އީގަލްސް އަތުން އެއްވަރުވެ އެސްޓީއޯ މާލެ ލީގުގެ އެއްވަނައަށް އަރަން ލިބުނު ފުރުސަތު ނިއުރޭޑިއަންޓުން ނަގާލައިފިއެވެ.

ލީގުގައި ބުރާސްފަތި ދުވަހު ހަވީރު، ގްރީން ސްޓްރީޓް އަތުން މާޒިޔާ ބަލިވުމުން، އީގަލްސް އަތުން 3 ޕޮއިންޓް ހޯދައިގެން ލީގުގެ އެއްވަނައަށް އަރަން ނިއުއަށް އޮތީ ރަނުގެ ފުރުސަތެއް ލިބިފައެވެ. އެގޮތުން ލީގު ކާމިޔާބުކުރުމަށް މަސައްކަތް ކުރަމުން އަންނަ ނިއުއަށް އީގަލްސް އަތުން 3 ޕޮއިންޓް ލިބުނުނަމަ ލީގުގެ ފަހު މެޗުގައި މާޒިޔާ އާއި ދެކޮޅަށް ކުޅެ މެޗު އެއްވަރު ކޮށްލައިގެންވެސް އެޓީމަށް ލީގު ކާމިޔާބުކުރުމުގެ ފުރުސަތު ލިބުނީހެވެ.

ބުރާސްފަތި ދުވަހުގެރޭ އީގަލްސް އާއި ދެކޮޅަށް ކުޅުނު މެޗް އެއްވަރުވީ 1-1 ގެ ނަތީޖާއަކުންނެވެ. ފޯރިގަދަ ކުޅުމެއް ފެނިގެންދިޔަ މިމެޗުގެ ފުރަތަމަ ހާފުގައި ދެޓީމަށްވެސް ވަނީ ލަނޑެއް ކާމިޔާބުކޮށް ލީޑު ނަގަން ފުރުސަތުތަކެއް ލިބި ބޭކާރުވެފައެވެ. އެގޮތުން ފުރަތަމަ ހާފު ނިމިގެންދިޔައީ 0-0 އިން އެއްވަރުވެގެންނެވެ.

ދެވަނަ ހާފު ފެށިގެން އީގަލްސް އިން ވަނީ މޮޅު ކުޅުމެއް ދައްކާފައެވެ. އެގޮތުން އެޓީމުން ވަނީ ގިނަ ވަގިތި ބޯޅަ ހިފަހައްޓައި މަޑުމަޑުން މެޗުގެ ކޮންޓްރޯލް އަތުލާފައެވެ. އެޓީމުން ދިޔައީ ފުލުފުލުގައި ފުރުސަތުތަށް ތަނަވަސް ކުރަމުންނެވެ. ނަތީޖާއެއްގެ ގޮތުން ލިބުނު ފުރުސަތެއްގެ ބޭނުން ހިފައި އީގަލްސްއިން ވަނީ ނިއު ސިއްސުވާލާފައެވެ. 67 ވަނަ މިނެޓުގައި އެޓީމަށް ލީޑު ނަގައިދިނީ މުހަންމަދު ނާއިމްއެވެ.

މި ލަނޑަށް ފަހުގައިވެސް އެޓިމަށް ވަނީ ރަނގަޅު ފުރުސަތުތަކެއް ލިބިގެން ގޮސްފައެވެ. އެގޮތުން އެޓީމުން ވަނީ ލީޑުގައި އޮވެ މޮޅު ކުޅުމެއް ދައްކާފައެވެ. ނަމަވެސް ކުރިއަށްޖެހި އެޓޭކް ކުރުމަށް މަސައްކަތް ކުރަމުންދިޔަ ނިއުއިން ވަނީ މެޗުގެ ފަހު ވަގުތުގައި އީގްލްސްއަށް ހެދުނު ގޯހެއްގެ ފައިދާ ނަގައި ނަތީޖާ ހަމަހަމަ ކޮށްފައެވެ. 89 ވަނަ މިނެޓުގައި ލިބުނު ޕެނަލްޓީއަކުން އެޓީމަށް ނަތީޖާ ހަމަހަމަ ކޮށްދިނީ ބިދޭސީ ފޯވާޑް އެޑްރިއަން ގަލާޑޯއެވެ. މިއީ އީގަލްސްގެ އޭރިއާގެ ތެރެއިން ނިއުގެ އަލީ ފާސިރު (ސެންޓެއަށް) އީގަލްސްގެ ޑިފެންޑަރަކު ކުރި ފައުލަކާއި ގުޅިގެން ރެފްރީ ދިން ޕެނަލްޓީއެކެވެ.

ފަހަކަށް އައިސް ނިއުއިން ކުޅޭ ގިނަ މެޗުތަކުގައި ގަލާޑޮ އަންނަނީ ސްކޯ ކުރަމުންނެވެ. އެގޮތުން ލީގުގެ ލަނޑު ލިސްޓަށް ބަލާއިރު، އެއްވަނާގައި އޮތް މާޒިޔާގެ ކެޕްޓަން އަސަދުﷲ އަބްދުﷲ އާއި ގަލާޑޯ އާއޮ ދެމެދު އޮތީ އެންމެ ލަނޑެއްގެ ތަފާތެވެ. އަސަދުﷲ މިހާތަނަށް ލީގުގައި 11 ލަނޑު ޖަހާފައި ވާއިރު ގަލާޑޯ ވަނީ 10 ލަނޑު ޖަހާފައެވެ.

މެޗުން ހޯދި ޕޮއިންޓާއި އެކު ޕްރެމިއާ ލީގުގެ ޖާގަ އަކަށް ވާދަކުރަމުން އަންނަ އީގްލްސްއަށް ވަނީ ކޮލިފައި ވުމުގެ ފުރުސަތު އަނެއްކާވެސް ބޮޑުވެފައެވެ. މިހާތަނަށް އެޓީމުން ލީގުގައި ކުޅުނު 13 މެޗުން އެޓިމު ވަނީ 22 ޕޮއިންޓް ހަމަކޮށްފައެވެ. ބާކީ އެޓީމަށްވެސް އެންމެ މެޗެއް އޮތްއިރު، އެ މެޗުން 3 ޕޮއިންޓް ހޯދައިފިނަމަ ޕްރެމިއާ ލީގުން ޖާގަ ލިބޭނެއެވެ.