ކޯލިޝަނުން ރައީސް ސާލިހުގެ ރަނިންމޭޓާމެދު ހިތްހަމަޖެހޭ

އަންނަ މަހު ބާއްވާ ރިޔާސީ އިންތިޚާބުގައި އެމްޑީޕީގެ ކެންޑިޑޭޓު އަދި ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުގެ ރަނިންމޭޓެއްގެ ގޮތުގައި، ރައްޔިތުންގެ މަޖިލީހުގެ އައްޑޫ ހިތަދޫ އުތުރު ދާއިރާގެ މެންބަރު މުހައްމަދު އަސްލަމް ހަމަޖައްސަވާފައިވާއިރު، އަސްލަމަކީ ރައީސް ވަރަށް އިތުބާރު ކުރައްވާ ބޭފުޅެއް ކަމަށް އެމްޑީއޭގެ ނާއިބު ލީޑަރު އަލީ މައުރޫފް ވިދާޅުވެއްޖެއެވެ.

ރާއްޖެއެމްވީއަށް މައުރޫފް ވިދާޅުވީ ރައީސް ނިންމެވީ ވަރަށް ފުރިހަމަ ނިންމެވުމެއް ކަމަށާއި އަސްލަމަކީ ވަރަށް ތަޖުރިބާކާރު ބޭފުޅެއް ކަމަށެވެ.

އަސްލަމީ އައްޑޫގެ ރައްޔިތުންގެ ލޯބި ލިބިފައިވާ ބޭފުޅެއް ކަމަށާއި ރައްޔިތުންގެ ވޯޓުން މަޖިލީހަށް ހަތަރު ދައުރު ހޮވުމަކީ ފަސޭހަކަމެއް ނޫން ވެސް ވިދާޅުވިއެވެ. އަދި އެކަމުން ފެނިގެންދަނީ އަސްލަމްގެ ޤާބިލުކަމާއި ރައްޔިތުންގެ މެދުގައި އެބޭފުޅާއަށް އޮތް ލޯބި ކަމަށް ވެސް މައުރޫފް ވިދާޅުވިއެވެ.

މައުރޫފް އިތުރަށް ވިދާޅުވި އަސްލަމް ރަނިންމޭޓަކަށްވުމުން ރައީސް ސާލިހަށް ރިޔާސީ އިންތިޚާބު އެއްބުރުން ކާމިޔާބު ކުރުމަށް ފަސޭހަވެގެންދާނެ ކަމަށެވެ. އަދި

މީގެއިތުރުން ރާއްޖެއެމްވީއަށް އަދާލަތު ޕާޓީގެ ނައިބު ރައީސް މުހައްމަދު އިއާދު ހަމީދު ވިދާޅުވީ ތަޖުރިބާ އާއި ޓްރެކް ރެކޯޑްގެ ގޮތުން ބެލިނަމަވެސް މިއަށްވުރެން ވަކި ރަނގަޅު ބޭފުޅެއް ނެތް ކަމަށެވެ. އަދި އެއަށްވުރެ ރަނގަޅު ޗޮއިސެއް ނެތް ކަމަށް ވެސް އިއާދު ވިދާޅުވިއެވެ.

އަސްލަމަކީ އެމްޑީޕީގެ ޕާލިމެންޓްރީ ގްރޫޕުގެ އަދި މަޖިލީހުގެ މެޖޯރިޓީ ލީޑަރެވެ. އޭނާއަކީ އެމްޑީޕީއާއެކު ފެށުނީއްސުރެ މަސައްކަތް ކުރައްވަމުންގެންދަވާ ބޭފުޅެކެވެ. އަސްލަމް ވަނީ ރައީސާއެކު މަޖިލީހުގައިވެސް ގިނަ ދުވަސްތަކެއް ވަންދެން މަސައްކަތް ކުރައްވާފައެވެ.