ކުވޭތުގެ އަމީރު އެ ގައުމުގެ ގާނޫނު ހަދާ މަޖިލިސް އުވާލައްވައި އައު ކެބިނެޓެއް އައްޔަން ކުރައްވައިފި
13 މެއި 2024 | ހޯމަ 19:20މިއީ މި އަހަރުގެ ތެރޭގައި ކުވޭތުގެ ގާނޫނު ހަދާ މަޖިލިސް އުވާލި ދެވަނަ ފަހަރު
ކުވޭތުގެ ޤާނޫނު ހަދާ މަޖިލިސް
ކުވޭތުގެ އަމީރު ނެރުއްވި ގަރާރަކުން، އާދިއްތަ ދުވަހު އެ ގައުމުގެ ގާނޫނު ހަދާ މަޖިލިސް އުވާލައްވައި އައު ކެބިނެޓެއް އައްޔަން ކުރައްވައިފިއެވެ.
ބޮޑުވަޒީރު ކަމުގައި ހުންނެވީ އޭޕްރީލް މަހު އެ މަގާމަށް އިސްކުރެވުނު ޝެއިޚް އަހްމަދު އަބްދުﷲ އައް ސަބާހް އެވެ.
ކެބިނެޓަށް ބަދަލު ގެންނެވި ނަމަވެސް ތެލާބެހޭ ވަޒީރާއި، މާލީ ވަޒީރު އަދި ޚާރިޖީ ވަޒީރުގެ މަގާމުގައި ތިއްބެވީ ކުރިންވެސް އެ މަގާމުތަކުގައި ތިއްބެވި ބޭފުޅުންނެވެ.
ކުވޭތުގެ ގާނޫނު ހަދާ މަޖިލިސް ހުކުރު ދުވަހު އެ ގައުމުގެ އަމީރު އުވާލެއްވީ، ސަރުކާރާ ގާނޫނު ހަދާ މަޖިލިހާ ދެމެދު އުފެދިފައިވާ މައްސަލަތައް ގޯސްވެފައިވާ ދަނޑިވަޅެއްގައެވެ.
ގާނޫނު ހަދާ މަޖިލިސް އުވާލީ ވަކި މުއްދަތެއް ނެތް ގޮތެއްގައެވެ.
ގާނޫނު ހަދާ މަޖިލިސް އުވާލެއްވުމުގެ އިތުރުން ކުވޭތުގެ އަމީރު ވަނީ ގާނޫނު އަސާސީގައި، މަޖިލީހެއް އުވާލާތާ 2 މަސް ދުވަހުގެ ތެރޭގައި އިންތިޚާބު ބާއްވަން ޖެހޭ ގޮތައް އޮންނަ މާއްދާ ވެސް ސަސްޕެންޑް ކުރައްވާފައެވެ.
މިއީ މި އަހަރުގެ ތެރޭގައި ކުވޭތުގެ ގާނޫނު ހަދާ މަޖިލިސް އުވާލި ދެވަނަ ފަހަރެވެ.
