ފަރުވާ ފުރިހަމަކުރިކަމުގެ ލިޔުން ދޫކުރިކަމުގެ މައްސަލައިގައި މަނީ ލޯންޑަރިންގެ ތުހުމަތާއެކު މައްސަލަ ތަހުގީގުކުރަނީ

ނެޝަނަލް ޑްރަގް އެޖެންސީން ފަރުވާ ފުރިހަމަކުރިކަމުގެ ވަގު ލިޔުން ދޫކުރިކަމުގެ މައްސަލައިގައި މަނީ ލޯންޑަރިންގެ ތުހުމަތާއެކު މައްސަލަ ބަލަން ފަށައިފިއެވެ.

ހޯމް މިނިސްޓްރީގެ ދަށުން ހިންގާ އިދާރާތަކުން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޑެޕިއުޓީ ކަމިޝަނާ އޮފް ޕޮލިސް އިސްމާއީލް ނަވީން ވިދާޅުވީ ނެޝަނަލް ޑްރަގް އެޖެންސީން ދެމުންދާ ފަރުވާގެ އެސެސްމަންޓް ރިވިއުކުރުމުގައި އެޖެންސީގެ ބައެއް އިސް މުވައްޒަފުންނާއި، އިތުރު ބަޔަކު ގުޅިގެން އެންޑީއޭގެ ލެބޯޓަރީން ހަދާ ޓެސްޓްތައް ނަތީޖާ އޮޅުވާލާ ފަރުވާ ފުރިހަމަ ކުރަންޖެހޭ މީހުން ފަރުވާ ފުރިހަމަ ކުރަން ނުޖެހޭ ގޮތަށް ބަދަލުކޮށް އަދި ފަރުވާ ފުރިހަމަކުރަންޖެހޭ މުއްދަތު ކުރުކޮށް މުޖްތަމައުއަށް ދޫކޮށްލާފައިވާ ކަމަށެވެ.

މީގެ އިތުރުން ފަރުވާ ފުރިހަމަކުރަންޖެހޭ މީހުން އަތުން މަގާމުގެ ނުފޫޒު ބޭނުންކޮށްގެން ގިނަ އަދަދެއްގެ ފައިސާ ރިޝްވަތުގެ ގޮތުގައި ހޯދާ، ގިނަ އަދަދެއްގެ ފައިސާ ލޯންޑަރ ކުރެވޭކަމަށް ތުހުމަތުކުރެވޭ މައްސަލަ ފުލުހުން ބަލަމުން އަންނަ ކަމަށެވެ. ނަމަވެސް ލޯންޑަރުކުރި ކަމަށް ތުހުމަތުކުރާ ފައިސާގެ އަދަދެއް ހާމައެއް ނުކުރެއެވެ.

އަދި މި މައްސަލައިގެ ތަހުގީގު ފުލުހުން ފަށާފައި ވާއިރު، ލިބިފައިވާ މައުލޫމާތާއެކު 6 ފެބްރުއަރީން ފެށިގެން މި މައްސަލައިގެ މަސައްކަތް ކުރަމުން އަންނަ ކަމަށް ނަވީން ވިދާޅުވިއެވެ. އަދި މައްސަލައިގެ ހިމެނޭ 2 މީހަކު ދިރިއުޅޭ 3 ތަނާއި، މާލޭގައި ހުންނަ އެންޑީއޭގެ ތަންތަން ބަލާ ފާސްކޮށްފައިވެއެވެ.

މި މައްސަލައިގައި ހިމެނޭ ދެ މުވައްޒަފުން ހައްޔަރުކުރިކަމެއް ނުވަތަ ނޫންކަމެއް ފުލުހުން ހާމައެއް ނުކުރެއެވެ. އަދި އެ ދެ މުވައްޒަފުންނާއި މެދު ފިޔަވަޅު އެޅިކަމެއް އަދި ނާޅާކަމެއް ވެސް ނޭނގެއެވެ.

ފަރުވާ ނިމުނު ކަމަށް ބުނެ ސައްހަ ނޫން ލިޔުންތަކެއް ވިޔަފާރި އުސޫލުން ވިއްކުމުގެ ތުހުމަތުގައި އެންޑީއޭގެ ދެ މުވައްޒަފަކު ހައްޔަރުކޮށްފައިވާ ކަމަށް ބައެއް ނޫސްތަކުން ރިޕޯޓްކޮށްފައިވާއިރު، އެންޑީއޭއިން ވަނީ އެކަން ދޮގުކޮށްފައެވެ.