ގްރީޒްމަންގެ ދެ ލަނޑާއެކު އަލްމޭރިއާ ބަލިކޮށް އެތުލެޓިކޯ އިން ރެއާލާ ގާތަށް ޖެހިލައިފި

ސްޕެނިޝް ލީގުގައި އަލްމޭރިއާއާ ދެކޮޅަށް ކުޅުނު މެޗުން މޮޅުވެ އެތުލެޓިކޯ މެޑްރިޑުން ދެ ވަނައިގައި އޮތް ރެއާލް މެޑްރިޑާ ގާތަށް ޖެހިލައިފި އެވެ.

އެތުލެޓިކޯގެ އަމިއްލަ ދަނޑުގައި އާދިއްތަ ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 2-1 އިންނެވެ. މެޗު ފަށައިގެން ފަސް ވަނަ މިނެޓުގައި އެތުލެޓިކޯ އިން ވަނީ ލީޑު ނަގައިފަ އެވެ. އެއީ އެ ޓީމަށް ލިބުނު ކޯނަރެއްގައި އެންހެލް ކޮރެއާ ނަގައިދިން ބޯޅައެއް ބޮލުން ގޯލަށް ފޮނުވާލައިގެން ފްރާންސްގެ އެންޓޮއިން ގްރީޒްމަން ޖަހައިދިން ލަނޑެކެވެ. ފުރަތަމަ ހާފުގެ 37 ވަނަ މިނެޓުގައި އަލްމޭރިއާ އިން ވަނީ ނަތީޖާ ހަމަހަމަކޮށްފަ އެވެ. އެއީ އަލްމޭރިއާގެ ލިއޯ ބަޕްޓިސްޓާއޯ ފޮނުވާލި ބޯޅައެއް އެތުލެޓިކޯގެ ހޯޒޭ ހިމިނޭޒްގެ ފައިގައި ޖެހި ގޯލަށް ވަން ބޯޅަ އެކެވެ. ފުރަތަމަ ހާފު ނިމުމުގެ ކުރިން ދެ ވަނަ ފަހަރަށް އެތުލެޓިކޯ އަށް ލީޑު ނަގައިދިނީ ވެސް ގްރީޒްމަން އެވެ. އެއީ އަލްމޭރިއާގެ އޭރިޔާ ތެރެއިން ޔަކިން ކަރަސްކޯ ދިން ބޯޅައެއް ގޯލަށް ފޮނުވާލައިގެންނެވެ.

މޮޅާއެކު އެތުލެޓިކޯ އިން ވަނީ ދެ ވަނައިގައި އޮތް ރެއާލާ ދެ ޕޮއިންޓާ ގާތަށް ޖެހިލައިފަ އެވެ. އެއީ ކުޅުނު 29 މެޗުން 60 ޕޮޮއިންޓާއެކު އެވެ. ހަމަ އެ އަދަދަށް މެޗު ކުޅެގެން ދެ ވަނައިގައި ރެއާލް އޮތީ 62 ޕޮއިންޓާއެކު އެވެ.