ނިއުޒީލޭންޑާއި އޮސްޓްރޭލިޔާގެ ފެށުން ރަނގަޅުކޮށްފި

މުބާރާތް ބާއްވާ ދެ ގައުމު ކަމަށްވާ އޮސްޓްރޭލިޔާ އާއި ނިއުޒީލޭންޑް އަންހެނުންގެ ވޯލްޑްކަޕުގެ ފެށުން ރަނގަޅުކޮށްފި އެވެ.

މުބާރާތުގެ ފުރަތަމަ މެޗުގައި ނިއުޒީލޭންޑް މޮޅުވީ ނޯވޭ އަތުން 1-0އިންނެވެ. އޮސްޓްރޭލިޔާ މޮޅުވީ 1-0އިން ރިޕަބްލިކް އޮފް އަޔަލޭންޑް އަތުންނެވެ.

އޮސްޓްރޭލިޔާ ޓީމުގެ ހަމައެކަނި ލަނޑު ޖެހީ މެޗުގެ 48 ވަނަ މިނެޓުގައި މި މެޗުގައި ކެޕްޓަންކަންކުރި ކަތްލޭ އެވެ. އޭނާ ބޭންޑް އެޅީ ޓީމުގެ ކެޕްޓަން އަދި އެންމެ މުހިންމު ފޯވަޑް ކަމަށްވާ ސޭމް ކާގެ ކުޑަކަޅުވާ އަށް ހާނިއްކަވެ މި މެޗާއި ދެން އަންނަ މެޗުގައި ވެސް ނުކުޅެވޭނެކަން ޔަގީންވުމުންނެވެ. ޗެލްސީ އަށް ކުޅެމުން އަންނަ ކާ މެޗުގެ ކުރިން ބުނީ މެޗަށް ނޭރުނަސް އޭނާ ހުރީ ޓީމާއެކުގައި ކަމަށެވެ.

ނިއުޒީލޭންޑްގެ މޮޅަކީ ތާރީޚީ މޮޅެކެވެ. މިއީ ވޯލްޑްކަޕުގެ މެޗަކުން އެ ޓީމު މޮޅުވި ފުރަތަމަ ފަހަރެވެ. މީގެ ކުރިން ކުޅުނު 14 މެޗުން ވެސް ބަލިވެފައި، އަލަށް މެޗެއް ކާމިޔާބުވުމުން ނިއުޒީލޭންޑްގެ ކުޅުންތެރިންނާއި އޮފިޝަލުންނާއި ސަޕޯޓަރުން މެޗަށް ވަރަށް ބޮޑަށް އުފާ ފާޅުކުރި އެވެ.

މެޗުގެ ހަމައެކަނި ލަނޑު ޖަހައިދިނީ ވިލިއަމްސަން އެވެ. ނަމަވެސް 1995 ވަނަ އަހަރުގެ ޗެމްޕިއަން ނޯވޭއިން ޖުމްލަ 12 ހަމަލާ އުފެއްދި އެވެ.

އެ ޓީމުގެ ކޯޗު ރިސޭ މެޗަށް ފަހު ބުނީ ނިއުޒީލޭންޑްގެ އޯކްލޭންޑް ސިޓީގައި ހިނގި ބަޑިޖެހުމުގެ ހާދިސާގެ ސަބަބުން ސިފައިން ހެލިކޮޕްޓަރާއި އެއްގަމުން މަގުން ފޯރިމަރަމުން ދިއުމުގެ ސަބަބުން އޭނާގެ ބައެއް ކުޅުންތެރިންނަށް ރަނގަޅަށް ނުނިދުނު ކަމަށެވެ. ނަމަވެސް އޭނާ ބުނީ މިއީ މެޗުން ބަލިވި މައިގަނޑު ސަބަބު ނޫން ކަމަށެވެ.

32 ޓީމު ވާދަކުރާ މުބާރާތް 2 މިލިއަން މީހުން ބަލާނެ ކަމަށް ފީފާއިން ބުނެ އެވެ.