ޕޯޗުގަލްގެ ހުސްވެފައިވާ ކޯޗުކަމުގެ މަޤާމަށް ނެދަލެންޑްސްގެ ލުއިސް ވެން ހާލް ގެންނަން މަސައްކަތް ކުރާ ކަަމަށް މީޑިއާ ރިޕޯޓުތައް ބުނެފިއެވެ.
ޕޯޗުގަލްގެ ކޯޗުކަމުގައި އެންމެ ފަހުން ހުރީ ފެނާންޑޯ ސަންޓޯސްއެވެ. ނަމަވެސް މިއަހަރުގެ ވޯލްޑް ކަޕް މުބާރާތުގެ ކުއާޓާ ފައިނަލްގައި މޮރޮކޯ އަތުން ބަލިވެފައެވެ. ޕޯޗުގަލް މުބާރާތުން ކެޓުމާއެކު އޭނާ ވަނީ މަގާމުން ވަކިކޮށްފައެވެ. ޕޯޗުގަލްގެ ކޯޗުކަމުގައި ސަންޓޯސް ހުރީ 2014 ވަނަ އަހަރުން ފެށިގެން މިއަހަރުގެ ވޯލްޑް ކަޕް މުބާރާތުގެ ނިޔަލަށެވެ.
މީޑިއާތަކުން ރިޕޯޓުކޮށްފައިވާ ގޮތުގައި އެ މަގާމަށް ވެން ހާލް ގެނައުމަށް ޕޯޗުގަލްގެ ފުޓުބޯޅަ އިދާރާ އިން ބޭނުންވެއެވެ. މިވަގުތު ވެން ހާލް ހުރީ ވެސް އެއްވެސް ޓީމެއްގެ ކޯޗުކަމުގައެއް ނޫނެވެ. ވެން ހާލް އެންމެ ފަހުން ހުރީ ނެދަލެންޑްސްގެ ކޯޗު ކަމުގައެވެ. ތިން ވަނަ ފަހަރަށް އޭނާ ނެދަލެންޑްސްއާ ހަވާލުވީ މިދިޔަ އަހަރު އެވެ. އެއަށްފަހު މިއަހަރުގެ ވޯލްޑް ކަޕަށް ކުރިމަތިލައި، ވެން ހާލް ވަނީ ނެދަލެންޑްސް ގޮވައިގެން މުބާރާތުގެ ކުއާޓާ ފައިނަލްގައި ކުޅެފައެވެ. ކުއާޓާ ފައިނަލްގައި އެ ޓީމު ބަލިވީ ޕެނަލްޓީގައި އާޖެންޓީނާ އަތުންނެވެ.
ވޯލްޑް ކަޕުގެ ކުރިން ވެން ހާލް ވަނީ މުބާރާތަށް ފަހު ކޯޗުން ކެރިއަރު ހުއްޓާލާނެ ކަމަށް ބުނެފައެވެ. މި އަހަރުގެ ކުރީ ކޮޅު ވެން ހާލް ވަނީ ކެންސަރު ބައްޔަށް ވެސް ފަރުވާކޮށްފައެވެ. ނެދަލެންޑްސްގެ ރޭޑިއޯ ޝޯ އަކުން ވަނީ ވެން ހާލްއާ ޕޯޗުގަލްގެ ކޯޗުކަމާ ހަވާލުވުމުގެ ސުވާލުކޮށްފަ އެވެ. އެ ސުވާލަށް ޖަވާބު ދެމުން ވެން ހާލް ބުނީ އަނެއްކާ ވެސް އޭނާ ހުރީ ރިޓަޔާ ކޮށްފައި ކަމަށެވެ. ނަމަވެސް ޕޯޗުގަލް އިން އެފަދަ ހުށަހެޅުމެއް އޭނާ އަށް ހުށަހަޅައިފި ނަމަ އެކަމާމެދު އޭނާ ވިސްނާނެ ކަމަށް ވެން ހާލް ބުންޏެވެ. މީގެ އިތުރުން މިވަގުތަށް ބުނެވޭނެ މިންވަރަކީ އެއީ ކަމަށް ވެސް އޭނާ ބުންޏެވެ.
އަނެއްކާ ވެސް އަހަރެން މި ހުރީ ރިޓަޔާކޮށްފައި. އެކަމަކު އެމީހުން (ޕޯޗުގަލް) އިން އެ ފަދަ ހުށަހެޅުމަކަށް އަހަރެންނަށް ގޮވާލައިފި ނަމަ، އެކަމާ މެދު އަހަރެން ވިސްނާނަން. މިވަގުތަށް ބުނެވޭނެހާ ވެސް އެއްޗަކީ އެއީ.ލުއިސް ވެން ހާލް ގެންނަން
ވެން ހާލްގެ އިތުރުން ޕޯޗުގަލުން އެހެން ބައެއް ކޯޗުނަށް ވެސް ފާރަލަމުންދާ ކަމަށް ރިޕޯޓުތައް ބުނެއެވެ. އޭގެ ތެރޭގައި އިޓާލިއަން ލީގުގެ ރޯމާގެ ކޯޗުކަމުގައި ހުރީ ހޯސޭ މޮރީނިއޯގެ އިތުރުން އަންދްރޭ ވިލާސް-ބޯސް އަދި ޕައުލޯ ފޮންސެކާ ހިމެނޭ ކަމަށް ރިޕޯޓުތަކުގައި ވެއެވެ. ނަމަވެސް ޕޯޗުގަލުން އެންމެ ބޭނުންވަނީ ވެން ހާލް ކަމަށާއި، ސަބަބަކީ އޭނާގެ އިންޓަނޭޝަނަލް ތަޖުރިބާ ބޮޑުވުމުން ކަމަށް ރިޕޯޓުތައް ބުނެއެވެ.
1986 ވަނަ އަހަރު ކޯޗިން ކެރިއަރު ފެށި ވެން ހާލް ވަނީ ގިނަ ކުލަބުތަކަށް ކޯޗުކަން ކޮށްދީފައެވެ. އޭގެ ތެރޭގައި ސްޕެއިންގެ ބާސެލޯނާ އާއި، ޖަރުމަނު ލީގުގެ ބަޔާން މިއުނިކް އަދި އިނގިރޭސި ޕްރިމިއާ ލީގުގެ މެންޗެސްޓަރ ޔުނައިޓެޑު ހިމެނެއެވެ.
