ޕާޓީގެ އެތެރޭގެ އިންތިޚާބެއް ދެން ބާއްވާނީ ރިޔާސީ އިންތިޚާބަށްފަހު: ފައްޔާޒު

އެމްޑީޕީގެ އެތެރޭގެ އިންތިޚާބެއް ދެން ބާއްވާނީ ރިޔާސީ އިންތިޚާބަށްފަހު ކަމަށް، އެޕާޓީގެ ޗެއަރޕަސަން ފައްޔާޒު އިސްމާއީލް ވިދާޅުވެއްޖެއެވެ.

ފައްޔާޒު މިހެން ވިދާޅުވެފައިވާއިރު، އެޕާޓީގެ ކުރީގެ ރައީސް މުހައްމަދު ނަޝީދު ވަނީ މަގާމުން އިސްތިއުފާ ދެއްވާފައެވެ. އަދި އެމްޑީޕީގެ ނައިބު ރައީސް ކަމުގައި ހުންނެވި މުހައްމަދު ޝިފާޒް ވަނީ އެ ޕާޓީން ވަކިވެވަޑައިގެން، އަލަށް އުފައްދާ ދަ ޑިމޮކްރެޓްސްއާ ގުޅިވަޑައިގެންފައެވެ.

Advertisement

އެމްޑީޕީގެ މެންބަރުންނަށް، ވަކި ފަރުދަކަށްވުރެ އެ ޕާޓީއާއި ގައުމު މުހިންމުވުމަކީ ލިބުނު ވަރަށް ބޮޑު ކާމިޔާބީއެއް ކަމަށް، އެމްޑީޕީއަށް 18 އަހަރު ފުރުމާ ގުޅިގެން ފައްޔާޒު ވަނީ ވިދާޅުވެފައެވެ.

އެމްޑީޕީގެ ވެރިކަމުގައި ރާއްޖެއަށް ލިބުނު ކާމިޔާބީތައް ފާހަގަކުރައްވައި ފައްޔާޒު ވިދާޅުވީ، އެ ކާމިޔާބީއަށް ވާސިލުވެފައިވަނީ ފަސޭހަ ދަތުރަކުން ނޫން ކަމަށެވެ. އެގޮތުން، އެތެރޭގެ ގޮންޖެހުންތަކުން ކުރިމަތިވި ތަކުލީފުތަކަކީ ސިޔާސީ ޕާޓީއަކުން ތަހައްމަލުކުރާނެ އެންމެ އުނދަގޫ މަރުހަލާކަމަށާއި ކެތްތެރިކަމާއެކު ޕާޓީގެ މަސްލަހަތު ހިފެހެއްޓި، ޑިމޮކްރަސީގެ ހަމަތަކަށް އެންމެ ކުރިއަށް ނެރެގެން ހިތި ހަގީގަތްތަކާއެކު ލިބުނީ ތަޖުރިބާއެއްކަން ފާހަގަކުރެއްވިއެވެ. އަދި އެ ތަޖުރިބާއިން ލިބުނު ފިލާވަޅަކީ ކުރިއަށް އޮތް ތަނުގައި ކާމިޔާބީއަށް ހުޅުވާލެވުނު ދޮރެއް ކަމަށްވެސް ފައްޔާޒު ވިދާޅުވިއެވެ.

މިއީ އެމްޑީޕީ ޅަފަތުން އަރައިގަތް ދުވަސްކަން ފާހަގަކުރައްވައި ފައްޔާޒު ވިދާޅުވީ، މިއަދު އެ ޕާޓީގެ މެންބަރުން ކުރަން އޮތް ކަމަކީ އެކުގައި ނުކުމެ ޕާޓީއަށް ރިޔާސީ ދެވަނަ ދައުރު ކާމިޔާބުކުރުން ކަމަށެވެ. ފާއިތުވި ފަސް އަހަރުން ހޯދުނު ކާމިޔާބީ ޒަމާންތަކަށް ދެމެހެއްޓޭނީ އެގޮތުމުގެ މަތިންކަން އޭނާ ފާހަގަކުރެއްވިއެވެ.

މީގެ އިތުރުން 9 ސެޕްޓެމްބަރު 2023 ވެގެންދާނީ އަމިއްލަ ރަށުގައި އާއިލާއާއެކު ރަނގަޅު އާމްދަނީ ލިބޭނެ މަގަށް ހުޅުވޭ ބޮޑު ދޮރާށިން ވަދެވޭނެ ދުވަހަށް ކަމަށާއި, އެއީ ރާއްޖޭގެ ހުރިހާ ރަށަކަށް ފަހިވާން އޮތް އުފާވެރި ދިރިއުޅުމުގައި ހެޔޮފާހަގަ ޖަހާ ދުވަސް ކަމަށްވެސް ފައްޔާޒު ވިދާޅުވިއެވެ.

ފައްޔާޒު ވިދާޅުވީ ނިމިގޮސް، ގެއްލެމުންދާ އަނިޔާވެރި އަދި ލާއިންސާނީ މާޒީ އިއާދަކުރުމަށް ހިމަ ނަރެއްހާ ޖާގަވެސް ދެން އެމްޑީޕީން ނުދޭނެ ކަމަށެވެ.