ނަޝީދުގެ އިތުބާރު ނެތްކަމުގެ މައްސަލަ ނިމުމުން 24 ގަޑިއިރު ތިބެގެން ވެސް މަޖިލީހުގެ މަސައްކަތްތައް ނިންމާނަން: އަސްލަމް
ފުރަތަމަ ފަހަރަށް ހުށަހަޅައި، ފަހުން އެ މައްސަލަ ނެންގެވީ އިންތިހާބުގެ ދެވަނަ ބުރުގެ މަސައްކަތްތަކާއި އަދި ހަމައެކަނި ރައީސް ނަޝީދުގެ ސަބަބުން މަޖިލިސް ހުއްޓިފައިވުމުގެ ސަބަބުން ކަމަށް ވިދާޅުވި
އެމްޑީޕީގެ ޕީޖީ ލީޑަރު އަދި ހިތަދޫ އުތުރު ދާއިރާގެ މެންބަރު މުހައްމަދު އަސްލަމް
މަޖިލީހަށް މިހާރު ހުށަހަޅާފައިވާ، ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތް ކަމުގެ މައްސަލައިގެ ވޯޓުގެ މަސައްކަތްތައް ނިމުމުން، 24 ގަޑިއިރު މަޖިލީހުގައި ތިއްބަވައިގެން އަދި އިތުރު ޖަލްސާތައް ބާއްވައިގެން ނަމަވެސް މަޖިލީހުގެ މަސައްކަތްތައް ނިންމަވައިދެއްވާނެ ކަމަށް އެމްޑީޕީގެ ޕީޖީ ލީޑަރު އަދި ހިތަދޫ އުތުރު ދާއިރާގެ މެންބަރު މުހައްމަދު އަސްލަމް ވިދާޅުވެއްޖެ އެވެ.
އަންގާރަ ދުވަހު އެމްޑީޕީގެ ޕީޖީ ގުރޫޕުން ބޭއްވި ނޫސްވެރިންގެ ބައްދަލުވުމެއްގައި، ރައްޔިތުންގެ މަޖިލީހުގެ އިދާރާގައި ހުންނަވައި ވާހަކަފުޅު ދައްކަވަމުން އަސްލަމް ވިދާޅުވީ ރައީސް ނަޝީދުގެ އިތުބާރު ނެތް ކަމުގެ މައްސަލަ ފުރަތަމަ ފަހަރަށް ހުށަހަޅައި، ފަހުން އެ މައްސަލަ ނެންގެވީ އިންތިހާބުގެ ދެވަނަ ބުރުގެ މަސައްކަތްތަކާއި އަދި ހަމައެކަނި ރައީސް ނަޝީދުގެ ސަބަބުން މަޖިލިސް ހުއްޓިފައި އޮތުމުގެ ސަބަބުން ކަމަށެވެ.
އެގޮތުން އަސްލަމް ވިދާޅުވީ ރައީސް ނަޝީދަށް މެންބަރުންގެ އިތުބާރު ނެތް ކަން ސާފުކޮށް އެނގިވަޑައިގަންނަވާ ކަމަށާއި، އެހެންކަމުން ގަދަބާރުން މަޖިލީހުގައި އެމަނިކުފާނު ހުންނެވުމުގެ ބޭނުމެއް ނެތް ކަމަށެވެ.
އަސްލަމް ވިދާޅުވީ ދެވަނަ ފަހަރަށް ވެސް ނަޝީދުގެ އިތުބާރު ނެތްކަމުގެ މައްސަލަ ހުށަހެޅުއްވީ ޒާތީ މައްސަލައެއް އޮވެގެންނެއް ނޫން ކަމަށެވެ. އެހެން ނަމަވެސް އެއީ މަޖިލީހުގެ މަސައްކަތްތައް ހަލުވިކަމާ އެކީ ކުރިއަށް ގެންދިޔުމުގެ މަގްސަދުގައި ހުށަހެޅި މައްސަލައެއް ކަމަށް އޭނާ ވިދާޅުވި އެވެ.
އޭގެ މިސާލުތައް ދަންނަވަމުން އަސްލަމް ވިދާޅުވީ ނިޒާމީ ވޯޓެއް ނެގުމަށްޓަކައި އެ މައްސަލަ މަޖިލީހުގައި އެޖެންޑާ ކުރެވުނު ގޮތާއި، މަޖިލީހުގެ ކޮމެޓީތައް އެކުލަވާނުލެވެނީސް މުޅި މަޖިލީހުގެ ކޮމެޓީއަކަށް އެދުވަހުން އެދުވަހަށް ފޮނުއްވައިގެން ޖަލްސާތައް އޭރު ރައީސް ނަޝީދު ބޭއްވެވި ކަމަށެވެ.
އެހެންކަމުން ވަކި ކަމެއް ކުރައްވަންވީމާ އެ ކަންކަން ރައީސް ނަޝީދު ކުރައްވާ ކަމަށާއި، އެހެން ނަމަވެސް ބޭނުންވެވަޑައިނުގަންނަވާ ކަންކަން އެމަނިކުފާނު ނުކުރައްވާ ކަމަށް އަސްލަމް ވިދާޅުވި އެވެ.
އެއާއެކު އަސްލަމް ވިދާޅުވީ އިތުބާރު ނެތްކަމުގެ މައްސަލައަކީ އިތުބާރު ގެއްލޭ ފަދަ ގިނަ ކަންކަމެއް ރައީސް ނަޝީދުގެ ފަރާތްޕުޅުން ފެނުމުގެ ސަބަބުން ހުށަހެޅި މައްސަލައެއް ކަމަށާއި، އެ މައްސަލަ ނިމުމުން 24 ގަޑިއިރު މަޖިލީހުގައި ތިއްބަވައިގެން އަދި އިތުރު ޖަލްސާތައް އެޖެންޑާ ކުރައްވައިގެން ނަމަވެސް، މަސައްކަތްތައް ނިންމަވާނެ ކަމަށެވެ.
