4 މެޗުންވެސް މޮޅުވެ، މަސްއޮޑި އަށް ގްރޫޕްގެ އެއްވަނަ
ކުޑަހެންވޭރަށް ކުއާޓާގެ ފުރުޞަތު އެބައޮތް
ލަނޑުޖެހުމަށްފަހު މަސްއޮޑީގެ ހުސެއިން ޝަރީފް އުފާފާޅުކުރަނީ
ކުޅުނު ހަތަރު މެޗުންވެސް މޮޅުވެ, މަސްއޮޑި ސްޕޯރޓްސް ކްލަބް ގްރޫޕްގެ އެއްވަނަ ކަށަވަރުކޮށްފި އެވެ.
ދެވަނަ ޑިވިޝަން ފުޓްބޯޅަ މުބާރާތުގައި އެންމެ ފުރަތަމަ ކުއާޓާ ފައިނަލް ޔަގީންކުރި މަސްއޮޑިން ވަނީ ގްރޫޕް ސްޓޭޖްގައި ކުޅުނު ހަތަރު މެޗުންވެސް މޮޅުވެ 12 ޕޮއިންޓު ހޯދާފައެވެ. ގްރޫޕް ސްޓޭޖްގެ ފަހު މެޗުގައި ކުޑަހެންވޭރު ބަލިކުރީ 1-0 ނެވެ. މެޗުން މޮޅުކޮށްދިން ލަނޑު ޖެހީ ހުސެއިން ޝަރީފް އެވެ. އޭނާ ލަނޑު ޖެހީ މެޗުގެ ފުރަތަމަ ހާފް ނިމެން ހަތް މިނެޓަށް ވެފައި ވަނިކޮށެވެ.
މަސްއޮޑީގެ އިތުރުން ކުއާޓާ ފައިނަލް ޔަގީންކޮށްފައި ވަނީ ވިކްޓްރީއާއި ޓެންޓް ސްޕޯރޓްސް ކްލަބެވެ. މަސްއޮޑި އަތުން ބަލިވިޔަސް ދެވަނަ ޓީމްގެ ގޮތުގައި ކުއާޓާ ފައިނަލަށް ދަތުރުކުރުމުގެ ފުރުޞަތު ކުޑަހެންވެއިރަށް އެބައޮތެވެ. އެ ޓީމް ވަނީ ތިން މެޗުގެ ތެރެއިން ދެ މެޗު ކާމިޔާބުކޮށްފައެވެ. ގްރޫޕް ސްޓޭޖްގެ ފަހު މެޗުގައި ވާދަކުރާނީ މަހިބަދޫ އާއެވެ. އެމެޗުން މޮޅުވާ ޓީމަކަށް ކުއާޓާ ފައިނަލް ޔަގީން ވާނެއެވެ.
