ޖަޕާނަށް ބާރުގަދަ ބިންހެލުމެއް، ސުނާމީގެ އިންޒާރު ދީފި

ޖަޕާނަށް 7.6 ގެ ބާރުމިނުގައި ބިންހެލުމެއް އައިސްފިއެވެ.

މި ބިންހެލުން އައިސްފައިވަނީ ހޯމަ ދުވަހުގެ ހެނދުނުއެވެ.

އަލްޖަޒީރާގައި ރިޕޯޓު ކޮށްފައިވާ ގޮތުގައި ބިންހެލުން އައިސްފައިވަނީ ޖަޕާނުގެ އުތުރަށެވެ.

މި ބިންހެލުމާ ގުޅިގެން ޖަޕާނުގެ މޫސުމާބެހޭ އިދާރާއިން މިހާރު ވަނީ ސުނާމީގެ އިންޒާރުވެސް ދީފައެވެ. އެގޮތުން މޫދާ ކައިރި ސަރަޙައްދުގައި ދިރިއުޅޭ މީހުން ރައްކާތެރި ތަންތަނަށް ދިއުމަށް އެ އިދާރާއިން ވަނީ އެދިފައެވެ.

މޫސުމާބެހޭ އިދާރާއާ ޙަވާލާދީ އަލްޖަޒީރާގައި ރިޕޯޓު ކޮށްފައިވާ ގޮތުގައި 16 ފޫޓު (5 މީޓަރުގެ) ސުނާމީ އަރާނެކަމަށް ވަނީ އަންދާޒާ ކުރެވިފައެވެ. މިހާރުވެސް ބައެއް ސަރަޙައްދުތަކަށް 3 މީޓަރުގެ އުސް ރާޅުތައް އަރާފައިވާކަމަށް އަލްޖަޒީރާއިން ބުނެއެވެ.

މި ބިންހެލުމާއެކު މިހާރު ހޮކުރިކް އިލެކްޓްރިލް ޕަވަރުން ދަނީ ނިއުކްލިއަރ ޕަވަރ ޕްލާންޓަށް އެއްވެސް އަސަރެއް ކޮށްފައިވޭތޯ ބަލަމުންނެވެ.