ޓްރެވަލް އެޑްވައިޒަރީ ނެރުނީ ސީދާ ރާއްޖެއަކަށް ނޫން: އިނގިރޭސިވިލާތުން ރާއްޖެއަށް ކަނޑައަޅާފައި ހުންނަވާ ސަފީރު
އެ ލިސްޓަކީ ދުނިޔޭގެ ހުރިހާ ގައުމެއް ހިމެނޭހެން ކޮންމެ އަހަރަކުވެސް އަޕްޓޭޑް ކުރަމުންދާ ލިސްޓެއް
ރާއްޖޭގެ ބޯޑަރު އަލުން ހުޅުވާލުން
ޓެރަރިޒަމްގެ ނުރައްކާ އޮތްކަމަށް ބުނެ ޓްރެވަލް އެޑްވައިޒަރީ ނެރުނީ ސީދާ ރާއްޖެއަށް ނޫން ކަމަށް, އިނގިރޭސިވިލާތުން ދިވެހިރާއްޖެއަށް ކަނޑައަޅާފައި ހުންނަވާ ސަފީރު ކެރޮން ރޮސްލަރ ވިދާޅުވެއްޖެއެވެ.
ކެރޮން މިހެން ވިދާޅުވީ، ޓެރަރިޒަމްގެ ނުރައްކާ އޮތުމުން (ރާއްޖެ ހިމެނޭހެން) މި ސަރަހައްދުގެ ބައެއް ގައުމުތަކަށް ޓްރެވަލް އެޑްވައިޒަރީ ނެރެފައިވާކަމަށް ރާއްޖޭގެ ނޫހަކުން ރިޕޯޓްކުރުމާ ގުޅިގެންނެވެ. ދަތުރުކުރުމާ ގުޅޭގޮތުން އިނގިރޭސި ސަރުކާރުން އެންމެ ފުރަތަމަ އެޑްވައިޒަރީ ނެރުނީ މިދިޔަ ބުރާސްފަތި ދުވަހު ކަމަށާއި، ގްލޯބަލް ޓެރަރިޒަމްގެ ނުރައްކާ އޮތުމުން ރާއްޖޭގެ އިތުރުން އިންޑިއާ އަދި ސްރީލަންކާއަށް ވެސް އެ ދުވަހު އެޑްވައިޒަރީ ނެރުނު ކަމަށް އެ ނޫހުން ވަނީ ރިޕޯޓްކޮށްފައެވެ.
މިކަމާ ގުޅިގެން ކެރޮން ވިދާޅުވީ، އެ ލިސްޓަކީ ދުނިޔޭގެ ހުރިހާ ގައުމެއް ހިމެނޭހެން ކޮންމެ އަހަރަކުވެސް އަޕްޓޭޑް ކުރަމުންދާ ލިސްޓެއް ކަމަށެވެ.
މިކަމާ ގުޅިގެން ޓޫރިޒަމް މިނިސްޓަރު ޑރ. އަބްދުﷲ މައުސޫމް ވަނީ, މަސްދަރުން ޚަބަރު ކަށަވަރުނުކޮށް، ތެދު ދޮގުނުބަލައި، ރާއްޖޭގެ އިގުތިސާދާއި އަމަން އަމާންކަމަށް ބުރޫއަރާފަދަ ޚަބަރުތައް "ޔޯލަ"އަކުން ހޯދައިގެން ފަތުރާ ނޫސްތަކުގައި އެޑިޓަރުން ތިބޭތޯ ސުވާލު އުފައްދަވާފައެވެ. އަދި ނޫސްވެރިކަމުގެ މިނިވަންކަން ލިބެނީ ބޮޑު ޒިންމާއަކާއެކު ކަމަށްވެސް އެމަނިކުފާނު ވިދާޅުވިއެވެ.
