އައްޑޫ ސިޓީގައި ހިންގި މާރާމާރީއާ ގުޅިގެން މީހަކު ހައްޔަރުކޮށްފި

އައްޑޫ ސިޓީގެ މަރަދޫފޭދޫގައި ހިންގި މާރާމާރީއާ ގުޅިގެން މީހަކު ހައްޔަރުކޮށްފިއެވެ.

ފުލުހުން ބުނީ އެ މައްސަލާގައި ހައްޔަރުކޮށްފައިވަނީ އުމުރުން 25 އަހަރުގެ ދިވެހި ފިރިހެނެއްކަމަށެވެ.

އޭނާ ހައްޔަރުކޮށްފައިވަނީ ކޯޓު އަމުރެއްގެ ދަށުން ކަމަށްވެސް ފުލުހުން ވަނީ ބުނެފައެވެ.

ޒަހަމްކޮށްލި މީހާ ވަނީ މަރުވެފައެވެ.

ބުދަ ދުވަހުގެ ރޭ 23:38ގައި ހިނގި މިހާދިސާގައި އައްޑޫ އިކުއެޓޯރިއަލް ހޮސްޕިޓަލުގައި ފަރުވާ ދެމުން ދަނިކޮށް މަރުވެފައިވަނީ 27 އަހަރުގެ އަހްމަދު ޝުއައިބް، ސ،މަރަދޫ ފޭދޫ ބްލޫ ސްޓާރއެވެ.

ފުލުހުން މައުލޫމާތު ދީފައިވާގޮތުގައި ޝުއައިބް ހޮސްޕިޓަލަށް ގެންދިޔައިރުވެސް އޭނާގެ ހާލު ވަރަށް ސީރިއަސްއެވެ.

އޭނާއަށް ފަރުވާދެމުން ދަނިކޮށް މަރުވެފައިވަނީ ބުރާސްފަތި ދުވަހުގެ ރޭގެ ފަތިހުގެ ވަގުތެއްގައިކަމަށް ފުލުހުން ވަނީ ބުނެފައެވެ.

އޭނާގެ ހަށިގަނޑުގެ އެކި ތަންތަނަށާއި މެޔަށް ބޮޑެތި ޒަހަމްތަކެއް ވަނީ ލިބިފައިވާ ކަމަށް މަންޒަރު ދުށްމީހުން ވަނީ ބުނެފައެވެ.

އެނގިފައިވާ ގޮތުގައި މި ހާދިސާ ހިނގާފައިވަނީ ފޯނެއްގެ މައްސަލާގައި ޝުއައިބުއާ އޭނާގެ ކޮއްކޮއާ ދެމެދު ހިނގި ހަމަނުޖެހުމެއްގެ ތެރެއިންނެވެ.

މިމާރާމާރީ ހިންގާފައިވަނީ އެމީހުން ދިރިއުޅޭ ގޭ ކުރިމަތީ އޮންނަ ދުވާރުމަތީގައެވެ.

ފުލުހުން ބުނީ މައްސަލަ ތަހުގީގު ކުރަމުން އަންނަ ކަމަށެވެ.