ރެއާލްގައި ރިޓަޔާވުމަކީ ވަރަށް ބޮޑު ހުވަފެނެއް: މޮޑްރިޗް

ސްޕެއިންގެ ރެއާލް މެޑްރިޑުގައި ރިޓަޔާވުމަކީ އޭނާގެ ވަރަށް ބޮޑު ހުވަފެނެއް ކަމަށް، އެ ޓީމަށް ކުޅެމުން އަންނަ ކްރޮއޭޝިއާގެ ލޫކާ މޮޑްރިޗް ބުނެފި އެވެ.

އުމުރުން 38 އަހަރުގެ ކުޅުންތެރިޔާ މިހެން ބުނީ، ރެއާލްގައި އޭނާގެ ކުރިމަގާ ގުޅޭ ގޮތުން ވާހަކަ ދައްކަމުންނެވެ. ރެއާލާއެކު މޮޑްރިޗް ހަދާފައިވާ އެއްބަސްވުމުގެ މުއްދަތު ހަމަވާނީ މި ސީޒަންގެ ނިޔަލަށެވެ. އެހެން ނަމަވެސް ރެއާލްގައި މަޑު ކުރަން ބޭނުންވާކަން މޮޑްރިޗް އޮތީ ކުލަބަށް އަންގައިފަ އެވެ. އެހެންކަމުން ރެއާލުން ވަނީ އައު އެއްބަސްވުމެއްގެ މަޝްވަރާތައް މޮޑްރިޗާ އެކު ފަށައިފަ އެވެ.

މޮޑްރިޗް ބުނީ އޭނާގެ މުސްތަޤުބަލާމެދު މިހާރު އޮތީ ގޮތެއް ފައިނަލްވެ، ނިމިފައި ކަމަށެވެ. އެހެން ނަމަވެސް، އެއީ ކޮން ގޮތެއްކަން މިވަގުތު ހާމަކުރެވެން ނެތް ކަމުގައި ވެސް މޮޑްރިޗް ބުންޏެވެ. ވަކި ސަބަބެއް ނުބުނެ މޮޑްރިޗް ބުނީ، އެކަމަށް އެންމެ އެކަށީގެންވާ ވަގުތުގައި އެކަން ހާމަވެގެން ދާނެ ކަމަށެވެ.

މީގެ އިތުރުން މޮޑްރިޗް ބުނީ، އަބަދު ވެސް އޭނާ ބުނަމުން އަންނަހެން، ރެއާލްގައި ހުރެ ރިޓަޔާވުމަކީ އޭނާ އެންމެ ބޭނުންވާ ގޮތް ކަމަށެވެ. އަދި އެއީ އޭނާގެ ކެރިއަރުގައި ޙާސިލު ކުރަން ބޭނުންވާ ކަމެއްގެ ގޮތުގައި މޮޑްރިޗް ވަނީ ފާހަގަކޮށްފަ އެވެ. އެކަމަކީ އޭނާގެ ވަރަށް ބޮޑު ހުވަފަނެއް އަދި އުންމީދެއްކަން ވެސް ފާހަގަކުރަމުން މޮޑްރިޗް ބުނީ، އޭނާ ބޭނުން ވަނީ ޓޯނީ ކްރޫސް އަށް ދިން ކަހަލަ ފެއާވެލްއެއް ކަމަށެވެ.

ޓޮޓެންހަމް ދޫކޮށްލުމަށްފަހު މޮޑްރިޗް ރެއާލަށް ބަދަލުވީ 2012 ވަނަ އަހަރު އެވެ. އޭގެ ފަހުން މިވީ މުއްދަތުގައި އޭނާ ވަނީ ރެއާލަށް 533 މެޗު ކުޅެދީ، 39 ލަނޑު ޖަހައިދީފަ އެވެ. ރެއާލާ އެކު މޮޑްރިޗް ވަނީ، 25 ތައްޓެއް ކާމިޔާބު ކޮށްފަ އެވެ. އޭގެ ތެރޭގައި ސްޕެނިޝް ލީގު ހަތަރު ފަހަރު އަދި ޔުއެފާ ޗެމްޕިއަންސް ލީގު ފަސް ފަހަރު ކާމިޔާބު ކުރުން ހިމެނެ އެވެ.

މީގެ އިތުރުން މޮޑްރިޗް ވަނީ ފްރާންސް ފުޓުބޯޅަ އިން ދުނިޔޭގެ އެންމެ މޮޅު ކުޅުންތެރިޔާ އަށް ދެމުން އަންނަ ބެލެންޑިއޯ އެވޯޑު 2018 ވަނަ އަހަރު ކާމިޔާބު ކޮށްފަ އެވެ. މޮޑްރިޗް އަކީ، ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ އާއި އާޖެންޓީނާގެ ކެޕްޓަން ލިއޮނަލް މެސީ ފަހަތަށް ޖައްސާލުމަށްފަހު، ބެލެންޑިއޯ އެވޯޑު ކާމިޔާބު ކުރި ފުރަތަމަ ކުޅުންތެރިޔާ އެވެ.