އެޑަސަން ބްރެޒިލް ޓީމުން ބާކީވެ، އާސެނަލް މެޗާމެދު ޝައްކު!
ބްރެޒިލް، އިނގިރޭސިންނާއިން ސްޕޭނާ ދެކޮޅަށް ކުޅޭ މެޗުގައި އޭނާ އަށް ނުކުޅެވޭނެ
މެންޗެސްޓާ ސިޓީގެ ކީޕަރު އެޑަސަން، ލިވަޕޫލް މެޗުގައި އަނިޔާވުމުން އޮށޯވެގެން
މެންޗެސްޓާ ސިޓީގެ ގޯލްކީޕަރު އެޑަސަން އަށް ބްރެޒިލްގެ ގައުމީ ޓީމުގެ ކުރިއަށް އޮތް ދެ މެޗާއި އިނގިރޭސި ޕްރެމިއާ ލީގުގައި ސިޓީ، އާސެނަލްއާ ދެކޮޅަށް ކުޅެވޭނެ ކަމާމެދު ޝައްކު އުފެދިއްޖެ އެވެ.
ސިޓީން ބުނީ އެޑަސަން އަށް ލިވަޕޫލާ ދެކޮޅަށް އެ ޓީމު އާދީއްތަ ދުވަހުގެ ރޭ ކުޅުނު މެޗުގައި ލިބުނު ހާނިއްކަ ރަނގަޅުވާން ތިނެއް ނުވަތަ ހަތަރު ހަފުތާ ބޭނުންވާނެ ކަމަށެވެ. މި މެޗުގެ ފަހުހާފު ފެށުނުތަކާ އެޑަސަން ބާލަންޖެހުނީ ލިވަޕޫލްގެ ބްރެހަމް ޑިއާޒް އަތުން ބޯޅަ ހޯދަން އުޅެނިކޮށް ކުރި ފައުލާއެކު ފަޔަށް ތަދުވުމުގެ ސަބަބުންނެވެ.
މިހާނިއްކައިގެ ސަބަބުން މާޗު 23ގައި އިނގިރޭސިވިލާތާ ދެކޮޅަށް އަދި އޭގެ ހަތަރު ދުވަސް ފަހުން ސްޕޭނާ ދެކޮޅަށް ބްރެޒިލް ކުޅޭ ރަހުމަތްތެރިކަމުގެ މެޗުގައި އެޑަސަން އަށް ނުކުޅެވޭނެ އެވެ. ބްރެޒިލްގެ އައު ކޯޗު ޑްރިވޯލް ޖޫނިއާ ބުނީ މިއީ އެއްވަނަ ކީޕަރު ލިވަޕޫލްގެ އަލިސަން ބެކާ ނެތްވަގުތެއްގައި ޓީމަށް ކުރިމަތިވި އިތުރު ކަންބޮޑުވުމެއް ކަމަށެވެ.
ސިޓީން ބުނީ ޓޭބަލުގެ އެއްވަނާގައި މިވަގުތު އާސެނަލްއާ ދެކޮޅަށް އެޑަސަން ފިޓްވާނެ ކަމާމެދު ޝައްކު ކަމަށެވެ. އަދި އޭނާ ނެތި ކުޅެން ޖެހުމަކީ ސިޓީއަށް ދިމާވާނެ ދަތިކަމެއް ކަމަށާއި އެޑަސަން އަލުން ކުޅެން ނުކުތުމަށް ބޭނުންވާ ހުރިހާ އެހީތެރިކަމެއް ކުލަބުންދޭނެ ކަމަށެވެ.
އެޑަސަން އަކީ ފާއިތުވެދިޔަ ހައެއްކަ އަހަރު ސިޓީން ހޯދި ކާމިޔާބީތަކުގައި އެންމެ މުހިންމު ދައުރު ކުޅުނު އެއް ކުޅުންތެރިޔާ އެވެ.
