނަށް ޑޮލަރު ވިއްކާކަން އެ ބޭންކުން ފާހަގަ ކުރެއެވެ.

ބީއެމްއެލްގެ ސީއީއޯ ކާލް ސްޓުމްކަ މެއި މަހު ބޭއްވި ބޭންކުގެ އަހަރީ އާއްމު ބައްދަލުވުމުގައި ބީއެމްއެލް އަށް ގަންނަން ލިބުނު ޑޮލަރުގެ އަދަދަށް ވުރެ 333 މިލިއަން ޑޮލަރުގެ އިތުރަށް މިހާތަނަށް ބޭންކުން ވިއްކާފައިވާ ކަމަށް ވިދާޅުވިއެވެ. ބޭންކުން ބުނަނީ ގަންނަން ނުލިބޭ މިންވަރަކަށް ޑޮލަރު ވިއްކޭނެ ގޮތެއް ނޯންނާނެ ކަމުގައެވެ.

ދަރިވަރުންނަށް ލިބޭ ޑޮލަރުގެ މިންވަރު ބޮޑުތަނުން ބީއެމްއެލް އިން ދައްކުރި އިރު، ރާއްޖެއިން ބޭރުގައި ކިޔަވަން ތިބޭ ދަރިވަރުންނަށް ބީއެމްއެލްގެ ކްރެޑިޓް އަދި ޑެބިޓް ކާޑުން މަހަކު 1،200 ޑޮލަރު މި އަހަރުގެ ފެބްރުއަރީ މަހުން ފެށިގެން ނެގޭ ގޮތަށް ހަމަޖައްސާނެ ކަމަށް މިދިޔަ އަހަރުގެ ޑިސެމްބަރު މަހު ޑރ. މުއިއްޒުގެ ސަރުކާރުން ބުނި ނަމަވެސް އެކަންވެސް ތަންފީޒު ކޮށްފައެއް ނުވެއެވެ.

މީގެ އިތުރުން ރިޔާސީ ވައުދެއްގެ ގޮތުގައި، ބޭންކް ތަކުން ވިއްކާ ޑޮލާރުގެ ލިމިޓް އުވާލާނެ ކަމަށްވެސް ޑރ. މުއިއްޒު ވަނީ ރިޔާސީ އިންތިޚާބުގައި ވައުދުވެ ވަޑައިގަތްފައެވެ. އެ ވައުދާ ބެހޭ ގޮތުން ސަރުކާރުން އެއްވެސް އެއްޗެއް މިހާތާކަށް ބުނެފައެއް ނުވެއެވެ.