ރައީސުލްޖުމްހޫރިއްޔާ އިބްރާހިމް މުހައްމަދު ސާލިހޫ، ހުވަދު އަތޮޅު އުތުރުބުރީ ކަނޑުހުޅުދޫ ފެނާއި ނަރުދަމާގެ މަޝްރޫއުގެ ނިމުން ފާހަގަކޮށްދެއްވައި، ފެނަކަ އޮފީސް އިމާރާތާއި ވޮލީކޯޓު ހުޅުއްވައިދެއްވައިފިއެވެ.
މިރަސްމިއްޔާތުތައް ބޭއްވީ، ހުވަދުއަތޮޅަށް މިހާރު އެމަނިކުފާނު ކުރައްވަމުން ގެންދަވާ ދަތުރުފުޅުގައި، ބުދަ ދުވަހުގެ ހަވީރުއެވެ.
ކަނޑުހުޅުދޫ ފެނާއި ނަރުދަމާގެ ނިޒާމް ގާއިމްކޮށްފައިވަނީ، ސަރުކާރުގެ ބަޖެޓުން ޚަރަދުކޮށްގެންނެވެ. އެމަޝްރޫއުގެ މަސައްކަތްކޮށްފައިވަނީ ސްޓެޓިކް ކޮމްޕެނީ ޕްރައިވެޓް ލިމިޓެޑާ ހަވާލުކޮށްގެނެވެ.
ކަނޑުހުޅުދޫ ފެނަކަ އައު އޮފީސް އިމާރާތަކީ 30 މުވައްޒަފުންނަށް އެއްފަހަރާ މަސައްކަތްކުރެވޭނެ، ޖާގަ ތަނަވަސް، ޒަމާނީ އޮފީސް އިމާރާތެކެވެ. ކަނޑުހުޅުދޫ އިންޖީނުގެ، މީހުން އުޅޭ ސަރަހައްދާ ދުރުގައި ބިނާކޮށްފައިވާއިރު، ފެނަކަ އައު އޮފީސް އިމާރާތްކޮށްފައިވަނީ ރަށުގެ މީހުން ދިރިއުޅޭ ސަރަހައްދުގައެވެ. ފެނަކަ އޮފީސް އިމާރާތް ހުޅުއްވައިދެއްވުމުގެ އިތުރުން، ރައީސުލްޖުމްހޫރިއްޔާ ވަނީ ކަނޑުހުޅުދޫ ވޮލީ ކޯޓުވެސް ހުޅުއްވައިދެއްވާފައެވެ.
ޒުވާނުންނަށް ކުޅިވަރު ކުޅެވޭނެ މަގުތައް ފަހިކޮށްދިނުމުގެ ގޮތުން ޒަމާނީ ފެންވަރުގެ ފުޓުބޯޅަ ދަނޑުތަކާއި ފުޓްސަލް ދަނޑުތައް، އަދި ކުޅިވަރު ކޯޓުތައް އަޅައި، ކުޅިވަރުގެ ތެރެއިން ރައްޔިތުންނަށް ދުޅަހެޔޮ އުފާވެރި ދިރިއުޅުމަކަށް މަގުފަހިކޮށްދިނުމަށް ސަރުކާރުން ވަނީ ގިނަ މަޝްރޫއުތަކެއް އަތޮޅުތަކުގައި ހިންގާފައެވެ.
