އަންނަ އަހަރުގެ ރަމަޟާން މަހަށް ގިނަ ހާފިޒުންތަކެއް ތަރާވީސް ނަމާދު ކުރެވޭ ފެންވަރަށް ތަމްރީން ކުރަނީ

އަންނަ އަހަރުގެ ރަމަޟާން މަހަށް ގިނަ ހާފިޒުންތަކެއް ތަރާވީސް ނަމާދު ކުރެވޭ ފެންވަރަށް ތަމްރީން ކުރާނެ ކަމަށް އިސްލާމިކް މިނިސްޓަރު ޑރ. އަހުމަދު ޒާހިރު އަލީ ވިދާޅުވެއްޖެއެވެ.

ރާއްޖެޓީވީގައި ވާހަކަފުޅުދައްވަމުން އިސްލާމިކް މިނިސްޓަރު ވިދާޅުވީ ކޮންމެ އަހަރެއްގެ ވެސް ރޯދަމަހު ތަރީވީސް ނަމާދު ކުރުމަށް ރާއްޖެއިން ބޭރުން ހާފިޒުން ގެންނަން ޖެހޭ ކަމަށެވެ. އެގޮތުން މާލެސިޓީ އަދި އަތޮޅުތެރެއަށް ވެސް ބޭރުގެ ހާފިޒުން ގެނެސްފައިވާ ކަމަށް މިނިސްޓަރު ވިދާޅުވިއެވެ.

ރާއްޖޭގައި ވެސް ވަރަށް ރީއްޗަށް ޤުރުއާން ކިޔަވައި ގާބިލް ހާފިޒުން ތިބިކަން ފާހަގަކުރައްވައި މިނިސްޓަރު ވިދާޅުވީ ކޮންމެވެސް ސަބަބަކާއި ގުޅިގެން ތަރާވީސް ނަމާދު އަދި ހިފްޒު ކުރުމަށް ހާފިޒުން ކުރިމަތި ނުލަނީ ކަމަށެވެ. މި މައްސަލަ ހައްލު ކުރުމުގެ ގޮތުން ރާއްޖޭގައި ތިއްބެވި ހާފިޒުންނަށް އިތުރު ޓްރެއިނިންގ ދޭންޖެހޭ ކަމަށާއި، ތަރާވީސް ނަމާދު ކުރުމަށް އަހުލުވެރި ކުރުވަން ޖެހޭ ކަމަށެވެ.

މިނިސްޓަރު ވިދާޅުވީ އިސްލާމިކް ޔުނިވާސިޓީ އޮފް މޯލްޑިވްސް (އައިޔޫއެމް)އާއެކު ހާފިޒުން ތަމްރީން ކުރުމުގެ މަޝްވަރާތައް ކުރިއަށްދާ ކަމަށެވެ. އަދި މިރޯދަމަސް ނިމުމާއެކު ހާފިޒުން ތަރާވީސް ނަމާދަށް ތަމްރީން ކުރުމަށް ޕްރޮގްރާމް ފަށާނެ ކަމަށް މިނިސްޓަރު ވިދާޅުވިއެވެ. އަދި ވިދާޅުވީ މި ޕްރޮގްރާމާއެކު މިއަންނަ އަހަރަށް ގިނަ ހާފިޒުން ތަކެއް ތަރާވީސް ނަމާދު ކުރެވޭ ފެންވަރަށް ތަމްރީން ކުރެވޭނެ ކަމަށެވެ.

އަންނަ އަހަރުގެ ރަމަޟާން މަހަށް ގިނަ ހާފިޒުން ތަކެއް ތަރާވީސް ނަމާދު ކުރެވޭ ފެންވަރަށް ތަމްރީން ކުރާނެ ކަމަށް އިސްލާމިކް މިނިސްޓަރު ވިދާޅުވެފައިވާއިރު، މި މައްސަލައާ ގުޅިގެން ރައީސް އިބްރާހިމް މުހައްމަދު ސާލިހު ވެސް ވަނީ ކަންބޮޑުވުންފާޅު ކުރައްވާފައިވެއެވެ. ގުރުއާން ކިޔެވުމުގެ ގައުމީ މުބާރާތުގެ ނަތީޖާ ފާޅުކުރުމުގެ ރަސްމިއްޔާތުގައި ވާހަކަ ދައްކަވަމުން އެމަނިކުފާނު ވިދާޅުވެފައިވަނީ ރޯދަ މަހު މިސްކިތްތަކުގައި ތަރާވީހު ނަމާދު ކުރުމަށް ރާއްޖެއިން ބޭރުން ގިނަ އަދަދެއްގެ ހާފިޒުން ގެންނަ ކަމަށާއި، އެކަމަށް ދިވެހިން ނުކުންނަން ޖެހޭ ކަމަށެވެ.

ރައީސް ވިދާޅުވީ ރީތި ރާގުތަކަށް، ތަޖުވީދުގެ ހަމަތަކަށް ގުރްއާން ކިޔަވާ ދިވެހިން ވަރަށް ގިނަ ކަމަށާއި، ހާފިޒަކަށް ވުމަށް ފަހު އެގޮތުގައި ދެމިހުރުމަށް މަސައްކަތްތަކެއް ކުރަން ޖެހޭ ކަމަށެވެ. ނަމަވެސް ރާއްޖޭގައި އެ މަސައްކަތް ކުރެވޭ މިންވަރު ދަށް ކަމަށް އެމަނިކުފާނު ވިދާޅުވިއެވެ.