ލަމްހާ ބަންދުން ދޫކޮށްލި މައްސަލަ: އިސްތިއުނާފު އަޑުއެހުންތައް ނިންމާލައިފި
11 ޑިސެމްބަރު 2023 | ހޯމަ 13:19ޝަރުތުތައް އުވާލައި، އޭނާ އަލުން ޖަލަށް ލާން ޖެހުމުގެ ޟަރޫރަތްތެރިކަން ދައުލަތުން ބުނެދޭންޖެހޭނެ ކަމަށްވެސް ލަމްހާގެ ވަކީލު ވިދާޅުވި
ހަލީމަތު ލަމްހާ އަބްދުއްރަހްމާން
އައިޖީއެމްއެޗްގައި މަސައްކަތް ކުރަމުން ދިޔަ ފިލިޕީންސްގެ އަންހެން ނަރުހެއް ކަމަށްވާ މޭރީ ގްރޭސްގެ މަރުގެ މައްސަލާގައި ދައުވާ އުފުލާފައިވާ ހަލީމަތު ލަމްހާ ބަންދުން ދޫކޮށްލި މައްސަލަ ހައިކޯޓުގައި އިސްތިއުނާފުކޮށްފައި ވާއިރު، އެ މައްސަލައިގެ އިސްތިއުނާފު ދައުލަތުން ހުށަހަޅައިފިއެވެ.
ހޯމަ ދުވަހު މި މައްސަލާގައި ބޭއްވި އަޑުއެހުމުގައި ފުރަތަމަ ދައުލަތުން ވަނީ އިސްތިއުނާފު ހުށަހަޅާފައެވެ.
ދައުލަތުން ހުށައަޅާފައިވާ އިސްތިއުނާފީ ނުކުތާއަކީ، ކްރިމިނަލް ކޯޓުން ލަމްހާ ޝަރުތުތަކާއެކު ބަންދުން ދޫކޮށްލުމަށް ނެރުނު އަމުރަކީ ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީގެ 49 ވަނަ މާއްދާއާއި، ޖިނާއީ އިޖުރާއަތުގެ ގާނޫނުގެ 60 ވަނަ މާއްދާގެ (ށ) އަދި އެ ގާނޫނުގެ 59 ވަނަ މާއްދާއާއި، ޝަރީއަތް ކުރުމާބެހޭ ޖިނާއީ އިޖުރާއަތުގެ ގަވާއިދުގެ 13 ވަނަ މާއްދާގެ (ނ)، އަދި ގާނޫނުއަސާސީގެ މާއްދާތަކަކާ ޚިލާފު އަމުރެއްކަމަށެވެ.
ދައުލަތުގެ ވަކީލު ވިދާޅުވީ، ލަމްހާގެ ބަންދު މުރާޖައާކުރަން އެދުނުއިރުވެސް، އޭނާ ބަންދުގައި ބެހެއްޓި ސަބަބަށް ބަދަލެއް އައިސްފައިނުވާކަން ދައުލަތުން ފާހަގަކޮށްފައި ވާނެކަމަށެވެ. އެގޮތުން ކުށް ކުރިކަމަށް އެކަށީގެންވާ ތުހުމަތެއް ކުރެވޭ މިންވަރަށް ހެކި ހުރިކަމަށް ކުރިން ނިންމާފައި އޮތް ހާލަތަށް ބަދަލެއް އައިސްފައި ނުވާކަމަށް ދައުލަތުގެ ވަކީލު ވިދާޅުވިއެވެ.
އަދި ތުހުމަތުކުރެވޭ ކުށުގެ އަމަލު ހިންގުމުގައި ލަމްހާ ބައިވެރިވިކަމަށް ބެލެވޭ ގޮތަށްވެސް ދަށު ކޯޓުގެ ނިންމުމުގައި އަލިއަޅުވާލާފައިވާއިރު، އެ އަމަލުގައި ލަމްހާގެ ބައިވެރިވުމެއް މަތީ ދަރަޖައެއްގެ ބޮޑު މިންވަރަކަށް އޮތްކަމަކަށް ނުބެލެވޭކަމަށް ދަށު ކޯޓުން ވަނީ ނިންމާފައެވެ.
ނަމަވެސް އެ ނުކުތާ އެއީ ދައުލަތާއި ދިފާއުންވެސް ވާހަކަދައްކާފައިވާ ނުކުތާއެއް ނޫންކަން ދައުލަތުން ފާހަގަކުރިއެވެ.
އެކަމާ ގުޅޭގޮތުން ލަމްހާގެ ވަކީލު ވިދާޅުވީ، ދަށު ކޯޓުން ލަމްހާ ޝަރުތުތަކާއެކު ބަންދުން ދޫކޮށްލާފައިވަނީ ޝަރުތުތަކާއެކު ދޫކޮށްލުމުގައި ގާނޫނީގޮތުން ބަލަންޖެހޭ ކަންކަން ބެލުމަށްފަހުކަމަށެވެ.
އަދި އެ ޝަރުތުތަކަށް ލަމްހާ ބޯލަނބާތޯ ބެލުމަށް ދިވެހި ފުލުހުންގެ ޚިދުމަތުގެ މައްޗަށްވެސް އަމުރު ނެރުއްވާފައިވާކަން، ދިފާއީ ވަކީލު ފާހަގަ ކުރެއްވިއެވެ.
އޭގެ އިތުރުން، މަރުގެ މައްސަލައެއްގައި ތުހުމަތުކުރެވޭ ބައެއްގެ ފަރާތުން މުޖުތަމައަށް އޮތް ނުރައްކާ ވަކިވަކިން ދެނެގަނެ، އެމީހުންގެ ބަންދާމެދު އަލުން ގޮތެއް ނިންމަން ދާދިފަހުން ސުޕްރީމް ކޯޓުން ނިންމާފައިވާ ނިންމުމަށްވެސް ދިފާއީ ވަކީލު އަލިއަޅުއްވާލެއްވިއެވެ.
ޝަރުތުތައް އުވާލައި، އޭނާ އަލުން ޖަލަށް ލާން ޖެހުމުގެ ޟަރޫރަތްތެރިކަން ދައުލަތުން ބުނެދޭން ޖެހޭނެކަމަށްވެސް ދިފާއީ ވަކީލު ވިދާޅުވިއެވެ.
މި އަޑުއެހުމުގައި ފަނޑިޔާރުން ކުރެއްވި ސުވާލުތަކަށްވެސް ދައުލަތާއި ދިފާއުން ޖަވާބު އަރުވާފައިވެއެވެ.
މި މައްސަލައިގެ އިސްތިއުނާފު އަޑުއެހުންތައް ނިންމާލާފައިވާއިރު، ދެން އޮންނާނީ މި މައްސަލައިގެ ހުކުމްކުރެއްވުމެވެ.
މައްސަލައިގެ ފަސްފަހަތް:
ލަމްހާގެ ބަންދު މުރާޖައާއާއި ގުޅޭގޮތުން ދެފަރާތުން ދެއްކެވި ވާހަކަތަކަށް ރިއާޔަތް ކުރައްވައި ދަށު ކޯޓުގެ މައްސަލަ ބައްލަވާ ގާޒީ ވަނީ ޝަރުތުތަކާއެކު ލަމްހާ ބަންދުން ދޫކޮށްލެއްވުމަށް ނިންމަވާފައެވެ. އެއީ 180 ދުވަހުގެ މުއްދަތަކަށެވެ.
އޭގެތެރޭގައި؛ މާލެއިން ބޭރަށް ދާކަމުގައިވާނަމަ ކޯޓަށް އެންގުމާއި، ކޯޓުން އަންގާ ވަގުތުތަކުގައި ހާޒިރުވުމާއި، ރޭގަނޑު 10:00ން ހެނދުނު 06:00ށް ބޭރުގައި އުޅުން މަނާކުރުން ހިމެނެއެވެ.
ލަމްހާގެ މައްޗަށް، އެނގިހުރެ މީހަކު މެރުމުގައި ބައިވެރިވުމުގެ ކުށުގެ ދައުވާ އުފުލާފައިވާއިރު، އޭނާގެ މައްޗަށް ވަނީ, އެހެން މީހެއްގެ މުދަލެއްގެ މައްޗަށް ހުއްދަ ނޫން ގޮތެއްގައި ބާރު ހިންގުމުގެ ކުށުގެ ދައުވާވެސް އުފުލާފައެވެ.
އަދި ހުއްދަ ނަގައިގެން ކުރަންޖެހޭ ކަމެއް ހުއްދަ ނުނަގައި ކުރުމުގެ ދަައުވާވެސް އުފުލާފައިވާއިރު، ލަމްހާ ދިރިއުޅޭ ގެ ކްރިމިނަލް ކޯޓުގެ އަމުރެއްގެ ދަށުން ބަލައި ފާސްކުރިއިރު، ލަމްހާ ދިރިއުޅޭ ކޮޓަރި ތެރެއިން، ހޮސްޕިޓަލްތަކާއި ފަރުވާދޭ މަރުކަޒުތަކުގެ ބޭނުމަށް އެކަނި ދޫކުރެވޭ ބާވަތުގެ ބޭސްތަކެއް ފެނިފައިވެއެވެ.
