މިދިޔަ މަހު ޑެންގީއާއި ބޭރަށް ހިންގުން ޖެހުނު މިންވަރު މަދުވި ނަމަވެސް އަރިދަފުސް ރޯގާ ޖެހިގެން ރިޕޯޓު ކުރި އަދަދު އިތުރު
12 ޖެނުއަރީ 2024 | ހުކުރު 03:07ޑިސެންބަރު މަހު އަރިދަފުސްރޯގާގެ 31225 ކޭސް ރިޕޯޓުކޮށްފައިވޭ
ބަލިތަކުން ރައްކާތެރިވުމަށް މާސްކް އެޅުމަކީ މުހިންމު ކަމެއް
މިދިޔަ މަހު ޑެންގީ ހުމާއި، ބޭރަށް ހިންގުން ޖެހުނު މިންވަރު މަދުވި ނަމަވެސް އަރިދަފުސް ރޯގާ ޖެހިގެން ރިޕޯޓު ކުރި އަދަދު އިތުރު ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބުނެފިއެވެ.
އެޗްޕީއޭއިން ބުނީ 2023ގެ ނޮވެންބަރު މަހާ އަޅާބަލާއިރު ޑިސެންބަރު މަހު ޑެންގީހުން ޖެހިގެން ރިޕޯޓު ކުރެވުނު އަދަދު ވަނީ ދަށަށް ގޮސްފައިވާ ކަމަށެވެ. އެގޮތުން ނޮވެންބަރުގައި 210 ކޭސް، ޑިސެންބަރުގައި 194 ކޭސް ރިޕޯޓުކޮށްފައިވެއެވެ.
އަރިދަފުސް ރޯގާ ޖެހިގެން ނޮވެންބަރު މަހު 30410 ކޭސް، ޑިސެންބަރު މަހު 31225 ކޭސް ރިޕޯޓުކޮށްފައިވާ ކަމަށް އެޗްޕީއޭއިން ބުނެއެވެ. އަދި ނޮވެންބަރު މަހާ އަޅާބަލާއިރު ޑިސެންބަރު މަހު އަރިދަފުސް ރޯގާ ޖެހިގެން ރިޕޯޓު ކުރެވުނު އަދަދު މައްޗަށް ގޮސްފައިވާތީ ކޮވިޑް އަދި އިންފްލުއެންޒާ ފަދަ ރޯގާތަކުން ރައްކާތެރިވުމުގެ ފިޔަވަޅުތައް އެޅުމަށް އެޗްޕީއޭއިން ވަނީ އިލްތިމާސްކޮށްފައެވެ.
އެޗްޕީއޭއިން ބުނީ އިންފްލުއެންޒާގެ އަލާމާތްތައް ހުރެގެން ޓެސްޓް ކުރެވުނު އަދަދު އިތުރުވެފައިވާ ކަމަށެވެ. އަދި މިއަހަރުގެ މިހާތަނަށް ޓެސްޓް ކުރެވުނު 2380 ސާމްޕަލްގެ ތެރެއިން 413 ސާމްޕަލް ޕޮޒިޓިވްވެފައިވާ ކަމަށް އެޗްޕީއޭއިން ބުނެއެވެ.
މީގެ އިތުރުން އެޗްޕީއޭއިން ބުނީ 2023ގެ ނޮވެންބަރު މަހާ އަޅާބަލާއިރު ޑިސެންބަރު މަހު ބޭރަށް ހިންގުން ޖެހިގެން ރިޕޯޓު ކުރެވުނު އަދަދު ވަނީ ދަށަށް ގޮސްފައިވާ ކަމަށެވެ. ނޮވެންބަރު މަހު 5063 ކޭސް، ޑިސެންބަރު މަހު 3486 ކޭސް ރިޕޯޓުކޮށްފައިވާ ކަމަށް އެޗްޕީއޭއިން ބުނެއެވެ.
އެޗްޕީއޭއިން ބުނީ މަދިރީގެ ޒަރިއްޔާއިން ފެތުރޭ ބަލިތައް ކޮންޓްރޯލް ކުރުމަށް މަދިރި އުފެދޭ ތަންތަން ނައްތާލައި ސާފުތާހިރު ކަމަށް ޚާއްސަ ސަމާލުކަމެއްދޭން ޖެހޭ ކަމަށެވެ. އަދި ބަލި ޖެހިފައިވާނަމަ މީހުން އެއްވެ އުޅޭ ތަންތަނަށް ނުދިނުމަށާއި މާސްކް އެޅުމަށާއި ބަލިން ރައްކާތެރިވުމުގެ ފިޔަވަޅުތައް އެޅުމަށް ވަނީ އިލްތިމާސްކޮށްފައެވެ.
