ލޮރިސް، ލޮސް އެންޖަލަސް އަށް ސޮއިކޮށްފި

އިނގިރޭސި ޕްރިމިއާ ލީގުގައި ޓޮޓެންހަމަށް ކުޅެމުން އައި ފްރާންސްގެ ގޯލު ކީޕަރު ހޫގޯ ލޮރިސް، މޭޖާ ލީގު ސޮކާ (އެމެރިކާ ލީގު)ގެ ލޮސް އެންޖަލަސް އަށް ސޮއިކޮށްފި އެވެ.

ލިއޯން ދޫކޮށް، އުމުރުން 37 އަހަރުގެ ލޮރިސް ޓޮޓެންހަމަށް ބަދަލުވީ 2012 ވަނަ އަހަރު އެވެ. އެ ކުލަބާއެކު އެންމެ ފަހުން އޭނާ ސޮއިކޮށްފައިވާ އެއްބަސްވުމުގެ މުއްދަތު ހަމަވާން އޮތީ އަންނަ އަހަރު އެވެ. އެހެން ނަމަވެސް، ޓޮޓެންހަމްގެ އެއްބަސްވުން އައުނުކޮށް، ލޮރިސް ކުލަބު ބަދަލު ކުރާނެ ކަމުގެ އަޑުތައް މީގެ ކުރިން ވެސް ވަނީ ފެތުރިފަ އެވެ.

އެމެރިކާ ލީގުގެ ލޮސް އެންޖަލަސް އާއެކު ލޮރިސް ސޮއިކޮށްފައި ވަނީ އެއް އަހަރު ދުވަހުގެ އެއްބަސްވުމެއްގަ އެވެ. އެ ކުލަބާއެކު އޭނާ ސޮއިކޮށްފައިވާ އެއްބަސްވުމުގެ މުއްދަތު ހަމަވާނީ 2024 ވަނަ އަހަރު އެވެ. އެ އެއްބަސްވުމުގެ މުއްދަތު ހަމަވުމުން، އިތުރު އަހަރުތަކަށް އެއްބަސްވުން އައު ކުރުމުގެ ފުރުސަތު ލޮސް އެންޖަލަސް އަށް އޮންނާނެ އެވެ.

ލޮރިސް 12 ސީޒަންގެ ތެރޭގައި، 447 މެޗެއްގައި ޓޮޓެންހަމްގެ ގޯލު ބަލަހައްޓައިފަ އެވެ. އެ ކުލަބާއެކު އޭނާ ވަނީ ޔުއެފާ ޗެމްޕިއަންސް ލީގުގެ ފައިނަލެއްގައި ކުޅެފަ އެވެ. މީގެ އިތުރުން ކަރަބޯ ކަޕްގެ ފައިނަލެއްގައި ދެ ފަހަރު ވަނީ ކުޅެފަ އެވެ. މިހާރު ކުރިއަށްދާ ސީޒަންގައި، ޓޮޓެންހަމްގެ އެއްވެސް މެޗެއްގައި ލޮރިސް ކުޅެފައެއް ނުވެ އެވެ. އޭނާ އެންމެ ފަހުން ޓޮޓެންހަމަށް މެޗެއް ކުޅުނީ މިދިޔަ ސީޒަންގަ އެވެ. އެއީ މިއަހަރުގެ އޭޕްރީލް މަހު އެވެ. ނިއުކާސަލް ޔުނައިޓެޑާ ދެކޮޅަށް ޓޮޓެންހަމުން ކުޅުނު މެޗުގައި އޭނާ އަށް އަނިޔާވެ، ވަނީ ބަދަލުކޮށްފަ އެވެ. އޭގެ ފަހުން އޭނާ ހުންނަނީ ކުޅުމާ ދުރުގަ އެވެ.

ލޮރިސް އަކީ ފްރާންސް ޤައުމީ ފުޓުބޯޅަ ޓީމުގެ ގޯލު ވެސް ބަލަހައްޓާފައިވާ ތަޖުރިބާކާރު ގޯލު ކީޕަރެކެވެ. ޤައުމީ ޓީމަށް އޭނާ ކުޅެން ފެށީ 2008 ވަނަ އަހަރު އެވެ. އޭގެ ފަހުން އޭނާ ވަނީ ޤައުމީ ޓީމުގައި 145 މެޗު ކުޅެފަ އެވެ. މިދިޔަ އަހަރު ޤަތަރުގައި ކުރިއަށް ދިޔަ ފީފާ ވޯލްޑް ކަޕަށްފަހު، ލޮރިސް ވަނީ ޤައުމީ ޓީމަށް ކުޅުން ހުއްޓާލައިފަ އެވެ. ފްރާންސް އާއެކު އޭނާ ވަނީ ފީފާ ވޯލްޑް ކަޕްގެ އިތުރުން ޔުއެފާ ނޭޝަންސް ލީގު ވެސް ކާމިޔާބުކޮށްފަ އެވެ.