އޮތީ އެންމެ މަގްސަދެއް، އެއީ ރައްޔިތުންނަށް ޚިދުމަތްކުރުން: ރައީސް
މިއިންތިޚާބު އެމްޑީީޕީއަށް ކާމިޔާބުނުކުރެވިއްޖެނަމަ ރާއްޖެ އަނެއްކާވެސް ދާނީ ނާމާން ބިރުވެރިކަމެއްގެ ތެރެއަށް
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
އެމްޑީޕީ އާއި އެމްޑީޕީ އާ ގުޅިފައިވާ ސިޔާސީ ޕާޓީތަކުގައިވެސް އޮތީ އެންމެ މަޤްސަދެއްކަމަށާއި އެއީ ރައްޔިތުންނަށް ޚިދުމަތްކުރުންކަމަށް އެމްޑީޕީ އާއި ގުޅިފައިވާ ސިޔާސީ ޕާޓީތަކުގެ ރިޔާސީ ކެންޑިޑޭޓް އަދި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.
ހޯމަ ދުވަހުގެ ރޭ މާފަންނު ކަންމަތީގައި ކުރިޔަށްދިޔަ ޖަލްސާގައި ވާހަކަދައްކަވަމުން ރައީސް ވިދާޅުވީ ރިޔާސީ އިންތިޚާބުގެ ފުރަތަމަ ބުރަށް ހުރިހާ ފަރާތްތަކުންވެސް ވަރަށް ބުރަކޮށް މަސައްކަތްކޮށްފައިވާކަމަށެވެ. ދެ މަސް ދުވަސްވަންދެން މެދުކެނޑުމެއްނެތި ކެމްޕެއިންކުރި ކަމަށާއި އެހެންކަމުން ސެޕްޓެމްބަރ މަހުގެ 9 ވަނަ ދުވަހުގެ ނަތީޖާއިން ފެންނަނީ ކޮންކަމެއް ކަމާމެދު ވިސްނާލަންޖޭކަމަށެވެ. އެއީ ކޮންމެ މީހަކުވެސް މިއަދު ވިސްނާލަންޖެހޭ ކަމެއްކަމަށް ރައީސް ވިދާޅުވިއެވެ.
ކޮންމެވެސް ކަންތައްތަކެއް ކުރަންޖެހޭ ގޮތް ނޫންގޮތަކަށް ކުރެވިފައިވާކަމަށާއި އެހެންކަމުން އެކަންކަމާމެދު ވިސްނާލަންޖެހޭކަމަށް ރައީސް ވިދާޅުވިއެވެ.
ރައީސް ވިދާޅުވީ ދެވަނަ ބުރުގެ އިންތިޚާބު އެމްޑީޕީން ކާމިޔާބުކުރުމަކީ މުހިންމު ކަމެއްކަމަށެވެ. އެއީ މިއިންތިޚާބު އެމްޑީީޕީއަށް ކާމިޔާބު ނުކުރެވިއްޖެނަމަ ރާއްޖެ އަނެއްކާވެސް ދާނީ ނާމާން ބިރުވެރިކަމެއްގެ ތެރެއަށްކަމަށް ރައީސް ވިދާޅުވިއެވެ. މިއަދު އެމްޑީޕީ އަލުން އައު ރޫހެއްގައި ނިކުމެ މިތިބީ އެހެންވެގެންކަމަށް ރައީސް ވިދާޅުވިއެވެ.
ރައީސް ވިދާޅުވީ އިގްތިޞާދުގެ ވާހަކަދައްކާއިރު ފައިސާގައި ދެ ފުށް އޮންނަކަން އެނގިގެން ނޫނީ މިމަސައްކަތް ނުކުރެވޭނެކަމަށެވެ. އެމްޑީޕީ އާއެކު ކޯލިޝަން ހަދާފައިވަނީ އެކަން ދަންނަ މީހުންކަމަށް ރައީސް ވިދާޅުވިއެވެ.
ރައީސް ވިދާޅުވީ މިސަރުކާރުގައި ރާއްޖެއަށް ބޭރުގެ ފަރާތްތަކުން ލޯނުގެ އެހީ ލިބެނީ ދޭދޭ ގައުމުތަކާއެކު އޮތް ގުޅުން ރަނގަޅުވުމުންކަމަށެވެ. އަދި ފައިސާ ދެނީ އެދައްކާނެ ކަމުގެ ޔަގީންކަން އެފަރާތްތަކަށް އޮތީމަކަމަށް ރައީސް ވިދާޅުވިއެވެ.
ރައީސް ވިދާޅުވީ މިއިންތިޚާބު މިސަރުކާރަށް ގެއްލިއްޖެނަމަ ރާއްޖެ ބަނގުރޫޓްވަމުންދާތަން ފެނިވަޑައިގަންނަވާކަމަށެވެ.
ރައީސް ވިދާޅުވީ މަސައްކަތްކުރަންވީ ވިސްނުންތެރިކަމާއެކު ދެވަނަ ބުރު ކާމިޔާބުކުރުމަށްކަމަށެވެ.
