ރައްޔިތުންގެ މަޖިލީހުގެ ރައީސް މުޙައްމަދު ނަޝީދުގެ އިތުބާރު ނެތްކަމުގެ މައްސަލަ ބުދަ ދުވަހުގެ ޖަލްސާއަށް އެޖެންޑާ ކުރި ނަމަވެސް މަޖިލީހުގެ ނައިބު ރައީސް އީވާ އަބްދުﷲ ސަލާމް ފޮނުއްވުމާ ގުޅިގެން އެ ޖަލްސާ ކެންސަލް ކޮށްފިއެވެ.
މަޖިލީހުގެ އަމީން އާންމު ސޮއި ކުރައްވާ އެމްޑީޕީ ޕީޖީ ގްރޫޕުގެ ލީޑަރު އަދި ހިތަދޫ އުތުރު ދާއިރާގެ މެމްބަރު މުޙައްމަދު އަސްލަމަށް އަންގާރަ ދުވަހު ފޮނުއްވި ސިޓީގައި ވިދާޅުވީ ނަޝީދުގެ މައްސަލަ ބުދަ ދުވަހުގެ ޖަލްސާއަށް އެޖެންޑާ ކުރި ނަމަވެސް ނައިބުރައީސް އާލާސްކަންފުޅާ އުޅުއްވާތީ ސަލާމް ފޮނުއްވާފައިވާ ކަމަށެވެ. އެހެންވެ، އެ ޖަލްސާ ކުރިއަށްނުގެންދެވޭނެ ކަމަށް ވިދާޅުވިއެވެ.
މަޖިލީހުގެ ގަވާއިދު ބުނާ ގޮތުން މަޖިލީހުގެ ރައީސްގެ އިތުބާރު ނެތް މައްސަލައެއް ހުށަހަޅައިފިނަމަ އެ މައްސަލަ ތާވަލު ކުރާ ޖަލްސާއެއްގެ ރިޔާސަތު ބަލަހައްޓަވަން ޖެހޭނީ މަޖިލީހުގެ ނައިބު ރައީސަށެވެ. މި މައްސަލަ އޮކްޓޯބަރު 29، އަދި 30 ވަނަ ދުވަހުގެ ޖަލްސާއަށް ތާވަލު ކުރި ނަމަވެސް އީވާ ސަލާމް ފޮނުއްވުމާ ގުޅިގެން ޖަލްސާ ކުރިއަށްނުގެންދެއެވެ.
އަންގާރަ ދުވަހުގެ ޖަލްސާއަށް މި މައްސަލަ އެޖެންޑާ ނުކުރާތީ އޭގެ ސަބަބު ހޯދުމަށްއެމްޑީޕީ ޕީޖީން މަޖިލީހުގެ އިދާރާގައި އެދުނެވެ. އަމީން އާންމު ފޮނުއްވި ސިޓީގައި ވިދާޅުވި ގޮތުގައި އެ މައްސަލަ އަންގާރަ ދުވަހުގެ ޖަލްސާގެ އެޖެންޑާ ތައްޔާރު ކުރި އިރު ހިމެނި ކަމަށެވެ. ނަމަވެސް އީވާ ސަލާމް ފޮނުއްވުމުން އެޖެންޑާ ނުކުރީ ކަމަށް ވިދާޅުވިއެވެ.
މަޖިލީހުގެ ރައީސްގެ އިތުބާރު ނެތްކަމުގެ މައްސަލަ 9 އޮކްޓޯބަރުގައި އެމްޑީޕީ ޕީޖީ ގްރޫޕުން ވަނީ 49 މެމްބަރުންގެ ސޮޔާއެކު މަޖިލީހަށް ވައްދާފައެވެ. އެ މައްސަލައިގައި ގޮތެއް ނުނިންމައި މަޖިލީހުގެ އިތުރު މަސައްކަތެއް ކުރިއަށް ގެންދިއުމަށް ގަވާއިދު ތަންނުދޭކަމަށް ބުނެ އެމްޑީޕީ ޕީޖީން ވަނީ އިތުރު މަސައްކަތްތަކަށް އެއްބާރުލުން ނުދޭނެ ކަމަށް ބުނެފައެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ ކުރިއަށްގެންދެވޭނެ ގޮތެއް ހޯދުމަށް އެމްޑީޕީން ވަނީ ސުޕްރީމް ކޯޓަށް ވެސް މައްސަލަ ހުށަހަޅައިފައެެވެ. މި މައްސަލަ އެ ކޯޓުން ވަނީ ބަލައިގެންފައެވެ.
