ޓޫރިޒަމާ ގުޅުންހުރި ކަންކަމަށް މިހާރުވެސް ޝައުގުވެރިކަން ފާޅުކުރާކަން ފާހަގަކުރެވޭ: އައްޑޫ ޑެޕިއުޓީ މޭޔަރު
27 ޖޫން 2023 | އަންގާރަ 17:53ކައުންސިލުން ބޭނުންވަނީ އައްޑޫގެ ރައްޔިތުން އެ ރަށުގައި ތިބެގެން އިގްތިސާދު ކުރިއެރުވުން
އައްޑޫ ސިޓީ ކައުންސިލްގެ ޑެޕިއުޓީ މޭޔަރު މުހައްމަދު ޝުއާއު
އައްޑޫ ސިޓީގައި ފަތުރުވެރިކަން ކުރިއެރުވުމަށް ގިނަ މަޝްރޫއުތަކެއް ކުރިއަށްދާއިރު މިހާރުވެސް އެ ދާއިރާއާ ގުޅުންހުރި ބައެއް ކަންކަމަށް ޒުވާނުންނާއި އިންވެސްޓަރުން ޝައުގުވެރިކަން ފާޅުކުރާކަން ފާހަގަކުރެވޭ ކަމަށް, އައްޑޫ ސިޓީ ކައުންސިލްގެ ޑެޕިއުޓީ މޭޔަރު މުހައްމަދު ޝުއާއު ވިދާޅުވެއްޖެއެވެ.
"ރާއްޖެޓީވީ" ގެ ފަލަސުރުޚީ ޕްރޮގްރާމުގައި ވާހަކަފުޅުދައްކަވަމުން ޝުއާއު ވިދާޅުވީ ހަންކެނޑެއާއި ގަން އިންޓަނޭޝަނަލް އެއަރޕޯޓު މަޝްރޫއަކީ އައްޑޫގެ އިގްތިސާދު ކުރިއެރުވުމަށް އެންމެ މުހިންމު ދެ މަޝްރޫއު ކަމަށާއި، މީގެ ސަބަބުން ރަށުގެ އިގްތިސާދު ކުރިއަރައި، ރަށުން ވަޒީފާގެ ފުރުސަތުތައް ފަހިވެގެންދާނެ ކަމަށެވެ. އަދި އެ ކައުންސިލުގެ އުއްމީދަކީ މި މަޝްރޫއުތައް ނިމުމުން މިހާރުވެސް ފަތުރުވެރިކަމުގެ ދާއިރާގައި އުޅޭ އައްޑޫގެ ރައްޔިތުން އެ ރަށަށް ބަދަލުވެ، އެންމެން ގުޅިގެން އެ ރަށުގެ އިގްތިސާދަށް މަސައްކަތް ކުރުން ކަމަށް އޭނާ ވިދާޅުވިއެވެ.
ޝުއާއު ވިދާޅުވީ މި މަޝްރޫއުތައް ފަށާފައިވާއިރު، މިހާރުވެސް ފަތުރުވެރިކަމުގެ ދާއިރާއިން ޒުވާނުންނާއި އިންވެސްޓަރުން ޝައުގުވެރިކަން ފާޅުކުރަމުން އަންނަ ކަމަށެވެ. އެގޮތުން ޑައިވިންގ ސްކޫލްތައް ހިންގުން ފަދަ ކަންކަމަށް ބިން ހޯދުމަށް ކައުންސިލުގައި އެދޭކަން ފާހަގަކުރެވިފައިވާކަމަށް އޭނާ ވިދާޅުވިއެވެ.
މީގެ އިތުރުން އައްޑޫގެ ޒުވާނުން އައްޑުއަށް ގެނައުމަށް އޮތް އުއްމީދު ހަގީގަތަކަށް ހެދޭނީ އެންމެން ގުޅިގެން، ވިޔަފާރިވެރިން ވެސް އައްޑޫއަށް އިންވެސްޓްކޮށްގެންކަން އޭނާ ފާހަގަކުރެއްވިއެވެ.
ޝުއާއު ވިދާޅުވީ އައްޑޫގައި ކުރިން އިންޓަނޭޝަނަލް އެއަރޕޯޓެއް އޮތްނަމަވެސް ތަރައްގީއަށް ބޭނުންވާ ވަސީލަތްތައް ހުރީ ގާއިމު ނުކުރެވި ކަމަށެވެ. ނަމަވެސް އެއަރޕޯޓު އަލުން ތަރައްގީ ކުރެވިގެން ދާއިރު، ސަރުކާރުން އައްޑޫގައި ހިންގާ އިތުރު މަޝްރޫއުތަކާއެކު އިގްތިސާދު ކުރިއެރުވުމަށް ބޭނުންވާ ހުރިހާ ވަސީލަތެއް ގާއިމުކުރެވިގެންދާނެކަން އޭނާ ފާހަގަކުރެއްވިއެވެ.
