މާލޭޭގެ މިސްކިތްތައް މަރާމާތު ކުރުމަށް އެކަށީގެންވާ އެހީއެއް ލިބެމުން ނުދާ ކަމަށް މާލެ ސިޓީ ކައުންސިލުން ބުނާ ވާހަކަތައް އިސްލާމިކް މިނިސްޓްރީއިން ދޮގުކޮށްފިއެވެ.
އެ މިނިސްޓްރީ އިން ނެރުނު ބަޔާނެއްގައި ބުނެފައި ވަނީ “ޗާލު މިސްކިތް” ނަމުގައި މިސްކިތްތަކުގެ އާބާތުރަ ފިލުވުމަށް ފަންޑެއް ހުޅުވައިދެއްވަމުން، ސަރުކާރުން މިސްކިތްތަކުގެ ލިބެމުންދާ މާލީ އެހީ އެކަށީގެން ނުވާކަމަށް ސިޓީ ކައުންސިލުން ބުނެފައިވާ ކަމަށެވެ. އެހެންނަމަވެސް މިސްކިތްތައް މަރާމާތުކުރުމަށް މީގެ ކުރިން ސިޓީ ކައުންސިލާއި ހަވާލު ކުރި 1 މިލިއަންގެ ބޭނުންކޮށްފައިނުވާކަމަށް އެ ކައުންސިލުން ބުނެފައިވާކަަމަށް ބަޔާނުގައިވެއެވެ.
މިނިސްޓްރީ އިން އިތުރަށް ބުނީ ލާމަރުކަޒީ ގާނޫނު ބުނާގޮތުން މިސްކިތްތައް ފޮޅާ ސާރުކުރުން އަދި މަރާމާތު ކުރުމަކީ ކައުންސިލުތަކުގެ ޒިންމާއެއް ކަމަށެވެ. އެހެންކަމުން ދައުލަތުން އެ މަސައްކަތްތައް ކުރުމަށް ބަޖެޓު ހަވާލުކުރުމުގެ އިތުރުން މިސްކިތްތައް ބެލެހެއްޓުމުގެ މަސައްކަތްތަކުގައި މިނިސްޓްރީއިން ދަނީ ކައުންސިލުތަކަށް އެހީތެރިކަން ފޯރުކޮށްދެމުން ކަމަށް އިސްލާމިކް މިނިސްޓްރީ އިން ވަނީ ބުނެފައެވެ.
އިސްލާމިކް މިނިސްޓްރީއިން ވަނީ ރާއްޖޭގެ ހުރިހާ މިސްކިތްތަކެއް މަރާމާތު ކުރުމަށްޓަކައި ކައުންސިލުތަކަށް އެހީތެރިކަން ފޯރުކޮށްދޭ ކަަމަށާއި އެކަމަށް ހިނގާނެ ހަރަދުތަކުގެ ތަފްސީލެއް ފޮނުވައިދިނުމަށް ކައުންސިލުތަކުގައި އެދިފައިވާނެ ކަމަށް ބުނެފައެވެ. އަދި ޚަރަދުގެ ތަފްސީލު ފޮނުވުމުން މިނިސްޓްރީގެ ބަޖެޓުން އެ މަސައްކަތަށް 2 މިލިއަން ދިނުމަށް ކަނޑައަޅާފައިވާކަން ސިޓީ ކައުންސިލަށް އަންގާފައިވާ ކަމަށެވެ. ނަމަވެސް އެކަމާއި މެދު ސިޓީ ކައުންސިލުން އިތުރު މުއާމަލާތެއް ކޮށްފައިނުވާކަމަށް މިނިސްޓްރީ އިން ވަނީ ބުނެފައިވެއެވެ.
މީގެ އިތުރުން އިސްލާމިކް މިނިސްޓްރީއިން ބުނެފައިވާގޮތުން، މިނިސްޓްރީގެ ބަހެއް ނެތި މަރާމާތުގެ މަސައްކަތްތަކާއި ގުޅޭ ގޮތުން މިނިސްޓްރީ ބަދުނާމުވާގޮތަށް ޚަބަރު ގެނެސްދީފައިވާތީ މިނިސްޓްރީ އިން ވަނީ އެކަން ކުށްވެރިކޮށްފައެވެ.
އަނެއްކޮޅުން ސިޓީ ކައުންސިލުން ވަނީ މިސްކިތްތަކަށް ކުރި ޚަރަދުގެ ތަފްސީލް މިނިސްޓްރީ އާއި ހިއްސާކޮށްފައިވާ ކަމަށް ބުނެފައެވެ. އަދި މިކަމުގައި މިނިސްޓްރީ އިން ދޮގު މައުލޫމާތު ހިއްސާކުރާ ކަމަށް ސިޓީ ކައުންސިލުން ތުހުމަތުކުރެއެވެ.
