ކޭ-ޕާކު މައްސަލަ: އެއްބަސްވުމާއި ހިލާފުވެފައިވާތީ ދެލައްކައަށްވުރެ ގިނަ ރުފިޔާ ދައްކައި، ފްލެޓު ހަވާލުކުރުމަށް އަންގައިފި
29 މެއި 2024 | ބުދަ 12:22ވަކީލު ހަރަދުގެ ގޮތުގައި 12،000 ރުފިޔާ ދިނުމަށް ވެސް އަމުރުކޮށްފައިވޭ
ހުޅުމާލޭގައި ތަރައްގީކުރަމުން ދާ ކޭ ޕާކު ފްލެޓުތައް
ހަމްބޯ ކޮމްޕެނީ ޕްރައިވެޓް ލިމިޓެޑާއެކު، ކޭޕާކް ރެސިޑެންސްގެ ފްލެޓެއް ގަތުމަށް އަމިއްލަ ފަރާތަކުން ވެފައިވާ އެއްބަސްވުމަކާ އެ ކުންފުނިން ޚިލާފުވެފައިވާތީ، އެމީހާއަށް 2 ލައްކައަށްވުރެ ގިނަ ރުފިޔާ ދައްކައި ފްލެޓް ހަވާލުކުރުމަށް ހަމްބޯ ކުންފުނީގެ މައްޗަށް ސިވިލް ކޯޓުން ހުކުމްކޮށްފިއެވެ.
މި މައްސަލައިގައި ކަން ހިނގާފައިވާ ގޮތަށް ބަލާއިރު، އަލީ ބުޝްރީ ނަމަކަށް ކިޔާ މީހަކު ވަނީ ހަމްބޯ ކޮމްޕެނީ ޕްރައިވެޓް ލިމިޓެޑާއެކު، ކޭޕާކް ރެސިޑެންސްގެ އެޕާޓްމަންޓެއް ގަތުމަށް އެއްބަސްވުމެއްގައި ސޮއިކޮށްފައެވެ.
އޭނާ ކޯޓަށް ހުށަހަޅާފައިވާ މައްސަލައިގައި ވަނީ އެ ކުންފުންނާއި އޭނާއާ ދެމެދު ވެފައިވާ އެއްބަސްވުމުގެ 12 ވަނަ މާއްދާއާއި އެއްގޮތަށް 2022 ވަނަ އަހަރުގެ ޖުލައިގެ ނިޔަލަށް އެޕާޓްމެންޓުގެ މަސައްކަތް ނިންމައި ކުންފުނިން އެޕާޓްމެންޓް ހަވާލުކޮށްފަނުވާ ކަމަށެވެ. އަދި އެޕާޓްމެންޓުގެ މަސައްކަތް ނިންމައި، 30 ދުވަހުގެ ތެރޭގައި އެޕާޓްމެންޓް އޭނާއާ ހަވާލުކޮށް، އެއްބަސްވުމުގައި ބަޔާންކޮށްފައިވާ ތާރީހަށް އެޕާޓްމެންޓް ހަވާލު ނުކުރުމުގެ ސަބަބުން، އޭނާއަށް ލިބިފައިވާ ގެއްލުމުގެ ބަދަލާއި މައްސަލަ ޝަރީއަތަށް ހުށަހަޅަން ޖެހުމުގެ ސަބަބުން ވަކީލުންނަށް ކުރަން ޖެހުނު ހަރަދު ޝަރީއަތް މެދުވެރިކޮށް ހޯދުމަށް ސިވިލް ކޯޓަށް ހުށަހެޅި މައްސަލައިގަ ބުނެފައިވެއެވެ.
އަލީ ބުޝްރީ ވަނީ ގެއްލުމުގެ ބަދަލުގެ ގޮތުގައި 275،000 ރުފިޔާއާއި އެޕާޓްމެންޓް ނިންމައި ހަވާލު ކުރުމާއި ހަމައަށް ކޮންމެ މަހަކު 25،000 ރުފިޔާގެ އިތުރުން މައްސަލަ ކޯޓަށް ހުށަޙަޅަން ޖެހުމުގެ ސަބަބުން ވަކީލަށް ދައްކަން ޖެހުނު ހަރަދުގެ ގޮތުން 50،000 ރުފިޔާ ހޯދުމަށް އެދިފައެވެ.
އަންގާރަ ދުވަހު ސިވިލް ކޯޓުން ކޮށްފައިވާ ހުކުމްގައި ބުނެފައިވަނީ ދެ ފަރާތުން ވެފައިވާ އެއްބަސްވުމުގެ ދަށުން ދައުވާ ކުރާ ފަރާތުން ގަނެފައިވާ އެޕާޓްމެންޓުގެ މަސައްކަތް ނިންމައި، 30 ދުވަހުގެ ތެރޭގައި ވެރިފަރާތާއި ހަވާލު ކުރުމަށާއި ގެއްލުމުގެ ބަދަލުގެ ގޮތުގައި 275،000 ރުފިޔާ އާއި އެޕާޓްމެންޓް ނިމެންދެން ކޮންމެ މަހަކަށް 25،000 ރުފިޔާ ދައުވާ ކުރި ފަރާތަށް ދެއްކުމަށެވެ.
މީގެ އިތުރުން ވަކީލު ހަރަދުގެ ގޮތުގައި 12،000 ރުފިޔާ ދިނުމަށް ވެސް އަމުރުކޮށްފައިވެއެވެ.
ކުންފުނީގެ ގައިރު ހާޒިރުގައި ހުކުމްކޮށްފައިވާއިރު، މިމައްސަލަ ބެއްލެވީ ގާޒީ މުހައްމަދު އީސާ ފުޅެވެ. މިމައްސަލާގައި ދައުވާ ލިބޭ ފަރާތުން ދިފާއު ހުށަހެޅުމުގެ 14 ދުވަސް ހަމަވިއިރު ވެސް ރައްދެއް ހުށަހަޅާފައިނުވެއެވެ.
ހަންބޯ މޯލްޑިވްސްގެ ނަމުގައި ހަދާފައިވާ ފޯޖު ލިޔުންތަކެއް ބޭނުން ކޮށްގެން، މަކަރާއި ހީލަތުން އެޕާޓްމަންޓުތައް ވިއްކައި, ފައިސާއަށް ހިޔާނާތްތެރިވި ކަމަށް ތުހުމަތުކުރާ މައްސަލައެއް ފެންމަތިވެފައިވާއިރު، މި މައްސަލާގައި ގިނަ ތުހުމަތުތަކެއް އަމާޒުވެފައިވާ ހަސަން މަމްދޫހު (މަންޑޭ) ދިރިއުޅޭ އެޕާޓުމަންޓު، ބަލައި ފާސްކޮށް އެގެއިން ބައެއް ތަކެތި ފުލުހުންގެ ބެލުމުގެދަށަށް ވަނީ ގެންގޮސްފައެވެ.
މަންޑޭއަކީ އެ ކުންފުނީގެ ދިވެހި ހިއްސާދާރެވެ.
މިމައްސަލައާ ގުޅިގެން މަންޑޭގެ މައްޗަށް މިހާތަނަށް 104 ދައުވާ، އަދި ޖައިޝާން ސައީދުގެ މައްޗަށް 97 ދައުވާކޮށް، 12 ޑިސެންބަރު 2023ގައި ކްރިމިނަލް ކޯޓަށް ވަނީ ހުށަހަޅާފައެވެ.
ޕީޖީން ބުނީ، ދައުވާކޮށްފައިމިވަނީ ކޭ-ޕާކް ރެޒިޑެންސްގެ ޖުމްލަ 23 އެޕާޓްމަންޓެއް ވިއްކާފައިވާ މައްސަލަތަކާގުޅޭ ދައުވާތައް ކަމަށެވެ. މި 23 އެޕަރޓްމަންޓް 50 މީހުންނަށްވުރެ ގިނަ މީހުންނަށް ވިއްކާފައިވާ ކަމަށެވެ. އެގޮތުން ބައެއް އެޕާޓްމަންޓް 6 މީހުންނަށްވެސް ވިއްކާފައި އެބަހުއްޓެވެ. އަދި މި ސްކީމާގުޅޭ އިތުރު ބައިތައް ދިވެހި ފުލުހުންގެ ޚިދުމަތުން ދަނީ ތަހުގީގުކުރަމުން ކަމަށް ޕީޖީން ބުނެއެވެ.
