ގެފުޅުގެ އުރަކޮޅު ތައްޔާރުކުރުމަށް 410 ކިލޯގެ ކަފަ ބޭނުންކުރޭ

ކައުބަތުﷲ ގެފުޅުގެ އުރަކޮޅު ތައްޔާރުކުރުމަށް 410 ކިލޯގްރާމްގެ ކަފަ ބޭނުންކުރެވޭކަމަށް، ގެފުޅުގެ ކަންކަން ބަލަހައްޓާ ކިންގް އަބްދުލް އަޒީޒް ކޮމްޕްލެކްސްގެ އަންޑަރ ސެކްރެޓަރީ ޖެނެރަލް އަމްޖަދު ބިން އައިދު އަލްހަޒްމީ ވިދާޅުވެއްޖެއެވެ. އޭނާވިދާޅުވީ މުޅި އުރަކޮޅުގެ ބަރުދަނަކީ 1،300 ކިލޯގްރާމް ކަމުގައެވެ.

އަލްހަޒްމީ މިހެން ވިދާޅުވެފައިވަނީ އޮކްޓޯބަރ ހަތްވަނަ ދުވަހު ފާހަގަ ކުރެވުނު "ވަލްޑް ކޮޓްން ޑޭ" އާ ދިމާކޮށެވެ. އޭނާ ވިދާޅުވީ ގެފުޅުގެ އުރަކޮޅު ތައްޔާރުކުރުމުގައި ކަފަ އެހާ ގިނައިން ބޭނުންކުރަނީ، ކަފައަކީ މުހިންމު ރޯ-މެޓީރިއަލްއަކަށް ވެފައި، ކޮންމެ މޫސުމެއްގައިވެސް ހެއްދޭ ބާވަތަކަށް ވާތީކަމަށެވެ. އުރަކޮޅަށް ބޭނުން ކުރެވޭ ފޮތި ވިޔަނީ ކިންގް އަބްދުލް އަޒީޒް ކޮމްޕްލެކްސްގައި، އެންމެ ފަހުގެ ވިޔާ މެޝިންތައް ބޭނުންކޮށްގެން ކަމަށާއި، އަދި ކަފަ ބޭނުންކުރަނީ އުރަކޮޅުގެ އަޑީގައި ހުންނަ ބަތާނަބަޔަށް ކަމަށް އޭނާ ވިދާޅުވި އެވެ. އޭގެ ބޭނުމަކީ މޫސުމުގެ ސަބަބުން ގެފުޅަށާ އުރަކޮޅަށް އަންނާނެ ބަދަލު ތަކުން ރައްކާތެރި ކުރުން ކަމަށް އަލްހަޒްމީ ވިދާޅުވިއެވެ.

އަލްހަޒްމީ ވިދާޅުވީ، ގެފުޅުގެ އުރަކޮޅުގައި ޖަރީކުރެވިފައިވާ ކީރިތީ ޤުރުއާންގެ އާޔަތްތަކުގައިވެސް ކަފަ ގިނަ އަދަދަކަށް ބޭނުންކުރެވޭ ކަމަށެވެ. މިގޮތުން އަކުރުތައް އުފުލިފައި ހުންނަގޮތަށް ހެދުމަށް، ކަފަ ބޭނުންކުރެވޭ ކަމަށް އޭނާ ވިދާޅުވިއެވެ.

ތިމާވެއްޓާބެހޭ އަދި އެގްރިކަލްޗަރަލް ރިސަރޗް ތަކުން ދައްކާގޮތުގައި، ކަފައަކީ ދުނިޔޭގައި އެންމެ ގިނަ އަދަދަކަށް ހެއްދޭ، ވިއްކޭ، އަދި ބޭނުންކުރެވޭ "ކްރޮޕް" އެވެ. އަދި ކޮންމެ މޫސުމެއްގައިވެސް ފަސޭހައިން ހެއްދޭ، ހުރިހާ މޫސުމަކާވެސް ގުޅޭ ގަހެކެވެ.