ހިނގަމުންދާ 19 ވަނަ ރައްޔިތުންގެ މަޖިލީހަކީ، މިހާތަނަށް ރާއްޖޭގައި ހިންގުނު އެންމެ ޑިމޮކްރެޓިކް މަޖިލިސް ކަމަށާއި، މި މަޖިލީހަކީ އެންމެ ގިނަ މަސައްކަތްތައް ކުރެވުނު މަޖިލިސް ކަމަށް، ރައްޔިތުންގެ މަޖިލީހުގެ ރައީސް ކަމުން އިސްތިއުފާ ދެއްވި، ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ހޯމަ ދުވަހުގެ ހަވީރު އޮތް ޖަލްސާގައި ނަޝީދު ވަނީ މަޖިލީހުގެ ރައީސްކަމުގެ މަގާމުން އިސްތިއުފާދެއްވިކަން އިއުލާން ކުރައްވަައި މަޖިލީހުގެ އިދާރާއަށް ސިޓީއެއް ފޮނުއްވާފައެވެ. އެކަން އިއުލާންކުރެއްވި ޖަލްސާއަށްފަހު ބޭއްވި ނޫސްވެރިންގެ ބައްދަލުވުމުގައި، ނަޝީދަށް ވަނީ މަޖިލީހުގެ މަސައްކަތްތައް ނުކުރެވި އޮތް އޮތުމާ ގުޅޭގޮތުން ސުވާލު ދަންނަވާފައެވެ.
އެގޮތުން މަޖިލީހުގެ މަސައްކަތްތައް ހުއްޓިފައި އޮތުމުގެ ޒިންމާ އުފުއްލަވަންތޯ ނޫސްވެރިން ދެންނެވެމުން ނަޝީދު ވިދާޅުވީ، ހިނގަމުންދާ 19 ވަނަ ރައްޔިތުންގެ މަޖިލީހަކީ ރާއްޖޭގައި މިހާތަނަށް އެންމެ ގިނަ މަސައްކަތް އެ ދައުރެއްގެ ތެރޭގައި ކުރެވުނު މަޖިލިސް ކަމަށެވެ. އެގޮތުން ނަޝީދު ވިދާޅުވީ މަސައްކަތުގެ ހިސާބުތަކުން އެކަން ސާބިތުވާނެ ކަމަށެވެ.
"އަޅުގަނޑު އަނެއްކާވެސް ތަކުރާރުކޮށް ދަންނަވާލާނަން މި އަހަރަކީވެސް، މި މަޖިލީހުގަ އެންމެ ގިނަ މަސައްކަތްތަކެއް ކުރެވުނު އަހަރު. އަދި މި އައު ގާނޫނު އަސާސީއަށް އަޅުގަނޑުމެން އަމަލުކުރަން ފެށުނީއްސުރެ، މިހާގިނަ މަސައްކަތްތައް ކުރެވުނު މަޖިލީހެއް ނުދޭ. އެއީ އަޅުގަނޑަށް ލިބޭ ވަރަށް ބޮޑު އުފަލެއް،" ނަޝީދު ވިދާޅުވިއެވެ.
މީގެ އިތުރުން، ނަޝީދު ވިދާޅުވީ މި މަޖިލީހަކީ، ސިޔާސީގޮތުން ދިމާވި ގިނަ ފިއްތުންތަކުން އަރައިގަނެ، ސިފައިން ނުވައްދައި، އަދި މަޖިލިސް ބަންދުނުކޮށް މަސައްކަތްތައް ކުރިއަށް ގެންދެވުނު މަޖިލީހެއް ކަމަށެވެ. އެގޮތުން ނަޝީދު ވިދާޅުވީ ވޭތުވެދިޔަ ތިން ދައުރުގައިވެސް، ކޮންމެ ދައުރެއްގެވެސް ފަހު އަހަރު މަޖިލިސް އޮތީ ހުއްޓިފައިކަމަށާއި، ސިފައިންވެސް މަޖިލީހުގެ ޖަލްސާތަކުގައި ތިއްބަވާ ކަމަށެވެ. އެހެން ނަމަވެސް، އެފަދައިން މި މަޖިލީހުގެ ދައުރުން އަމަލުނުކުރާ ކަމަށް ނަޝީދު ވިދާޅުވިއެވެ.
"އަޅުގަނޑު މި ދެންނެވިހެން މީގެ ކުރީގަ ދިޔަ ތިން މަޖިލީހުންވެސް އެންމެ ބޮޑަށް ފާހަގަވެފަ އޮތް ކަމަކީ، ފަހު އަހަރު އޮތީ މަޖިލިސް ހުއްޓިފަ. އަދި ގިނަ ފަހަރަށް ސިފައިންވެސް ތިއްބެވި މަޖިލީހުގެ ތެރޭގަ. އަޅުގަނޑުމެން އަމަލު ކުރަމުން ގެންދިޔައީ އެހެންނެއް ނޫން. އެއީ އަޅުގަނޑު ދަންނަވާހެން މަޖިލީހުގެ އިއްޒަތްތެރި މެމްބަރުންނާ، ސިޔާސީ ޕާޓީތަކާ، އަދި މަޖިލީހުގެ އިދާރާގެ ބުރަ މަސައްކަތުން އަޅުގަނޑުމެންނަށް ހޯދުނު ކާމިޔާބީއެއް. މި މަޖިލީހަކީ، އަޅުގަނޑަށް ޔަގީން ކަށަވަރު، ތިބޭފުޅުން (ނޫސްވެރިން) ތައައްސަބެއް ނެތި ބައްލަވައިފިނަމަ، ދިވެހިރާއްޖޭގަ މިހާތަނަށް ހިނގާފަ އޮންނާނެ އެންމެ ޑިމޮކްރެޓިކް މަޖިލިސް،" ނަޝީދު ވިދާޅުވިއެވެ.
ނަޝީދު އެފަދައިން ވިދާޅުވިއިރު، މަޖިލީހުގެ ރައީސްކަމުން ނަޝީދު ވަކިކުރުމަށް، އިތުބާރު ނެތްކަމުގެ މައްސަލަ ހުށަހެޅިފަހުން މަޖިލީހުގެ ގިނަ މަސައްކަތްތަކެއް އޮތީ ހުއްޓިފައެވެ. އަދި ވަކިން ޚާއްސަކޮށް ނަޝީދު އެމްޑީޕީން ވަކިވެވަޑައިގެން، ޑިމޮކްރެޓްސްއާ ގުޅިވަޑައިގެންނެވި ފަހުން، ސަރުކާރުން ހުށަހަޅާ ބިލުތަކާއި އަދި އެހެނިހެން މަސައްކަތްތައް މަޖިލީހުގައި ކުރިއަށް ގެންގޮސްފައިވަނީ ވަރަށް ލަހުންނެވެ.
