ވެހިކަލް ފީގެ ފައިސާ މާލެ ސިޓީ ކައުންސިލަށް ޖަމާނުކުރާ ކަމަށް ބުނާ ވާހަކަ ފިނޭންސް މިނިސްޓްރީން ދޮގުކޮށްފި

ވެހިކަލް ފީގެ ފައިސާ މާލެ ސިޓީ ކައުންސިލަށް ޖަމާނުކުރާ ކަމަށް ބުނާ ވާހަކަ ފިނޭންސް މިނިސްޓްރީން ދޮގުކޮށްފިއެވެ.

ސިޓީ ކައުންސިލުން ބުދަ ދުވަހު ކުރިއަށް ދިޔަ ކައުންސިލްގެ 74 ވަނަ ރަސްމީ އާއްމު ޖަލްސާގައި އެ ކައުންސިލުން ވަނީ އެ ފައިސާ ކައުންސިލަށް ނުލިބޭ ކަމަށް ބުނެފައެވެ.

އެގޮތުން ޖަލްސާ ވާހަކަ ދައްކަވަމުން މާލޭ ސިޓީގެ މޭޔަރު ޑރ. މުހައްމަދު މުއިއްޒު ވިދާޅުވީ މާލެ ސިޓީ ކައުންސިލްގެ އިހުތިސާސްގެ ތެރޭގައި ހިމެނޭ ސަރަހައްދުގައި ދުއްވާ ވެހިކަލްގެ ފީ ސިޓީ ކައުންސިލަށް ޖަމާކުރުމަށް ޤާނޫނުގައި އޮތް ނަމަވެސް ފާއިތުވި ހަތަރު މަސް ދުވަހު ކައުންސިލަށް ފައިސާ ނުލިބޭ ކަމަށެވެ.

އެއީ ކައުންސިލްގެ އާމްދަނީ ފައިސާ ކަމަށާއި އެކަމާއި ގުޅިގެން ވަރަށް ގިނަ ދަތިތައް ދިމާވާ ކަމަށް ވެސް މުއިއްޒު ވިދާޅުވިއެވެ. މުއިއްޒު ވިދާޅުވީ އެ ފައިސާ ސަރުކާރަށް ނުހިފެހެއްޓޭނެ ކަމަށާއި މިއީ ކަންބޮޑުވުން އޮތްކަމެއް ކަމަށެވެ.

ޖަލްސާގައި ހުޅުމާލެ ދާއިރާގެ ކައުންސިލަރު އިބްރާހިމް ޝުޖާއު ވަނީ ފިނޭންސް މިނިސްޓްރީ އިން ކައުންސިލަށް ދޭންޖެހޭ ފައިސާ އެއް ނެތް ކަމަށް ބުނެ ބައެއް މީޑިއާތަކަށް އެ މިނިސްޓްރީން ދީފައިވަނީ ދޮގު މަޢުލޫމާތެއް ކަމަށް ވިދާޅުފައެވެ.

ޝުޖާއު ވިދާޅުވީ ކައުންސިލަށް ފިނޭންސް މިނިސްޓްރީ އިން ދޫކޮށްފައިވަނީ ބްލޮކް ގްރާންޓްގެ ގޮތުގައި ދެންޖެހޭ ފައިސާ ކަމަށާއި، އެ ފައިސާ ޚަރަދުކުރަނީ ކައުންސިލްގެ މުވައްޒަފުންގެ މުސާރަ އާއި ކައުންސިލްގެ ބިލްތައް ދެއްކުމަށް ކަމަށެވެ.

މިއަދު ކައުންސިލުން ދައްކަންޖެހޭ ވާހަކައަކީ ކައުންސިލްގެ މަސައްކަތްތަކަށް ސަރުކާރުން ކުރިމަތިކުރުވާ ހުރަސްތަކުގެ ވާހަކަ ކަމަށާއި، މިކަމަކީ ހުރިހާ ކައުންސިލަރުންނަށް ވެސް އަދި ރައްޔިތުންނަށް ވެސް އެނގެންޖެހޭ ކަންކަން ކަމުގައި ޝުޖާއު ވަނީ ވިދާޅުވެފައެވެ.

ޝުޖާއު އިތުރަށް ވިދާޅުވީ ލާމަރުކަޒީ ޤާނޫނުގައި ލިޔެފައިދިނަސް ކަންކަން ނުކުރެވޭނެ ކަމަށާއި، ޤާނޫނުގެ ބާރާއި ފައިސާ ލިބޭނެ ގޮތްތައް ވެސް ސަރުކާރުން ފަހިކޮށްދޭން ޖެހޭކަމަށެވެ.

މިކަމާއި ގުޅިގެން ރާއްޖެއެމްވީއަށް މައުލޫމާތު ދެއްވަމުން ފިނޭންސް މިނިސްޓްރީގެ މީޑިއާ އެގްޒެކްޓިވް މުހައްމަދު ޝަނޫން ވިދާޅުވީ ވެހިކަލް ފީ އަކީ ކުއާޓަރުތަކަށް ބަހާލެވިގެންދޭ ފައިސާ އެއް ކަމަށާއި ފުރަތަމަ ކުއާޓަރާއި ދެވަނަ ކުއާޓަރުގެ ފައިސާ މާލެ ސިޓީ ކައުންސިލަށް ދޫކޮށްފައިވާނެ ކަމަށެވެ. އަދި ތިން ވަނަ ކުއާޓަރުގެ ފައިސާ ދޫކުރުމަށް މަސައްކަތް ކުރަމުންދާ ކަމަށާއި ވަރަށް އަވަހަށް އެ ފައިސާ ދޫކުރާނެ ކަމަށް ވެސް ޝަނޫން ވިދާޅުވިއެވެ.