މިލިއަނަކަށްވުރެ ގިނަ ފޭސްބުކް އެކައުންޓުގެ ލޮގިން އިންފޮރމޭޝަން ލީކުވެފައި އޮވެދާނެކަމުގެ އިންޒާރު މެޓަ އިން ދީފިއެވެ.

ފާއިތުވި ތިން ދުވަހު ގިނަ އަދަދެއްގެ ފޭސްބުކް އެކައުންޓުތައް ދަނީ ހެކްކުރަމުންނެވެ.

މިކަމާއި ގުޅިގެން މެޓައިން ހަދާފައިވާ ދިރާސާއަކުން ވަނީ ފޭސްބުކް ލޮގިން މައުލޫމާތު އަތުލެވޭނެހެން ފަރުމާކޮށްފައިވާ 400 އަށްވުރެ ގިނަ އެންޑްރޮއިޑް އަދި އެޕަލް އެޕް ހޯދާފައެވެ. މި އެޕްތަކުގެ ތެރޭގައި ހިމެނެނީ ގޭމާއި، ފޮޓޯ އެޑިޓިން އެޕްތަކާއި، ހެލްތު އެންޑް ލައިފްސްޓައިލް އެޕްތައް ކަމަށް މެޓައިން ބުނެފައިވެއެވެ.

މިފަދަ އެޕްތަކަށް ފުރަތަމަ ވަންނައިރު ފޭސްބުކް އެކައުންޓުން ނުވަތަ ކޮންމެވެސް އެހެން އެކައުންޓަކުން ލޮގިންވާން އަރައެވެ. އަދި ލޮގިންވުމާއެކު ލޮގިން މައުލޫމާތު އެ އެޕަކުން އެއްކުރާނެއެވެ.

މިގޮތަށް މައުލޫމާތު ލީކުވެފައިހުރި އެކައުންޓުތަކުގެ ލޮގިން އީމެއިލް އަދި ނަންބަރު ހިނދުކޮޅެއްގެ ތެރޭގައި ބަދަލުވެއެވެ. އަދި އެމީހަކު އެ އެކައުންޓަކުން ބޭންކޮށްލައެވެ.

މެޓައިން ވަނީ މިފަދަ ކަންކަމަށް ސަމާލުވުމަށް އިލްތިމާސްކޮށްފައެވެ. މިގޮތުން އެ އެޕަކީ ސޯޝަލް މީޑިއާގެ މައުލޫމާތުތައް ހިއްސާނުކޮށް ކުރިއަށްދެވޭ އެޕެއްތޯ ބެލުމާއި، މީހުންގެ މެދުގައި އެޕްގެ މަގުބޫލުކަން އޮތް މިންވަރާއި، އެޕްގައި ބުނާގޮތަށް އެ އެޕް މަސައްކަތްކުރަމުންދޭތޯ ބަލަން މެޓައިން ވަނީ އިރުޝާދު ދީފައެވެ.

މެޓައިން ބުނީ އެކައުންޓު ހެކް ވުމުގެ ނުރައްކާ އޮތް ފަރާތްތަކާ ކޮންޓެކްޓުކުރަމުންދާކަމަށެވެ. އަދި ހެކް ވެއްޖެނަމަ ޕާސްވޯޑް ރީސެޓުކޮށް، ޕާސްވޯޑު ވަރުގަދަކުރުމަށް މެޓައިން ލަފާދެއެވެ. އަދި "ޓޫ ފެކްޓަރ އޯތެންޓިކޭޝަން" އޮން ކުރުމަށާއި، ލޮގިން އެލާޓް އަންނަ ގޮތް ހެދުމަށް އިރުޝާދުދީފައިވެއެވެ.