ބެލްޖިއަމް ބަލިކޮށް މޮރޮކޯ އެއްވަނައަށް

ފީފާ ވޯލްޑް ކަޕްގައި ބެލްޖިއަމްއާ ވާދަކުރި މެޗު ކާމިޔާބުކޮށް، މޮރޮކޯއިން ތާވަލުގެ އެއްވަނަ މަގާމަށް ޖެހިލައިފިއެވެ.

ގްރޫޕް އެފްގެ މި މެޗު މޮރޮކޯ ކާމިޔާބުކުރީ 2-0ންނެވެ. މެޗުގެ ފުރަތަމަ ހާފުގައިވެސް މޮރޮކޯއިން ލަނޑެއްޖެހިއެވެ. ނަމަވެސް ވީއޭއާރް ބެލުމަށްފަހު ރެފްރީ ވަނީ ހަކީމް ޒިޔެކް ޖެހި ލަނޑު ބަލައިނުގަތުމަށް ނިންމާފައެވެ. މޮރޮކޯއިން ލީޑު ނެގީ ދެވަނަ ހާފުގައެވެ. މެޗުގެ 73 ވަނަ މިނެޓުގައި މޮރޮކޯއަށް ލީޑު ނަގައިދިނީ އަބްދުލްހާމިދު ސަބީރީއެވެ. މިއީ ހިލޭ ޖެހުމަކުން ގޯލުގެ މަގަތު ކަނަށް ބޯޅަ ފޮނުވާލައިގެން އޭނާ ކާމިޔާބުކުރި ލަނޑެކެވެ. މޮރޯކޯގެ ފަހު ލަނޑަކީ މެޗުގެ އިތުރު ވަގުތުގައި ޒިޔެކް ދިން ޕާހެއް، ގޯލުގެ މަގަތު ކަނަށް ފޮނުވާލައިގެން ޒަކަރިއްޔާ އަބޫޚްލާލް ކާމިޔާބުކުރި ލަނޑެކެވެ.

މި މެޗުގައި ބެލްޖިއަމްއަށްވެސް ލަނޑު ޖެހުމަށް ރަނގަޅު ފުރުސަތުތަކެއް ލިބުނެވެ. ނަމަވެސް ތޯގަން ހަޒާޑް ފޮނުވާލި ބާރު ހަމަލާ ދިފާއުކުރީ މޮރޮކޯގެ ކީޕަރު މުނީރެވެ. އޭގެ ފަހުން ބަޓްޝޯއީ ފޮނުވާލި ހަމަލާގެ ހުރަހަކަށްވީ މޮރޮކޯގެ ޑިފެންޑަރުންނެވެ.

މިއީ ވޯލްޑް ކަޕްގައި މި ދެޓީމު ބައްދަލުކުރި ދެވަނަ ފަހަރެވެ. މީގެ ކުރިން 1994 ވަނަ އަހަރުގެ މުބާރާތުގައި މި ދެޓީމު ބައްދަލުކުރި މެޗު 1-0ން ކާމިޔާބުކުރީ ބެލްޖިއަމްއެވެ.

މުބާރާތުގައި މޮރޮކޯގެ ފުރަތަމަ މެޗުގައި އެ ޓީމު ބައްދަލުކުރީ ކްރޮއޭޝިޔާއާއެވެ. އެ މެޗު ނިމުނީ އެއްވަރުވެގެންނެވެ. ބެލްޖިއަމްގެ ފުރަތަމަ މެޗުގައި އެޓީމުން ވަނީ ކެނަޑާގެ މައްޗަށް ކުރިހޯދާފައެވެ.

މެޗުން މޮޅުވެ ގްރޫޕްގެ އެއްވަނާގައި މޮރޮކޯ އޮތީ ހަތަރު ޕޮއިންޓާއެކުއެވެ. މޮރޮކޯ އަތުން ބަލިވި ބެލްޖިއަމް ދެވަނާގައި ތިން ޕޮއިންޓާއެކު އޮތްއިރު, އެއް ޕޮއިންޓާއެކު ތިންވަނާގައި އޮތީ ކްރޮއޭޝިޔާއެވެ. ޕޮއިންޓެއް ނުލިބި ތާވަލުގެ ފުލުގައި އޮތީ ކެނަޑާއެވެ.