މަސްތުވާތަކެއްޗާއި ބަނގުރާ ދައުރުކުރުުން ހުއްޓުވުމަށާއި މާލޭގެ ޓްރެފިކް ބެލެހެއްޓުމަށް ފިޔަވަޅުތަކެއް އަޅަނީ
ހުޅުމާލޭގެ ފަޅުތެރެ، 24 ގަޑިއިރު މެދުނުކެނޑި ޕެޓްރޯލްކޮށް ބެލެހެއްޓުމަށް ނިންމާފައިވޭ
ކޮމިޝަނަރ އޮފް ޕޮލިސް އަލީ ޝުޖާއު، ފުލުހުންގެ ސީނިއަރ އޮފިސަރުންނާއެކު ބޭއްވެވި ބައްދަލުވުމެއްގެ ތެރެއިން
މަސްތުވާތަކެއްޗާއި ބަނގުރާ ދައުރުކުރުުން ހުއްޓުވުމަށާއި, މާލޭގެ ޓްރެފިކް ބެލެހެއްޓުމަށް ފިޔަވަޅުތަކެއް އަޅަން ނިންމައިފިއެވެ.
މި ފިޔަވަޅުތައް އެޅުމަށް ނިންމާފައިވަނީ ސެންޓްރަލް ސެންޓްރަލް ޕޮލިސިންގ ކޮމާންޑާއި އޮޕަރޭޝަން ސަޕޯޓް ކޮމާންޑް، އަދި ޑްރަގް އެންފޯސްމަންޓްގެ ސީނިއަރ ފުލުހުންނާއެކު ކޮމިޝަނަރ އޮފް ޕޮލިސް އަލީ ޝުޖާއު އިއްޔެ ބޭއްވެވި ބައްދަލުވުމުގައެވެ.
ޝަހީދު ހުސައިން އާދަމް ބިލްޑިންގުގައި ބޭއްވެވި މި ބައްދަލުވުމުގައި ވަނީ މަސްތުވާތަކެއްޗާއި ބަނގުރާ ދައުރުކުރުން ހުއްޓުވުމާ ގުޅޭގޮތުން މަޝްވަރާކުރައްވައި، މުހިންމު ނިންމެވުންތަކެއް ނިންމަވާފައެވެ. އެގޮތުން ޑްރަގް އެންފޯސްމަންޓާއި މެރިން ޕޮލިސް ގުޅިގެން ހުޅުމާލޭގެ ފަޅުތެރެ ސައްވީސް ގަޑިއިރު މެދުނުކެނޑި ޕެޓްރޯލްކޮށް ބެލެހެއްޓުމަށާއި، އަތޮޅުތެރޭގެ ރަށްރަށަށް ލަފާ ފުރާ އުޅަނދުތަކާއި، ބަނދަރުކޮށްފައި އޮންނަ އުޅަނދުފަހަރުން ރަށްރަށަށް ބާލާ ތަކެތި މިހާރަށްވުރެ ބޮޑަށް ބެލެހެއްޓިގެން ދައުރުކުރެވޭ ތަކެތިކަމުގައި ހެދުމަށް ވަނީ ނިންމަވާފައެވެ.
އޭގެއިތުރުން މި ބައްދަލުވުމުގައި ވަނީ މާލޭގެ ޓްރެފިކް ބެލެހެއްޓުމާ ގުޅޭގޮތުން މަޝްވަރާކުރެވި، މާލޭގެ މަގުމަތި ބެލެހެއްޓުމާއި ޓްރެފިކް ބެލެހެއްޓުން އިތުރުކުރުމަށްޓަކައި ފުލުހުން އިތުރަށް މަގުތަކަށް ނެރެ، ސްކޫލް، ހޮސްޕިޓަލް، އަދި މީހުން އާންމުކޮށް އެއްވެއުޅޭ ސަރަހައްދުތަކާއި ޓްރެފިކް ތޮއްޖެހޭ ސަރަހައްދުތަކުގެ އާންމު ސަލާމަތާއި ރައްކާތެރިކަން ބެލެހެއްޓުމަށްވެސް ނިންމަވާފައެވެ.
މި ނިންމުންތައް މިމަހުގެ 7 ވަނަ ދުވަހުން ފެށިގެން ކުރުމަށް ބައްދަލުވުމުގައި ވަނީ ނިންމާފައެވެ.
