ޕޯޗުގަލް ފުޓުބޯޅަ ޓީމުގެ ކޯޗުކަމުގެ މަޤާމަށް ރޮބާޓޯ މާޓިނޭޒް ހަމަޖައްސައިފި އެވެ.

މާޓިނޭޒް ހަމަޖެއްސުމާ ހަމައަށް އެ މަގާމު އޮތީ ހުސްކޮށެވެ. އެއީ ކުރިން އެ މަޤާމުގައި ހުރި ފެނާންޑޯ ސަންޓޯސް، ފީފާ ވޯލްޑް ކަޕަށްފަހު މަޤާމުން ވަކިކުރަން ނިންމުމުންނެވެ. ހޯމަ ދުވަހު ޕޯޗުގަލްގެ ފުޓުބޯޅަ އިދާރާ އިން ވަނީ އެ ޤައުމުގެ ކޯޗުކަމުގެ މަޤާމަށް މާޓިޏޭޒް ހަމަޖެއްސިކަން ރަސްމީކޮށް އިއުލާންކޮށްފަ އެވެ.

ޕޯޗުގަލް ފުޓުބޯޅަ އިދާރާގެ ރައީސް ފެނާންޑޯ ގޮމޭޒް ވިދާޅުވީ، ޕޯޗުގަލްގެ ދައުވަތު މާޓިނޭޒް ޤަބޫލު ކުރުމުން އެކަމާ އުފާވާ ކަމަށާއި، އެކަމަށްޓަކައި މާޓިނޭޒަށް ޝުކުރު އަދާކުރައްވާފަ އެވެ. މީގެ އިތުރުން އޭނާ ވިދާޅުވީ މިއީ ޕޯޗުގަލްގެ ފުޓުބޯޅަ ޓީމަށް ވަރަށް މުހިންމު ވަގުތެއް ކަމަށާއި މާޓިނޭޒަށް ފުރިހަމަ އަށް އިތުބާރު ކުރާ ކަމަށް އަދި އޭނާއާއެކު ޕޯޗުގަލް އިން ކަނޑައަޅާ ޓާގެޓުތަކަށް ވާސިލްވެވޭނެކަމުގެ އުންމީދު ވެސް ބޮޑު ކަމަށެވެ.

ޕޯޗުގަލް އިން އެ ޓީމުގެ ކޯޗަކަށް މާޓިނޭޒް ހަމަޖެއްސިކަން އިއުލާން ކުރުމުން އޭނާ ބުނީ، ބޭނުންވަނީ ނިމުނު ވޯލްޑް ކަޕްގައި ޓީމާއެކު ތިބި 26 ކުޅުންތެރިންނާ ވާހަކަ ދައްކަން ކަމަށެވެ. މީގެ އިތުރުން ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯއާ ވެސް ވާހަކަ ދައްކާނެ ކަމަށާއި، ރޮނާލްޑޯ އަށް އެންމެން ވެސް އިޙުތިރާމް ކުރަން ޖެހޭނެ ކަމަށެވެ.

މާޓިނޭޒް އެންމެ ފަހުން ހުރީ ބެލްޖިއަމްގެ ގައުމީ ޓީމުގެ ކޯޗުކަމުގައެވެ. ނަމަވެސް މިދިޔަ އަހަރު ނިމުނު ފީފާ ވޯލްޑް ކަޕްގެ ގްރޫޕް ސްޓޭޖުން ބެލްޖިއަމް ކެޓުމާއެކު މާޓިނޭޒް ވަނީ މަގާމުން އެކަހެރިވެފައެވެ. އުމުރުން 49 އަހަރުގެ މާޓިނޭޒްގެ ކޯޗިން ކެރިއަރު ފެށީ 2007 ވަނަ އަހަރުއެވެ. އެއަށްފަހު އޭނާ ބެލްޖިއަމްގެ ގައުމީ ޓީމާ ހަވާލުވީ 2016 ވަނަ އަހަރުއެވެ. މާޓިނޭޒްގެ އިރުޝާދުގެ ދަށުން ބެލްޖިއަމް ވަނީ 80 މެޗު ކުޅެފައެވެ. އޭގެ ތެރެއިން އެ ޓީމު ވަނީ 56 މެޗުން މޮޅުވެ، 13 މެޗުން އެއްވަރުވެފައެވެ. ބަލިވެފައިވަނީ 11 މެޗުންނެވެ. ބެލްޖިއަމާއެކު މާޓިނޭޒްއަށް ހޯދުނު ކާމިޔާބަކީ 2018 ވަނަ އަހަރުގެ ވޯލްޑް ކަޕްގެ ތިންވަނައެވެ.