ހަސަން ޒަކަރިއްޔާ އިލެކްޝަންސް ކޮމިޝަންގެ މެންބަރަކަށް އައްޔަން ކުރުމަށް ފާސްކޮށްފި

އިލެކްޝަންސް ކޮމިޝަންގެ ސެކްރެޓަރީ ޖެނެރަލްގެ މަގާމުގައި ހުންނެވި ހަސަން ޒަކަރިއްޔާ އެ ކޮމިޝަންގެ މެންބަރުކަމުގެ މަގާމަށް އައްޔަން ކުރަން ފާސްކޮށްފިއެވެ.

ހަސަން ޒަކަރިއްޔާގެ ނަން މަޖިލީހަށް ފޮނުއްވެވީ މިދިޔަ ފެބްރުއަރީ މަހުގެ 20ގައެވެ.

ގާނޫނު ނަންބަރު 8/2008، އިލެކްޝަންސް ކޮމިޝަންގެ ގާނޫނު (ގެ 4 ވަނަ މާއްދާގެ (ރ) ގައިވާ ގޮތުގެ މަތިން އިލެކްޝަންސް ކޮމިޝަނުގެ މެންބަރުކަމަށް މ. މުލައް މުޝްތަރީގޭ ޙަސަން ޒަކަރިއްޔާ އައްޔަންކުރުމާ މެދު ގޮތެއް ނިންމުމަށް މަޖިލީހަށް ފޮނުވި މައްސަލައިގައި ހޯމަ ދުވަހުގެ ޖަލްސާގައި ވޯޓަށް އަހާފައެވެ.

އީސީގެ މެންބަރުކަމަށް ހަސަން ޒަކަރިއްޔާގެ ނަން މަޖިލީހުން ފާސްކޮށްފައިވަނީ ވޯޓުގައި ބައިވެރިވި 39 މެންބަރުންގެ އިއްތިފާގުންނެވެ.

ހަސަން ޒަކަރިއްޔާ އިލެކްޝަންސް ކޮމިޝަންގެ މެންބަރުކަމަށް އައްޔަންކޮށްފައިވަނީ، އެ ކޮމިޝަންގެ ނައިބުރައީސްކަމުގެ މަގާމުގައި ހުންނެވި އިސްމާއިލް ހަބީބުގެ ދައުރު މިދިޔަ މަހުގެ 13 ގައި ހަމަވުމާ ގުޅިގެންނެވެ. އޭނާ އީސީގައި ދެ ދައުރު މަސައްކަތްކުރައްވާފައި ވާތީ، ގާނޫނު ބުނާ ގޮތުން އިދުރު ދައުރެއް އަދައެއް ނުކުރެވޭނެއެވެ.

އިލެކްޝަންސް ކޮމިޝަންގެ ސެކްރެޓަރީ ޖެނަރަލްގެ މަގާމަށް ހަސަން ޒަކަރިއްޔާ އައްޔަންކޮށްފައިވަނީ ޖޫން 20221 ގައެވެ. އޭގެ ކުރިން ހުންނެވީ އިލެކްޝަންސް ކޮމިޝަންގެ ޑިރެކްޓަރެއްގެ މަގާމުގައެވެ. އަދި އެސްޖީއަކަށް އައްޔަން ކުރުމުގެ ކުރިން ދެ އަހަރެއްހާ ދުވަހު ކޮމިޝަންގެ ވަގުތީ ސެކްރެޓަރީ ޖެނަރަލްގެ ޒިންމާވެސް ނެންގެވީ ހަސަންއެވެ.