ދެ ވަނަ މެޗުގައި ގިބްރޯލްޓާ ބަލިކޮށް ނެދަލެންޑްސް އަށް ހަމަޖެހުމެއް

ޔޫރޯ ކޮލިފައިންގައި ކުޅުނު ދެ ވަނަ މެޗުގައި ގިބްރޯލްޓާ ބަލިކޮށް، ނެދަލެންޑްސް އިން ހަމަޖެހުމެއް ހޯދައިފި އެވެ.

ހޯމަ ދުވަހުގެ ރޭ ނެދަލެންޑްސްގެ ރޮޓާޑަމްގައި ހުންނަ ޑީ ކުއިޕް ސްޓޭޑިއަމްގައި ކުޅުނު މެޗު އެ ޓީމުން ކާމިޔާބު ކުރީ 3-0 އިންނެވެ. މެޗުގެ ފުރަތަމަ ހާފުގައި ނެދަލެންޑްސް އިން އެއް ލަނޑު ޖެހިއިރު، އަނެއް ދެ ލަނޑު ޖަހާފައި ވަނީ ދެ ވަނަ ހާފުގަ އެވެ. ފުރަތަމަ ހާފުގެ 23 ވަނަ މިނެޓުގައި ނެދަލެންޑްސް އަށް ލީޑު ނަގައިދިނީ މެމްޕިސް ޑިޕާއީ އެވެ. އޭނާ އެ ލަނޑު ޖެހީ ނެދަލެންޑްސްގެ ޑެންޒެލް ޑަމްފްރީސް ތަނަވަސްކޮށްދިން ފުރުސަތެއްގަ އެވެ. ދެ ވަނަ ހާފުގައި ނެދަލެންޑްސްގެ ދެ ލަނޑު ވެސް ޖެހީ އަކޭ އެވެ. އެއީ މެޗުގެ 50 ވަނަ މިނެޓުގައި ޑަމްފްރީސް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑާއި، 82 ވަނަ މިނެޓުގައި ޑެލޭ ބްލިންޑް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެވެ.

މިއީ ކޮލިފައިންގައި ނެދަލެންޑްސް އިން ހޯދި ފުރަތަމަ މޮޅެވެ. ކޮލިފައިންގައި ފުރަތަމަ މެޗުގައި އެ ޓީމު ވަނީ ފްރާންސް އަތުން ބަލިވެފަ އެވެ. މޮޅާއެކު ނެދަލެންޑްސް އޮތީ ގްރޫޕް ބީގެ ތިން ވަނައިގަ އެވެ. ދެ ވަނައިގައި އޮތް ގްރީސް އާއި ނެދަލެންޑްސް އަށް ތިން ޕޮއިންޓު ލިބޭއިރު، ގްރީސް އިން ކުރި ހޯދަނީ ފައިދާ ލަނޑުންނެވެ. ކޮލިފައިންގައި ނެދަލެންޑްސް އަށް ދެން އޮންނާނީ ގްރީސްއާ ދެކޮޅަށް ކުޅޭ މެޗެވެ.