ހިލޭ ޑިްގްރީގެ ސަބަބުން ރާއްޖޭގައި ތައުލީމީ ފެންވަރު ދަށްވާނެކަމަށް ގަބޫލުފުޅުނުކުރައްވާކަމަށް އެމްކިއުއޭގެ ސީއީއޯ ޑރ. އަބްދުލް ހަންނާނު ވަހީދު ވިދާޅުވެއްޖެއެވެ.

ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަފުޅުދައްކަވަމުން މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ)ގެ ސީއީއޯ ހަންނާނު ވިދާޅުވީ، ރާއްޖޭގައި ކިޔަވާދޭ ކޯސްތަކަކީ އެމްކިއުއޭ އިން އެކްރެޑިޓްކޮށްފައިހުރި ކޯސްތައްކަމަށާއި، އެ ކޯސްތަކުގެ ތެރެއިން ޑިގްރީ ފެންވަރުގެ ކޯސްތައް ހިލޭ ޑިގްރީގެ ތެރެއިން ކިޔަވާދެމުންދާތީވެ ތައުލީމީ ފެންވަރު ދަށްވާނެކަމަށް ގަބޫލުފުޅުނުކުރާކަމަށެވެ.

ހަންނާނު އިތުރަށް ވިދާޅުވީ، ސަރުކާރުން ކަމަކަށް ޚަރަދުކުރާއިރު އެކަމަކުން ނިކުންނާނެ ނަތީޖާއާއިމެދު ވިސްނާނެކަމަށާއި، އެ ކޯހެއް ރަނގަޅަށް ފުރިހަމަކުރުމަށް ސަރުކާރުން ބާރުއަޅާނެކަމަށެވެ.

އެގޮތުން، ހަޔަރ އެޑިއުކޭޝަން މިނިސްޓްރީއިން އެކަށައަޅާ ގަވާއިދުތައްވެސް އެކަމަށް ބާރުއަޅާކަމަށް އޭނާ ވަނީ ފާހަގަކުރައްވާފައެވެ.

މީގެއިތުރުން އޭނާ ވިދާޅުވީ، ރާއްޖޭގައި ކުރިން ހިންގި ބައެއް ކޯސްތައް މިހާރު ހިންގަނީ އެކްރެޑިޓްނުކޮށްކަމަށާއި، އެކްރެޑިޓް ހުއްދައަކީ ފަސް އަހަރުގެ މުއްދަތަށް އެމްކިއުއޭ އިން ދޫކުރާ ހުއްދައެއްކަމަށެވެ. އެހެންކަމުން، މީގެފަހުން ކޯސްތައް ހިންގަން ބޭނުންވާނަމަ އެކްރެޑިޓް ކުރަންޖެހޭނެކަމަށް ހަންނާނު ވިދާޅުވިއެވެ.

ހަންނާނު އިތުރަށް ވިދާޅުވީ، މިހާރު އެފަދަ ކޯސްތައް ނުހުއްޓުވަނީ އިންތިޤާލީ މަރުހަލާއެއްގައި އެ މަރުކަޒުތަކުން އެ މަސައްކަތްކުރަމުންދާތީކަމަށެވެ.