މެސީގެ މޮޅު ކުޅުމާއެކު އަޓްލަންޓާ ބަލިކޮށް، މިއާމީ ލީގު ކަޕްގެ އަނެއް ބުރަށް

އާޖެންޓީނާގެ ކެޕްޓަން ލިއޮނަލް މެސީގެ މޮޅު ކުޅުމާއެކު، އެޓްލަންޓާ ޔުނައިޓެޑު ބަލިކޮށް އިންޓަ މިއާމީން ލީގު ކަޕް ބުރުގެ ގަދަ 32 އިން ޖާގަ ހޯދައިފި އެވެ.

ބުދަ ދުވަހު ކުޅުނު މެޗު މިއާމީން ކާމިޔާބު ކުރީ 4-0 އިންނެވެ. މިއީ މިއާމީ އަށް ބަދަލުވި ފަހުން މެސީ އެ ޓީމަށް ކުޅެދިން ދެ ވަނަ މެޗެވެ. އަނެއްކޮޅުން މިއީ އެ ޓީމުގެ ފުރަތަމަ 11 ގައި ހިމެނިގެން މެސީ ކުޅުނު ފުރަތަމަ މެޗެވެ. ފުރަތަމަ މެޗުގައި އޭނާ ކުޅެން ނުކުމެފައި ވަނީ ބަދަލު ކުޅުންތެރިޔެއްގެ ގޮތުގަ އެވެ. މެޗުގައި މެސީ ވަނީ ދެ ލަނޑު ޖަހައި، އެއް ލަނޑު ޖެހުމަށް އެހީތެރިވެދީފަ އެވެ.

މެޗު ފަށައިގެން އަށް ވަނަ މިނެޓުގައި މިއާމީ އަށް ފުރަތަމަ ލަނޑު ޖަހައި ލީޑު ނަގައިދިނީ މެސީ އެވެ. އޭގެ ފަހުން 22 ވަނަ މިނެޓުގައި ރޮބާޓް ޓޭލާ ތަނަވަސްކޮށްދިން ފުރުސަތެއްގައި މެސީ ވަނީ ދެ ވަނަ ލަނޑު ޖަހައި ލީޑު ފުޅާކޮށްދީފަ އެވެ. ފުރަތަމަ ހާފު ނިމުމުގެ ކުރިން މިއާމީގެ ތިން ވަނަ ލަނޑު ޖެހީ ޓޭލާ އެވެ. މިއާމީގެ ފަހު ލަނޑު ދެ ވަނަ ހާފުގައި ޓޭލާ ޖެހީ މެސީ ތަނަވަސްކޮށްދިން ފުރުސަތެއްގަ އެވެ. މެޗުގެ 84 ވަނަ މިނެޓުގައި އެޓްލަންޓާ އަށް ވަނީ ޕެނަލްޓީ އެއް ލިބިފަ އެވެ. ނަމަވެސް ތިއާގީ އަލްމަޑާގެ ޕެނަލްޓީ ކާމިޔާބެއް ނުވި އެވެ.

އިންޓަ މިއާމީ އަށް ދެން އޮންނާނީ އަންނަ އޯގަސްޓު މަހުގެ 21 ވަނަ ދުވަހު އެމެރިކާ ލީގުގައި ޗާލޮޓާ ދެކޮޅަށް ކުޅޭ މެޗެވެ.